Sinema

Naas atung atubangan apan walay labot nato ug di nato mahilabtan. Mao kini ang tanghaga sa sine. Daw gitagaan kita ug bintana sa laing kalibutan nga nag dungan pagdagan sa ato-a apan nga dili kita makalayat -sulod niani.

Ug pwera lang simbakug atakihon kag mamatay sulod sa sinehan ang kasagarang mahitabo mao nga maunag kahuman ang kalibutan nga imong gitan-aw samtang mopadayun ang imoha inig gawas nimos sinehan. Bisan pa man og ingnon ta nga dunay sequel ang maong pelikula nahuman ra gihapon ang iyang kalibutan uban sa pagsaka sa credits/ngalan sa mga naghimo ning maong pelikula. Kon duna man gani kini “part 2,” “part 3,” ug uban pa ang kining maong mga sumpay lain na usab kini nga mga kalibutan.

Tungod kini kay ang matag pelikula dunay iyahang panahon ug lugar. Usa ka panahon ug lugar nga masabtan nato nga lahi sa ato-a.

Apan unsay mahitabo kon ang atong makita sa pelikula usa ka lugar nga atong nailhan nga apil sa atong kalibutan? Makatawa kita ug makuhaan og gamay ang atong pagdawat sa kalibutan nga gitunol kanato sa pelikula.

Sa usa ka DVD-han sa Carbon nanan-aw ang mga namaligya sa maong mga disc og concert tour sa Air Supply. Kalit lang silang nangatawa ug gitudlo nila ang screen sa TV. Gipakita man gud sa maong DVD ang duha ka myembro sa Air Supply nga nagsuroysuroy sa luyo sa Carbon ug nanindug pa gyud sa tugkaran nga ubos sa maong DVD stall. Human nila’g tudlo sa TV, ilang gitudlo ang hagdanan nga padung ngadto sa tugkaran nga gitindugan sa Air Supply.

Sunod nakong nakit-an nga reality-intrusion mao kadtong sine nga Tagalog (nga kansang title nakalimtan ko na). Ang eksena mao ang ga-away nga manag-uyab sa usa ka club sa Waterfront Hotel sa Lahug. Midagan sa gawas ang babaye ug niapas ang lalake. Pagsunod eksena pwerting katawa sa mga tao kay diha naman gaginukdanay sa second Mandaue-Mactan bridge ang manag-uyab. Miantog ang usa’s nanan-aw: A! Layuag gidaganan.

Ug kagahapon nakita ako sa Le Marquis, usa ka pelikulang Frances nga sa Cebu gi-shoot. Pwerting katawas na usab sa mga nan-aw dihang miguwa sa usa ka eksena ang election posters nilang Joel Graganera ug Alvin Garcia.

Ug kon wa kamo’y lingaw karong adlawa tan-aw kamo niani sa Ayala Cinema 4. Way bayad ang maong pasundayag kabahin sa duha ka Frances nga kawatan nga nianhi’s Cebu para mangawat sa bangko.

Ang sine, alang sa kasayuran sa tanan, sa France nahimugso. Ug hangtud karon gi-isip nila nga arte ang pelikula. Segunda na lang ang pagpangwarta.

Kon kamo usa sa mga seryuso nga audience sa pelikula pahimudsi ninyo kining higayon nga gihatag sa mga Frances kanato. Ug kon mabitin kamo niani ug buot pang motan-aw ug daghang pelikula duna usay libreng pasundayang ang USC Talamban matag alas singko sa hapon kada MWF sa Audio Visual sa ilang Fine Arts building. Karong Lunes Schidler’s List ang ipasalida ug Casablanca usab inig ka Myerkules.