Motabang kita sa taga Mindanao
Grabe kining trahedya sa ubang mga dapit sa Mindanao ug sa Negros Oriental.
Basi sa report kagahapon, miabot na og 500 kapin ka buok ang nakalas sa bagyong Sendong.
Pwerteng sakita gyud ilabina nga nagkaduol na ang Pasko.
Kinahanglang motabang gyud kita sa maong mga lugar kutob sa atong mahimo.
Kami sa GMA-7 ug dySS Super Radyo Cebu magpakatakos nga mangalagad pinaagi sa paglusad og relief operation alang sa mga biktima.
Alang niadtong motunol og mga hinabang, abli ang GMA-7 Complex ug dunay lugar atbang diha sa Cebu City Hall nga among gimontar.
Niadtong motunol og cash pwedeng ipaabot sa GMA Kapuso Foundation pinaagi sa Metrobank account number nga 3-098-51034-7 ug sa among account number sa BDO nga 469-0022189.
Puwede sang makatawag kamo sa among gisaligan niini nga si Kapusong Gerome Tigley sa telephone number 2320353.
* * *
Nalingaw kaayo ko nga nagsud-ong ug naminaw sa lyrics sa upat ka mga batan-on nga taga-barangay Hipodromo nga mga manaygonay nga ipaagi og rap nga gidakop sa mga pulis niadtong Sabado sa buntag.
Ang mga batan-on gidala sa among sibyaanan atol sa among programang “Dialogue on the Air” ug gipa-perform.
Sa ilang lyrics, makatandog gyud kaayo kay naghangyo sila nga tabangan silang mga bata inay abusohan.
Usa sa akong guests nga si Police Supt. Renato Dugan, deputy City Director for administration sa Mandaue City Police nakahatag og P500 sa upat ka mga batan-on kay siya mismo nasibot sa mga batan-on.
Gani, dunay mga misugyot nga mga listeners nga dili na angayng dakpon ang mga bata nga manaygon sa mga sakyanan sa kadalanan ug himoan nalang og proyektu ang mga bata aron ma-develop ang ilang talento.
* * *
Magpasalamat ko sa uban nakong mga bisita sa “Dialogue on the Air” niadtong Sabado.
Gawas kang Dugan, mitunga usab sila si Supt. Eddie Recamara, hepe sa Talisay City Police Office; Supt. Percival Zorilla, hepe sa Operations Branch sa Lapu-lapu City Police Office; Supt. Carmelo Dayon, hepe sa Police Community Relations sa Cebu City Police Office ug Supt. Teofilo Siclot deputy police director sa Cebu Provincial Police Office.
Basi sa ilang gipasalig nga bisan kuwang sila og mga pulis sa lain-laing area of responsibility, naninguha sila kutob sa ilang mahimo nga kaprotihian ang tanang katawhan niining panahon sa Pasko ilabina ang mga manimbahay matag kadlawon sa Misa De Gallo.
Ang ilang gikabalak-an kay positibo gyud ang impormasyon nga dunay pundok sa mga tulisan nga naglihok dinhi sa ato.
Mao nga ilang gidoble karon ang ilang paningkamot nga makapahigayon kanunay og checkpoint, police visibility ug pag-impound niadtong mga motor nga gituhoang sakyan sa mga tulisan.
* * *
Nagkaabot mi kagahapon sa among sibyaanan nila ni manlalaban Earl Bonachita, presidente sa Integrated Bar of the Philippines Cebu City Chapter ug manlalaban Bingo Gonzales nga maoy tigpamaba sa IBP.
Matud nila nga magpasar sila og resolusyon ugmang adlawa nga magsuporta sa panawagan nga kinahanglang atubangon ni Supreme Court Chief Justice Renato Corona ang impeachment trial.
Susama kini sa baruganan nila ni Regional Trial COurt Judge Mienrado Paredes ug sa pundok nga Cebu Coalition People Power Volunteer for Reforms nga gipangulohan ni manlalaban Mocring Barcenas.
Ang importante nga napaabot ang mensahe ngadto kang Corona nga siya ray dunay problema ug way labot ang kinatibuk-ang institusyon.
Si Corona dili maoy Korte Suprema ug ang Korte Suprema dili si Corona.
