OYAB ta? Nayabag na

Sa wa pa tugti sa COMELEC ang pangampanya nag sigue nag suroysuoy ning Type O sa ilang pagdaginut og tiluk sa mga ginagmay nga pista sa mga suoton nga sityo.

Ug usa sa highlight sa ilang kiat mao ang singgitsinggit sa ilang kandidato pagka kongrisista sa south district ning dakbayan nga si Bebot Abellanosa. Cheer leader style kining mo syagit og “O, O, Type O gangnam style.”

Tungod sa iyang mga dagko kaayo nga poster wa na tingali wa kaila kang Abellanosa. Dunay usa sa iyang mga tarp nga atbang gyud sa among lababo. Paaugat na lang gyud hinuon ning ila kay bisag gidili ang ingon niani nga gidak-on ila gyung gipadayon. Unya adtong usang adlaw gipanngtang nila kini. Ang dagku nga poster giilisan nilag gagmay. Ang usa ka daku ilisan nilag duh aka gagmay.

Kon nakita man ang dagku kaayong poster ni Abellanosa nadunggan usab ang iyang slogan nga OYAB Ta. O for Osmena, Y for Young og AB for Abellanosa Bebot.

Daan nang medyo showbizzy kining si Abellanosa. Kon si Mike Rama mahilig mokanta og “Usahay” ug “Matud Nila,” “Balong Malalim” ug uban pang Pinoy Rock ang tirada ni Abellanosa.

Nakaingon ko sa una nga maayo sad ni da duna tay sakop sa konseho nga motukar og Juan dela Cruz. Apan karon nakuyawan nako. Kay kon modaug siya ug modaug sad si Mike, mag showdown ning duha kon kinsay concert king nilang diha. Arangarang na lang nis Mike kay binisaya may pundo ug unya kon ganahan i-jazz up ang “Usahay.” Way videoke, way banda, acapella ra.

Maayo tingalig motuon sab si Abellanosa pagkantag “Liar Evil” sa Aggressive Audio. Para dili na lang puros Juan de la Cruz ang iyang repertoire.

Pero ganahan gyud tingali nis Abellanosa og Juan dela Cruz. Kay paghuman niyag idolize sa banda ni Joey Smith nga Juan dela Cruz ang TV series napud nu Coco Martin nga Juan dela Cruz maoy gi tripingan niani.

Nalipay na unta ko kay nikuyos ang tarp nga atbang sa among lababo apan ang among gate duna na puy sticker ni Abellanosa. Sa vertical nga ariglo natung-an ang iyang sticker sa sticker nila ni Leyson ug Jun Pe. Sa iyang sticker daw gipuli ang iyang nawong sa nawong ni Coco Martin nga gadag espada. Dayon may nasulat niani nga “CoKo Congressman Ko.” Dayon sa ubos sa iyang ngan may natatak nga kontra ungo ug unga (unga, taga Manila, eleksyon lang motunga).”

Educator man ta ni si Abellanosa sama sa mga Gullas apan wa man to mohinanggaw og sama niani si Gullas. Kiat lang gyud tingay nig nawong si Abellanosa.