Suspendido na si Governor Gwen?

Dali kaayong mikatap kagahapon sa buntag ang balita nga pahamtangan na og suspension si Gov. Gwendolyn Garcia.

Pipila ka mga kawani sa Kapitolyo ang misugat kanako kagahapon bahin sa maong impormasyon ug matud pa ang taga-Department  of Interior and Local Government (DILG) ang  mo-serve sa suspension batok  sa gobernadora.

Daku ang ilang pagtuo nga tinuod gyud ang istorya kay gipasirad-an ang ubang mga entrance/exit sa Kapitolyo unya gipadaghan ug gipa-alerto ang mga blue guards aron maoy moharang sa taga-DILG pag-serve sa suspension.

Dihang akong nasugatan ang usa sa mga consultant sa Kapitolyo nga si  manlalaban Lito Astillero iyang gipasabot nga “speculation” lang ang balita kay wa pa gyud sila makadawat.

Ang pagpasira sa ubang mga entrance/exit  ug pagpalig-on sa seguridad  gituyo tungod kay dunay mga kalihokan karon diha sa Kapitolyo sama sa “Christmas Agri Fair” diin bukas kini sa tanan.

Hinuon gipasabot ni Astillero nga kun makadawat man sila unya legal ug genuine document mohimo sila og mga  lakang nga  punto legal agig  pagtuman  sa “rule of law”.

Apan kun binuang man ug peke ang dokumento dili gyud sila modawat.

Pero unsa ka tinuod nga nanghipos na si Gov. Gwen niadtong miaging gabii pa dihang gitunolan kini sa suspension order apan wa niya dawata ug wa niya pirmahi?

Pagkasakit nga pinaskohan kun tinuod kining tanan!

* * *

Salamat nga abli na ang impormasyon ug mihatag na og klarong katin-awan ang hamiling kapikas ni kanhi Cebu City Councilor ug City Traffic Operations(Citom) Chairman Jack Jakosalem nga si Ma’am Sharon kabahin sa tinuod nga kondisyon sa panglawas sa iyang bana.

Salamat sa Ginoo ug kang San Pedro Calungsod kay daku na og  kalamboan si Sir Jack niining mga panahuna gikan nga  nag-comatose sa sakit  nga brain parasite nga gi-operahan.

Sa tinuod lang kanunay kong nakapanglipagho ug  nakapanglingo-lingo sa mga impormasyon nga akong nadawat kaniadto nga anaa sa delikado nga kahimtang ang Citom chairman.

Sa tinuod lang, medyo nabato ko dihang gipahibawo ko ni Sir Bobby Nalzaro nga nag-comatose sab si Sir Jack  niadtong anaa pa sa ospital ug critical pa si anhing  Marlon  Belleta.

Kinsay magdauom nga ma-ospital siya tungod sa iyang kahimsog ug abtik pa kaayo?

Maglaum na lang ko nga paspas ang recovery sa akong amigo aron makaalagad pa siya sa lungsod.

Ingkaso nga di pa kaya ni Citom Chair Jakosalem ang iyang panglawas mas maayo tingali nga si Ma’am Sharon nga iyang asawa maoy i-substitute sa iyang candidacy pagka Cebu City Councilor North karong Biyernes (Disyembre 1).

* * *

Daryot gyud ko makadisgrasya og batang lalaki diha sa may eskina Escario ug Gorordo Avenue ning dakbayan niadtong Lunes sa udto samtang  nagmaneho ko sa motorsiklo sa among  kompaniya.

Ang maong bata, usa sa upat nga nanaygon ngadto sa mga moagi nga sakyanan.

Ang duha diha gyud sa tunga-tunga sa kalsada. Samtang ang laing duha diha kilid sa kalsada habig sa Escario sa may “Bread and Butter” nga bakery.

Dihang nagsubay ko sa Gorordo ug pa right-turn sa Escario mikalit bitaw  na og labang ang batang lalaki. Hapit gyud maigo ang anghel. Suwerte lang nga wa ko maratol  ug tapot kaayo ang break.

Mao nga akong gipangbadlong ug wa nako biyai hangtud nakauli sa ilang pamilya diha sa may barangay Camputhaw.

Akong gi-report ang nahitabo sa Barangay Hall sa Camputhaw aron  intawon mabadlong ang mga bata nga gipasagdan lang  nga nanaygon.

Pero diha bayay nagtambay nga tanod sa maong bakery apan ambot  lang kun nganong wa kabadlong.

Kumusta naman tuod ang Cebu City  Anti-Mendicancy Task Force nga gipangulohan ni Ma’am Betty Ganub? Naglihok pa  niining  maong  problema?

Inutil na gyud ni sila pagpanghipos sa mga bata ug mga dagkung tawo nga manaygon sa atong kadalanan?

Wa man seguro gidili ang pagpamasko basta dili lang sa mga peligrong lugar.

* * *

Wa na ba gyuy kawat sa gasolina ug krudo alang sa mga fire trucks sa Bureau of Fire Protection?

Kagahapon, usa ka Fire Inspector Myla Selma ang gitaral sa korte ug  two counts nga kasong malversation of public funds or property tungod kay niadtong siyay fire-marshal sa Labangon daghang kawat sa gasolina ug krudo nga giingong may pagtugot  kaniya.

Girekomendar siya nga makapiyansa og P40 mil sa duha ka  mga kaso.

Usa sa makapanimbawot  nga binuhatan sa opisyal  kay iyang gibaligya ang 20 litros nga krudo kay matud pa ipalit og regalo sa kasal sa iyang kaubang  opisyal kaniadto.

Haskang paita kun tinuod kini kay kini maoy maka-jeopardize sa operation nga sa panahon dunay sunog  dili kadagan  ang atong  mga  fire trucks kay gisuyop sa mga  opisyal ang gitibol.

Mao ba sab ning opisyala ang nag-atubang karon og proceedings nga dismissal from service tungod kay positibo nga tiggamitan og shabu?