Pagka-inutil sa Kabataan party-list

Wa ko mahimuot sa balaudnon nga House Bill No. 6330 kon “Religious Freedom in Government Offices Act nga gipangamahanan ni Kabataan party-list Rep. Raymond Palatino nga ang katuyuan mao ang  pagtangtang sa mga rebulto (religious symbols) ug pag-ban sa mga religious activities sa lain-laing mga opisina sa gobyerno.

Kining atong naandang pag-display sa mga imahen ni Señor Sto. Niño ug sa mga santos ug mga kalihukan sa atong tinuhoan sa mga government offices wa kini mahasupak sa probisyon sa freedom of religion ubos sa Section 5 sa 1987 Constitution’s Bill of Rights.

Wa man kahay mga local chief executives, mga department heads nga namugos sa ilang mga kawani nga pasudlon gyud sa Simbahang Romano  Katoliko?

Angimportante mao ang pagrespetohay  sa tagsa-tagsa ka tinuhoan kay di ra ba kini ang makapalangit sa tawo.

Kun gusto sa ubang mga relihiyon nga  magbutang ug ilang gituhoan nga Ginoo andam  kitang  mohangop niana.

Pagkadaghang isyu nga naglambigit sa mga batan-on ning  panahuna  apan  inutil  pag-address sa problema ang Kabataan party-list.

Unsa may nahimo nila sa isyu sa cyber pornography nga  naglambigit sa mga bata? Unsa may aksyon nila batok sa mga street gang? Sa fraternity violence ug bullying?

* * *

Kun way road widening ug way flyover nga tukuron sa mga gagmayng karsada nga barado sa traffic, mosamot gyud ang problema sa mga mosunod nga katuigan.

Sama pananglitan diha sa eskina Sudlon Lahug ug dalan Gorordo ma-problema gyud kita sa traffic kay  na-imbudo  nang  maong  kalsada.

Tinuud  medyo  luag  ang habig sa  Mormons nga simbahan ug habig sa may JY Square apan migamay ang kalsada diha sa Sudlon.

Tinuod man nga ang pagpalapad sa dalan maoy maayong himuon pero unsa may gihimo sa Regional Development  Council ug sa Cebu City Development Council chaired by Cebu City Mayor Michael  Rama?

Wa gani ko makadungog nga ilang  gipang-estoryahanoug sugod ang  mga apektadong nagpuyo bahin sa road widening sa maong lugar.

Kun di makaya nila ang  pakig-negotiate sa mga apektado nganong di man dawaton ang flyover nga maoy makahatag og kasamtangang  kasulbaran  sa problema sa trapiko?

Lisud gyud basta maghari ang pamulitika. Way  ayo!

* * *

Akong naobserbahan kagahapon nga  mingaw pa sa tirana dinhi sa Sugbo ang kasaulogan sa ika-151 nga adlawng natawhan sa atong nasudnong bayani  nga si Dr. Jose Protacio Rizal Mercado.

Buot nakong ipasabot nga maihap  lang sa tudlo ang naghamuom sa pagkabililhon sa iyang kinabuhi kinsa maoy nagpasiugda sa inutok  nga paagi pagrebelde sa pangagamhanan kaniadto batok sa mga Spaniards (Katsila) nga mipahimulos sa Pilipinas sulod sa 333 ka tuig.

Tungod sa iyang mga sinuwat nga duha ka novels nga “Noli Me Tangere” ug “El Filibusterismo” nga naghulagway sa  kapobre, ka ignorante, ug pagdaug-daug sa mga Pinoy ubos Spanish regime  g-akusahan siya sa  kasong rebellion ug gipa-exile kun gipugos siya pagpalayas paingon sa Dapitan sa Mindanao.

Hangtud nga gipapriso siya sa Fort Santiago ug nahukmang sad-an  sa kasong rebellion nga maoy hinungdan  nga gisentensyahan siya  og silot  kamatayon pinaagi sa “firing squad” sa Bagumbayan karon nga mao ang Luneta Park  niadtong Dec. 30,1896.

Agig dugang pakli sa kasaysayan sa iyang kinabuhi si Dr. Jose Rizal  natawo sa gamayng lungsod sa Calamba, Laguna niadtong June 19, 1861.

onse sila ka magsoon, nueve ang babaye ug usa ka lalaki nga iyang maguwang nga si Paciano. Iyang mga ginikanan mao sila si Francisco Mercado ug Teodora Alonzo kinsa niadtong mga panahona maoy nakauna sa pagbaton og panimay nga gama sa bato ug nakapanag-iya sa flour mill, drugstore ug tindahan nga nagbaligya ug lain-laing  produkto. Buot sabton wa maglisud ang pamilya sa atong national hero.

Ang kalantip sa panghuna-huna ni Dr. Rizal gibaid  sa iyang inahan kinsa usa sab ka well-educated woman diin natudloan si Dr. Rizal sa alpabeto sa edad nga 2 anyos.

Pagka 3 anyos si Dr. Rizal makamao nang mobasa sa picture book sa iyang mga igsoong babaye hangtud pagka 5 anyos makamao nang mobasa sa Bibliya.

Sa pagka-intresado ni Dr. Rizal nga makat-on  nagkat-on kini pagbasa sa mga daghang libro sa ilang  panimay ug kanunayng nag-experimento.

Sa edad nga 11 anyos gipa-eskwela si Dr. Rizal sa Ateneo de Manila nga gipadagan ug gidumala sa mga Jesuit priests. Tungod kay late siya nga na-enroll unya mubo pa gyud nga pagkabata didto siya gipalingkod sa luyo sa ilang  klase.

Apan dangtan og usa ka buwan gibutang na siya sa atubangan kay “bright” kaayo ug gani gihinganlan siya sa  iyang mga classmates og “emperor” ug halos tanang medalya sa klase iyang nakuha tungod ka lantip ug utok.

Human nakuha niya ang “highest honors” sa Ateneo mi-enroll siya sa University of Santo Tomas sa kursong medicine apan didto niya gitapos sa Madrid, Spain ang maong  kurso pagka-1885 sa edad nga 24 anyos.

Nagtuon usab si Dr. Rizal sa painting, sculpture, lain-laing languages ug uban pa nga  maoy nakapadugang sa iyang kaalam isip writer, artist, doctor, teacher, scientist, farmer, ug speaker sa 18 ka mga linguwahe.

Apan hangtud karon daghan pang mga pundok nga mi-kwestyon kun nganong si Dr. Rizal maoy giila nga national hero inay si Andress Bonifacio nga mihimog dugoong  pakigbisog batok sa mga Katsila.

Hangtud karon padayon ang debate bahin ning maong isyu ug gani wa pay gipasar nga balaud ang Kongreso pag-rekognisar ni Dr. Rizal isip nasudnong bayani. Gikinahanglan pa ba kini?

Apan in fairness daghan, ang mas moila ni Dr. Rizal kay ni Bonifacio.

In fairness sab ni Bonifacio angay sab natong hamdumon ang iyang mga natampo pagpakigbatok sa mga Español pinaagi sa paggamit og kusog.