PO1 pa gani, abusado na kaayo

Inay kining mga batan-ong pulis maoy maningkamot sa pag-usab sa imahin sa Philippine National Police organization apan subo lang palandungon kay ang uban kanila pwerteng abusadoha na sa katungdanan.

Wa gani mag-ingon ang ubang mga karaan ug mga dagkug ranggo.

Sama niadtong usa ka PO1 Venerando Bacalso nga nadestino diha sa Mabolo Police Station ning dakbayan nga miadto lang og Minglanilla niadtong petsa 10 aron lang mangulata, mopusas, nanghingan pa og kawatan ug mihulga sa ka-live-in sa iyang paryente nga si Jake Anthony Anga didto sa Mang Inasal sa Gaisano Minglanilla.

Bisan unsaon way katungod nga manapat si PO1 Bacalso ngadto ni Jake tungod lang sa simple’ng away sa magtiayon.

Angay pa ba gud nga kulatahon si Jake ug pusasan? Grabe kaayo ang kauwaw ni Jake kay samtang gibira siya sa pulis paingon sa Minglanilla Police Station iyang suginlan ang mga tawo nga mangutana nga iyang gidakop si Jake kay kawatan.

Akoy nalooy ni Jake nga miduaw sa akong programa sa dySS Super Radyo niadtong Huwebes sa gabii nga naghilak nga miasoy sa iyang gidangatan sa mga kamot ni PO1 Bacalso.

Prangka nga pagkaistorya wa gyud ko makonbinse sa depensa ni PO1 Bacalso nga mitubag sa isyu niadtong Biyernes sa gabii sa akong programa.

Pinulis gyud ang iyang mga tubag nga nagkabunga-bunga. Miingon siya nga dili tinuod ang ang mga pasangil nga siya nangulata ug adto ra niya tubagon ang tanan sa “proper forum.”

Apan mipasabot siya nga maningkamot siya nga makig-settle ni Jake ug nagpa-luoy-luoy na ang kanahan.

Si Jake miingon nga di gyud siya moatras sa ipasakang kaso batok sa pulis bisan nga namaryente na kaniya.

Gusto niyang ipataktak sa serbisyo kay delikado kun maoy magdaghan.

Si Police Regional Office in Central Visayas Director Marcelo Garbo nimando na kang Cebu City Police Director Ramon Melvin Buenafe nga imbestigahon si PO1 Bacalso kay dili siya gusto nga palabyon kining mga isyu nga ingon ani.

Samtang ang Public Attorney’s Office kon PAO pinaagi nila ni Director Ma. G-Ree Calinawan ug OIC Cebu City PAO District Head Danilo Tenebro Jr. nag-andam na og mga kaso batok kang PO1 Bacalso nga grave misconduct, threats, illegal arrest ug ubang mga tukmang kaso.

Kining mga kabalaka karon sa pamilyang Anga sa mahitabo kanila sa pagpadayon og kiha batok sa pulis, wa koy laing mapasanginlan kun dunay dautang mahitabo kanila.

Maglaum lang ko nga di pun-an ni Bacalso ang paglapas og pagkumkom sa balaud sa iyang mga kamot kana kun tinuod siyang may gugma sa iyang profession sa pagkapulis.

* * *

Gubot pas lukot ang problema sa trapiko diha sa dakbayan sa Talisay ilabina ang paingon sa bag-ong merkado sa barangay Lagtang.

Makaingon ko nga mga inutil gyud sila si Mayor Socrates Fernandez, Vice- Mayor Alan Bucao ug ubang mga City Officials.

Ako mismo nakasaksi niadtong Sabado kun unsa kataphaw ug unsa ka-incompetent ang mga opisyales sa pagsulbad sa trapiko.

Nakapanglingo-lingo ko kay bisag apiki na ang kalsada apan daghang mga sakyanan ang gipangtugtan nga maka-parking sa isigkakilid sa kalsada.

Makapungot gyud kaayo ang sitwasyon kay dunay mga habal-habal nga gitugtan nga maka-parking duol sa Nacario Trade Center unya ang mga tricycle sayon ra kaayong maka-U-Turn ug makaagi sa national highway.

* * *

Pagka-dali ra gyud sa panahon. Di ko makatuo nga miabot na mi og 15 ka tuig nga nangalagad sa akong gipangga nga network Radyo GMA dySS.

Karong Biyernes petsa 24 maoy ika-15 na ka tuig sukad nga among gi- re launch ang dySS niadtong Feb. 24, 1997 gikan sa pagka-music station ngadto na sa drama ug news and public affairs program.

Magpasalamat lang sab mi sa tanan namong mga tigpaminaw, mga advertisers ug ma news sources sa daku kaayong natampo nga nagpabilin kaming nangalagad sa kahanginan hangtud karon.

Congratulations to us all and Happy 15th Anniversary!