Japan kicks America

Samtang gi-charm ni Kobe ang Manila for eight minutes, samtang ga winery hopping si Gloria sa Bordeaux, samtang may usa ka admiral nga misugyoy nga palagputon si Noynoy, didto sa Germany gipatiran sa women’s football team sa Japan ang ilang counterpart sa America.

Mutan-aw lang kog football basta world cup ug usahay makatog pa gani atubangan sa TV kay kaadlwon man ang kasagarang duwa nila. Na interesado lang ko nianing American team sa mga babae kay kanunay man kining gi-hype sa Yahoo.

Daghan ang sidelight stories ang gihisgutan sa maong site. Lakip na niini ang ilang pag imbitar kang Barack Obama sa pagtan-aw sa ilang championship game. Ni saad man diay kuno ang ilang presidente nga si Obama nga motan-aw sa duwa sa ilang men’s football team kon masud kini sa finals. Apan kay wala man makasulod sa top four sa world cup (nga sa Africa gihimo) ang ilang men’s team mao nga wa na lang moadto si Obama. Apan karon kay finalist man ang women’s team nila nang hinaut sila nga motambong ang ilang presidente.

Wala motambong si Obama apan dariyut sila makadaug. Ug kon di pa lang igmat ang goalie sa Japan Nahimo na unta nga unang nasud ang America nga may women’s team sa football nga midaug og tulo ka world cup. Niadtong 1999 nakuha sa women’s team sa America ang ilang ika duhang world cup.

Ang goalie sa Japan nga si Ayumi Kaihori nga may gitas-on lang nga 5’7 daw naka tag-iya sa goal nga may gitas-ong 8 ft ug 24 ft ang gilapdon. Sa pinatiray usa ray nakalusot sa mga patid sa mga Americana samtang ang piangan nga goalie sa America nga si Hope Solo nalutsag ka tulo. Tabla sila sa dos-dos sa overtime mao nga sa penalty kicks gidaug ang duwa. Kanunay nga gagukod ang Japan sa duwa.

Wala pa makadaug sukad ang Japan sa America sa women’s football. Gani ka 25 na sila mapildi lakip na ang duha nila ka pildi sa warm-up games (diin puros 2-0 ang score dapig sa America). Sa ilang pagpildi sa America, ang Japan maoy unang Asian team nga midaug sa women’s world cup.

Good news kini para sa nasud sa Japan nga nagitag emotional rallying point alang sa ilang recovery gikan sa dakong tsunami nga mikalas ug 23 mil ka kinabuhi. Good news usab kini alang sa atong mga Azkals kay ang kadaugan sa Japan nagpasabot nga daku diay ang purohan sa mga taga Asia nga modaug og world cup.

Bad news kini alang sa football nga hangtud karon dili pa gihapon sikat sa America, diin ang ilang pinakasikat nga footballer imported gikan sa England ug ang kansang past time mao ang pag cheers sa Lakers ni Kobe.