Ang mga fans ug mga pan ni Super Bob

Inig ka buntag samtang magpabokal kog tubig para ipangape, abrihan ko ang TV para motan-aw og pipila ka local nga balita. Ug agig likay-likay sa mga commercial, mapugos kog channel hop. Gikan sa GMA7 paingon sa ABS ug balik. (Ambot kun duna bay local nga balita sa buntag ang TV5.) Usas akong paborito nga segment mao ang editorial ni Bobby Nalzaro kay kalma ra kaayo modag bugalbugal ug pasiaw kining maong anchor.

Gahapon sa buntag mihisgot siya kabahin sa anti-mendicancy ordinance ning dakbayan. Nahimuot ko sa iyang diskusyon tungod kay dili kini teknikal. Kabahin kini sa gibati sa usa ka mangihatagon nga gidid-an sa balaod pagpanghatag. Ug mosamot ang frustration sa mga mangihatagon karon kay nagkaduol na ang Pasko nga maoy tingbutho sa mga mangayog limos. “Ber months na,” matud pa ni Nalzaro.

Nagkanayon si Super Bob nga siya mismo nakalapas sa balaod kay usahay makahatag gyud siya sa mga bata nga mangayo kaniya. Pong pa sa anchor –Buanga aning mga bataa nakaila man sab nako. Naa tingay ni mga TV sa ila. Basta mo-anha kos Fuente moduol dayon ni sila ug mangayo. Di man ko mohatag og kwarta, ingnon lang nako ang bakery nga tagsaan ni silag pan.

Mingisi ko ning tungora kay na imagine nako ang usa ka surreal biblical like scene diin si Super Bob nga gaputi og sinina (tigputi man gyud ni siya) nanghatag og pan sa ga-linya nga rugby kids. Matud pa sa uban, ang rugby pangpugong sa gutom aning mga bata. Mao nga nakahunahuna ko nga matag panghatag ni Super Bob og pan ning mga bataa posibleng mo-abstain usa sila sa rugby kay nasudlan na man ilang tiyan. Hinuon dili man tingali tanang bata nga fans ni Super Bob sa Fuente mga batang rugby.

Diha usab kunoy dakog lawas nga makililimos nga iyang gikasab-an. Kay nganong wa man kini manrabaho nga maayo man kini og panglawas. Apan human niya kini kasab-i gitagaan niya kini og P20 kay naluoy siya niini.

Like all good humorists dunay self deprecating angle si Super Bobby Nalzaro. Sa ato pa di lang siya mang yagayaga sa uban hasta iyang kaugalingon iya sang bugal-bugalan.

Niingon siya nga tungod kay nakalapas siya sa anti mendicancy ordinance andam siyang magpadakop. Apan nangutana siya kun unsa may nahimo sa kagamhanan sa dakbayan pagpatuman ning maong ordinansa.

Unsaon ta man tuod kining mga ordinansa kun di ta kini mapatuman?