‘Os-La’ maoy magdumala sa Cebu City Hall sa 2013?

Nakadawat ko og istorya sa akong mga kasaligang tinubdan nga daku gyud kaayo ang posibilidad nga Osmeña-Labella kon (Os-La) maoy makalingkod sa balay lungsod sunod tuig.

Buot ipasabot nga sila si Kongresista  Tomas Osmeña ug City Councilor Edgardo Labella maoy padag-on pagka-mayor ug pagka-bise mayor tungod sa makabungog nga suporta sa mga dagkung  negosyante dinhi sa dakbayan sa Sugbo ngadto  sa duha.

Kun tinuod man dakung hagit kini nila ni incumbent city Mayor Michael Rama ug Vice Mayor Joy Augustus Young kun unsaon nila pagkonbinse ang mga dagkung negosyante nga ilang pangahuyan sa tali-abot nga bugno sa pulitika.

Unsa sab ka tinuod nga dunay daghang  manglayat sa kampo ni Mayor Rama kun ipamugos niini nga ang iyang ig-agaw nga si Anabelle Rama nga taga-showbiz maoy padaganon pagka-kongresista sa north district?

Akong mga tinubdan  miingon nga di  gyud sila kampante nga mangampanya kang Anabelle tungod sa personalidad niini nga palaaway kaayo.

Sa politika man gud dili gyud magsilbe ang tawo kun magsige nalang og pamaghot ug panghambat.

Hinuon in fairness ni Anabelle taga-showbiz ug mga showbiz writers didto sa kaulohan maoy iyang kontra. Wa siyay kontra nga Bisaya gawas unya kang Kongresista Cutie Delmar.

Kun tudloan lang siguro si Anabelle sa iyang papel ug unsay mga limitations pwede pa siguro nga hatagan siya og konsiderasyon.

Pero unsa man gyud katinuod nga si City Traffic Operations Management Chairman Sylvan “Jack” Jakosalem maoy pambato sa Team Rama sa north district?

Una nang misugilon kanako si Chairman Jack nga lisud kaayong tumbahon sila si Kongresista Cutie ug ang amahan nga si kanhi kongresista Raul Del Mar.

* * *

Kun mahinayon man, di na ko madunggan ninyo sa akong matag gabii nga programa sa radyo sa dySS Super Radyo Cebu ug di nako makit-an ninyo sa akong “News Flash Bulletin” matag buntag sa  GMA-7 Cebu.

Apan mangayo ko og despensa nga di pa nako mabutyag ang detalye  sa laing hagit sa akong pagpanarbaho sa broadcast industry.

Kinsa man ko nga mobalibad sa bag-ong hagit ug nindot nga oportunidad nga molambo sab ko og kampante  nga mangalagad?

Ang importante nga makatabang ko sa network nga di lang sab masakripisyo ang akong pamilya.

* * *

Nakasabot ko ni Labangon Barangay Captain Victor Buendia nga misibat dayon ug wa na lang mananghid  sa among programang “Dialogue On The  Air” niadtong Sabado sa hapon dihang akong gipahibawo nga tali-abot si kanhi  kongresista  Antonio “Tony” Cuenco sa among venue sa Guadalupe Elementary School atol sa plebisito.

Si kapitan Buendia daan nang misugilon kanako nga wa gyuy tihik tihik nga mangasaba kaniya si Cuenco tungod sa iyang baruganan nga ilang bawon sa Labangon ang mga sitio apil na ang iyang gipuy-an sa Rosalina Village nga nasakop sa Guadalupe ug sa iyang aktibong    pangampanya nga supakon ang pagtukod og barangay Banawa-Englis nga buwag na sa Guadalupe.

Pun-an pa nga nasayod na daan sila nga daug gyud ang kawsa sa “No” nga supak sa pagbuak sa Guadalupe.

Insakto gyud si kapitan Buendia nga  naglungot-lungot si Cuenco kaniya ug  misugilon nga westiyonable ang iyang pagkakapitan sa Labangon ug gani gipa-estudyuhan karon sa  mga abogado ni Cuenco kun dayonon ba ang pagpa-disqualify ni Buendia kay di siya taga-Labangon.

Si Cuenco nanawagan sa iyang isig kabarangay nga magkahiusa pagbawi sa mga sitio nga giangkon nilang Buendia sa Labangon aron gyud molig-on ang iyang tinguha pagpaibot ni Buendia pagkakapitan.

May ra sab nga mi-graceful exit si kapitan Buendia kay tingaleg mahugaw ang programa kay wa sab palupig ang kapitan nga  mihingan sa unahan ni Cuenco nga usa ka   edaran nga traditional politician nga dili public servant ug ang personal interest ra gyud ang gitan-aw.

Nagtuo ko nga init gyud ang bugno sa politika sa South district.

Ang resulta sa plebisito nga sobra  katunga ang lubong sa “Yes” nagpasabot ba kadto nga maoy mahitabo sa “Team Rama” nga ilubong sab ug taga-liog sa Gaudalupe sa umaabot eleksyon?