Masiao ko, Starex mo
Morag gibangaan man tingali sa atong kapulisan kining ubang mga tawo.
Una, dunay mga killer nga motanom og pakatok nga motive. Unya niay mga nadagsa nga mga Koreano nga buot maghimog car-nap syndicate dinhi.
Ang gituhoang masiao usher nga si Marlon Reyes, 38 anyos gipusil-patay sa kaadlawon sa Horseshoe Drive, Banawa, Guadalupe. Matud pas taho may lakra sa pisi ang liog sa biktima. Gituhoan usab nga gipaum-om kini sa pusil una pusila.
Diha kunoy mga sikyu sa duol apan ang naka “faet,” wa sila kamatngon sa hitabo kay nahinanok sila. Tinuod usa lang si Marlon Reyes sa hapit kada adlaw nga gipangpatay ning atong dakbayan apan may gamay nga kalahian ang iyang kamatayon.
Nalahi kini kay may gipadayag nga motibo ang mipatay kaniya. Gibinlan og sulat ang belt bag ni Reyes. Usa ka sulat nga mipahimangno sa mga pinanser nga silay isunod pagpatay kun di sila moundang sa ilang pagpadagan og masiao.
Hinuon alang kang Cebu City Police Acting Director Senior Supt. Mariano Natuel Jr., usa lang ka diversionary tactic ang maong sulat. Bitaw, masiao usher na lang gyuy pahimungtan sa mga vigilante ug mga mersinaryo dinhi sa ato? Pagka-wa say ayo. Gibugoan na gyud tingay sa mga pulis ning maong mga killer.
Ambot sab kun unsay nasud sa hunahuna nng mga Koreano nga nia man sa Cebu misuway paghimo og car-nap syndicate. Ug usa lang ra ba ka sakyanan ang ilang target: Hyundai Starex Van. Ka-exclusive ba! Unsa man ni, Gangnam style?
Ang kanhi basketbolista nga si Ramon Fernandez usa sa nabiktima ning mga Koreano. Nagkanayon ang multiple most valuable player awardee sa Philippine Basketball Association nga nakasiguro siya nga mabalik iyang sakyanan kay dili parehas ang Cebu sa Manila diin ang imong sakyanan mabiyahi dayon sa laing probinsya. Tungod kay ang Cebu isla man, nakahibawo si Fernandez nga dili kini madalidali pagpatabok sa laing lugar. Ug tuod man nakuha rag balik ni Fernandez ang iyang Starex,
Ug uban sa pagkuhag balik sa mga nakawat nga Starex mao ang pagsikop sa mga Koreano nga nagpaluyo sa maong pangawat. Lima na ka Koreano ang natanggong karon.
Gibangaan tingay ning mga Koreano nato, da.
