Dorothy ug Alice

Karong umaabot nga unang semana sa Oktubre, ang YLAC (Young Ladies Association of Charity) ning dakbayan mopasundayag sa The Wiz. Ang mo-diriher niani mao gibantog nga dictor nga si Benjie Diola.

Ang The Wiz, nga gihimuag sine niadto ni Michael Jackson ug Diana Ross, usa ka usab-asoy (retelling) sa The Wizard of Oz para paghaum niani sa Afro-American culture. Susama kini sa The West Side Story nga mipahaum sa Romeo and Juliet sa Latin-American culture.

Ang The Wizard of Oz maoy giingong American version sa Alice in Wonderland. Kay wa man gyud ko molahutay pagbasa ning duh aka libro daw nag gabasgabas ra sa akong hunahuna ang plot ug characters sa Alice in Wonderland ug The Wizard of Oz.

Usa sa dakong hinungdan sa gubot-lukot nga pagtuhog ko ning duha ka sugilanon mao ang susama nilang plot o padagan sa istorya. Puros kini kabahin sa mga dili natural/normal nga adventure sa prepubescent girls o mga batang babaye nga wala pa reglaha. Si Alice sa “Wonderlad” ug si Dorothy sa “Oz.” Mahimo tang matawag og ode to preadolescence ang maong mga libro.

Kon Freudian ka mahimo kang molantugi nga tales of sexual awakening kining duh aka sugilanon ug mahimo mong itudlo ang characters nga sila ni Scarecrow (Pahuy) ug Tin Man (Paghaw) sa “The Wiz” ug ang rabbit sa Wonderland isip phallic symbols. Pero bisan pa man niani mahimo ta gihapong subayon ang duha ka asoy gawas sa sexual context kay wala man kini ma develop nila. Ug gani maingon ta nga mas sexual awakening ang tema sa Little Red Riding Hood.

Si Alice, British, nahulog sa lungag sa rabbit ug didto nasugatan niya ang mga hayop nga daw tao ang kinaiya. Si Dorothy, American, nga didto sa sulod sa iyang panimalay dihang gisuyop ug gialsa sa tornado ang iyang balay ug gibalhin sa laing lugar diin nahimamat niya ang us aka Pahuy, Panghaw ug Lion nga daw tao usab ang kinaiya. Usa ka salbahis nga rayna ang ma kontra ni Alice samtang witch o ungo ang kontra ni Dorothy.

Puros natapos ang mga sugilanon dihang mimata o mibalik sa ilang normal nga kinabuhi ang mga batang babaye. Gipukaw si Alice sa iyang maguwang babaye kay paimnon nag tsa (tea) ug si Dorothy nimata na sulod sa iyang panimalay nga didto ra gihapon nahiluna sa Kansas.

Na publish ang Alice in Wonderland ni Charles Lutwidge Dodgson alias Lewis Carroll pagka 1865. Ang The Wizard of Oz ni L. Frank Baum pagka 1900. Miangkon si Baum nga dunay influence sa iyang trabaho ang Alice ni Carroll. Puros usab dunay mga illustration nga ang mga original nahimo na nga collectors’ item. Si John Tenniel ang ni illustrate sa libro ni Carroll ug si W. W. Denslow ang mihimo sa drawing sa una nga “Oz.”

Mihimo na og ballet ang atong Balletcenter sa Alice in Wonderland. Sa Manila karon dunay production nga mo put up sa The Wizard of Oz. Ang kang Benjie Diola nga The Wiz, unang gipasundayag sa Morris A. Mechanic heater sa Baltimore Maryland.