Pwerteng hasula gyud kun ipatuman ang BRT

With all due respect ngadto sa mga proponents  niining Bus Rapid Transit (BRT) nga ipatuman dinhi sa harang dakbayan mas maayo tingaleng sigurohon nila nga dili kaayo makaapektar ug  dili makahasol sa publiko sa panahon nga sugdan na ang pag-construct niini.

Di sa ingon nga supak ko sa BRT apan mas gikinahanglan nga di gyud maputol ug di maapektahan ang patigayon dinhi sa dakbayan sa  Sugbo.

Ang mga problema nga napanglantawan mao unya ang paggrabe sa huot sa dagan sa mga sakyanan, masinati ang grabeng ka abog, mangaputol ang mga dagkung kahoy sa kadalanan, mangaputol ang linya sa kuryente, tubig,  telepono ug ubang serbisyo.

Mipasalig ang mga proponents nga temporaryo lang ang kahasol sa publiko ug kutob ra gyud sa construction period.

Pero pila man ka tuig mahuman ang proyekto? Duha ka tuig o tulo ka tuig?

Kun makaya nila og tulo ka buwan di seguro kaayo mosupak ang katawhan sa BRT.

* * *

Seryoso ko sa akong panawagan sa mga kadagkuan sa Philippine Gaming and Amusement Corporation (Pagcor) nga paabton nila og P2.8 million ang cash reward aron gyud madakpan si Pascual Urian Jr. kadtong ilang internal security guard nga misakiyo sa samang kantidad niadtong Sabado sa kadlawon.

Anhi makita kun seryoso ba gyud ang taga Pagcor pagpadakop kang Urian ug masulbad kining maong krimen.

Pagkakaron di malikayan ang mga pagduda nga kakonsabo sa maong panghitabo ang ubang mga kadagkuan sa Casino Filipino Parkmall.

Makapaduda gyud kay langay kaayo silang nakatawag ug pulis unya sa kadaghan nilang mga trabahante wa gyud nila tabangi og gukod si Urian hangtud nga nakapalayo sa ilang establisimiento.

Way plano ang satellite operations manager  nga si Mr. Renato Osmeña Jr. nga ipaubos sa lie detector test ang iyang mga sakop ilabina ang treasury officer, vault in charge ug duha ka mga teller nga on-duty niadtong  higayuna?

* * *

Lisud pag-tuis sa alegasyon nga dunay partisipasyon si Rolien Castro sa grupo  ni Junjun Cabando sa ilang pagtulis sa teller sa China bank nga nagdala ug P1.2 million aron i-deliver  sa suki nila’ng money changer nga anaa diha sa ground floor sa Robinson’s Place niadtong Setyembre sa miaging tuig.

Kun moingon si Castro nga igo ra siyang gikalagutan sa grupo ni Cabando kay siya ray nalibre niadtong ilang kaso sa Ozamis nga giatubang apan dunay  laing buhing saksi  batok kaniya.

Usa sa mga pulis nga naangol atol sa pinusilay kaniadtu nga si PO1 Elrich Catacutan positibong miila kang Rolien Castro nga maoy   usa sa mga namusil kaniya.

Dagway pa lang ni Castro ug iyang body language dili na  malalis. Kun inosente pa siya nganong nalambigit man siya sa mga tulis  kuyog sa grupo ni Cabando?

Kagahapon miduso sa korte ug mosyon ang mga abogado ni Castro nga sila si manlalaban Rameses Villagonzalo aron dili magkauban ug prisohan sila si Castro ug  Cabando diha sa Bagong Buhay Rehabilitation Kalunasan.

Si Asst. City Prosecutor Aida Sanchez miduso  na usab ug mosyon aron pag-amendar sa information sa kaso ug ipaapil na sila si Castro ug ang uyab ni Cabando nga si Merly  Lagitao. Apil sa kaso mao ang laing  kauban nga si Francis Raagas.

* * *

Pagkadaku gyud diay ang makwarta sa taga Department of Trade and Industry (DTI) dinhi sa Central Visayas kun ang tanang tag-iya sa 321,560 ka mga motorsiklo ang motuman sa pagsul-ob sa standard helmet.

Sa maong gidaghanon makakwarta ang taga-DTI ug P32,557,950.00. Kining maong kantidad ako  lang gibasi sa maong gidaghanon sa mga motor nga naggamit sa karaang helmet nga way tatak  ICC ug PS mark nga patatakan sa DTI nga pabayran ug tag P101.25 matag helmet.

Natural modoble kining maong kantidad kun atong ibutang nga matag motor dunay tagduha ka helmet.

Unya kun atong ibutang nga magbag-o ug helmet ang tanang mosakay ug motor dinhi sa Central Visayas unya kadtong mga helmet nga tag P1,500.00 kay makapasar sa DTI mobalor og P964,680,000.00 kon dul-an usa ka bilyon ka pesos ang matampo sa mga magmotor dinhi sa Central  Visayas kun estriktohon ang helmet law.

Mao ni nga di ko makabasol sa uban nga mopadayag nga pangwarta kining gihimo sa gobyerno.

Kun safety ang ilang tuyo, nganong ila gihapong gipapasar kining mga helmet nga huyang gihapon?

Nganong di man gyud nila tatakan og bag-ong sticker ang mga helmet nga daan nga wa sa  ilang listahan nga akong tan-aw lig-on  gihapon kaayo ug pulido pa ikomparar sa mga bag-ong nangabot nga ilang gipanghatagan ug ICC?

Unsay pagtuo sa taga-DTI ang ilang sticker  maoy  makalig-on sa helmet?

* * *

Naalarma ang kapolisan kagahapon sa barangay Lahug diha duol sa Metrobank kay dunay dakung tawo nga nagsige ug panirador sa mga sakyanan nga miagi.

Bisag giunsa pagbadlong wa gyud magpatuo hangtud nga dunay nangaigo ug maoy mipaalarma sa kapulisan. Ang pamilya ni Michelle Opone nga taga Banilad maoy mga biktima ug delikado kay dihay bata nga ilang  kuyog.

Dihang akong gidul-an sa akong komunikasyon ang suspect wa gyud sa maayong panimuot ug mipasabot kanako ang unang duha ka mga pulis nga nakaresponde nga lagpas kaayog tinubagan.

Mao nga nangayo sila ug back up kay medyo  mosukol gyud hangtud nga niabot ang laing  sakop sa kapulisan mao nga napugos gyud pagpasulod sa sakyanan.

Sa iyang pamayhon di gyud mailhan kay desenteng klaseng tawo ug may dagway ug daku pag lawas kay sa mga pulis.

Ambot asa kaha to siya nakasuyop?