Sa mga gipakita karong lakang sa kampo ni Cordova Mayor Adelino Sitoy batok kang boxing promoter Rex Wakee Salud usa ka timailhan nga nahulga gyud si Mayor Sitoy.
Abir kun dunay usa ka yanong tawo nga dili ilado, dili kwartahan ug seguradong mangamote sa piniliay nga susama ni Wackie nga kwestyonable ang residency, mohimo kaha og mga lakang sila si manlalaban Sitoy sama sa ilang gihimo ni Salud nga ilang babagan ang pagduso sa Commission on Elections (Comelec) og certificate of candidacy (COC) pagka-mayor sa Cordova?
Ma seryoso, tinunto ug pagsamok-samok kining gihimo ni Salud apan nakita ang pagkatalawan sa mga Sitoy.
Hadlok sila ni Salud tungod kay adto daugon ang politika sa sugal nga masiao?
In fairness ni Salud duna siyay ikabuga kay motabang kaniya si Pambansang Kamao Manny Pacquiao.
Bahin sa isyu kun dawaton ba o dili ang COC ni Salud, gitubag kini kagahapon nila ni Provincial Election Supervisor Lionel Marco Castillano ug Cordova Election Officer Arvin Maghanoy nga ila gyung dawaton tungod kay ila kining ministerial duty ang pagdawat ubos sa Omnibus Election Code ug sa Comelec Resolution no. 9518.
Matud sa mga opisyal nga ilang ipaabot kining tanan sa ilang law department sa Comelec Manila.
In fairness sa taga-Comelec nga gihulga sa kampo ni Sitoy nga ipa-contempt sa korte kun dawaton ang COC ni Salud usa kini sa hazard sa ilang profession. Pero nasayod si Sitoy isip usa ka abogado nga wa gyuy na-contempt sa husgado basta igo rang nagtuman sa ministerial function.
Apan in fairness ni Sitoy dili mahalungkat ang pagduda nga dili gyud residente si Salud sa Cordova kay mismo si Maghanoy nga apil sa pagpahigayon og inspection miingon nga dili gyud katuhoan nga nagpuyo si Salud sa maong balay.
Atol sa inspection sa balay way daghang butang nga nakita. Ang atoa didto mga gamit sa bata. Unya dihay maong pants nga gamay ra kaayo sa lawas ni Salud ug dili iyang sukod.
Buot ipasabot nga namakak si Salud nga siya molupyo ug wa mapalig-oni ang iyang mga bakak.
* * *
Kung gihimong circus ang Comelec Manila sa mga tawong komedyante sa unang adlaw sa filing sa certificate of candidacy labaw na dinhi sa ato sa Sugbo.
Kagahapon lang dunay taga Barili unya way trabaho ang miduso sa iyang COC ug magpapili pagka-gobernador.
Siya mao si Hermelito Bulala. Wa siya magpa-interview human sa iyang pag-file.
Laing milansar pagka-gobernador mao si Roliveth “Boy” Cortes. Silang duha pulos independente.
In fairness hinuon ni Cortes nagsalig siya sa iyang apelyedo ngan si Mayor Jonas Cortes maoy nagdala karon diha sa dakbayan sa Mandaue. Tingali duna na siyay igong pundong salapi alang sa iyang pagpangampanya.
Nakaduso na sab sa iyang COC si SWU basketball coach Raul “Yayoy” Alcoseba kinsa nagtinguha nga molansar pagka Provincial Board member sa first congressional district.
Maglaum ko nga mapaspasan sa taga-Comelec ang pagdeklarar nga nuisance candidates kining mga nagpasagad sa ilang gibati nga way klaro ug nagpatuga-tuga nga way ikabuga.
Hinuon dunay mga tawo nga gusto lang gyung molansar aron kun dunay funding ang mga dagkung partido sa kaulohan mabahinan sila ug tipik kini sa ilang panginabuhi.
* * *
Pila na ka eleksyon ang milabay pero hamos, hugaw ug nagkalat lang gihapon ang buhatan sa Provincial Comelec nga anaa ra sa tugkaran sa Cebu Provincial Capitol.
Dili masabtan kay dunay mga kutay sa electrical wire nga nagkumbitay ug lupig pay octopus wiring sa mga squatter area.
Ambot kun nganong di kahatagan sa mas dignified, desente, hamugaway ug independente kining maong buhatan?
Kini tungod ba kay dunay kaikog ug naglikay sa isyu si Castillano kun mangayo siya og tabang sa provincial government?
Asa man ang budget sa ulohang buhatan sa Comelec?
Nindot unta kun matagad kining maong mga problema kay laksot kaayong paminawon nga magpabilin ang iyang pagkabati nga kanunayng bisitahon sa mga kwartahan ug impluwensyado nga mga politiko.
* * *
Congratulations sa basketball team sa Lahug Christian School nga milampos pagpildi sa mga dagku ug tag-as nga mga player/tinun-an sa Adonai.