Mike at the museum

Kadaghan nako makakita ni Mayor Rama. Kon dili sa mga party ni Joel del Prado nga iyang ig-agaw sa mga launching sa Miss Cebu. Una ko siyang nakit-an sa poetry reading sa WILA. Ug maka tulo nako nakatambong og panagtapok nga mikanta siya. Pipila na ko makatupad niyag lingkod apan mga trivial topics ra man ang hisgutan ning maong mga socials.

Niatong Huwebes pa ako nakakita niya misuguid tali sa iyang pagpadagan sa dakbayan. Didto sa Rizal Memorial Library and Museum niya gihimo ang maong pagpahayag sa media.

Sa iyang pagsulti ug pagtubag sa mga pangutana, mao kini ang akong obserbasyon:

1) Dili makatubag dayon si Mike Rama sa mga pangutna. Makatubag man siya pero mo-agi pa kini og detour. Lahi ra kini sa tinubagan sa iyang kaatbang nga si Tomas nga modiritso dayon sa punto. Ingnon ta lang nga gi-isip ni Tomas nga objective exam ang mga forum samtang gi consider kini ni Rama nga essay writing.

2) Mahilig si Rama mo gamit ug acronyms ug initials. Kon wa ka magsunod sa kalihukan sa City Hall, kapuy ug lisud sundon ang iyang gipang yawit bisan pa man og iya kining i-spell out. Tingali the mind can only process so much info at a time nga kon hungiton kinig duha ka dosena nga acronym ug initials, mapawong kini. Dili natural technocrat si Rama which is not necessarily a bad thing.

3) Ganahan mo enumerate si Rama sa mga punto nga iyang ipahayag mao nga ga sige kinig gamit ug numero. One, two, three. Magsige kinig ihap. Maka contribute kini sa kalaay sa maminaw.

4) Sama sa mga classic nga politico kusog siyang mo pikpik sa abaga. Again, this is not a bad thing. Makatabang kini pagkombinsir sa mga naa sa iyang palibot nga higala siya sa tanan.

5) Bisan pa man og dili great communicator si Rama, makakita lang gihapon ang iyang audience nga sinsiro ug seryuso siya.

6) Sa interpretation ni Rama, ang pag require og voter’s ID para makakuhag benipisyo ang usa ka Senior Citizen usas pamaagi sa vote buying. May punto ang mayor niini. Kay mura ra tuod kinig nangayo kag sukli sa imong gihatag. Unsaon naman lang ang mga senior nga masakiton nga maglisud nag lakaw paingon sa presinto para mo botar.

7) Mihisgut si Rama nga tungod sa mga gitukod nga tag-as nga building, nga ang kansang gitas-on wala pa makit-i dinhi sa ato sa una, maglisud unya ang atong fire department pag pawng sa kayo kon simbako masunog kini. Mao nga iya untang ipa-upgrade ang kagamitan sa atong mga bombero apan wa tugti sa konseho iyang budget.

8) Alang kang Rama, 3.5 billion ang gikinahanglan sa City Hall. Dinhi kuhaon ang pag abri ug pag-usab sa drainage system sa mga lugar nga kanunayng bahaon.

9) Peace and order matud pa ni Rama ang numero uno nga “challenge” para sa iyang administrasyon, ug nalipay siya nga maayo ang ilang working relationship sa atong Police Chief karon.

10) “There is no substitute for prayers” tubag pa ni Rama sa pangutana kon andam na ba kita inig usab sa hapak sa hangin nga magda na unya og grabe nga ulan sa dakbayan. Kay gawas nga di siya kalihuk tungod sa kakuwang sa budget, alang kaniya wala gyuy igong pangandam nga maka babag sa katalagman mao nga ubanan gyud nato sa pag ampo.

Kon graduhan ta ang unang “Meet the Media” ni Mike matagaan ta kinig 95% for effort ug 81% for presentation.