Inutil na ang impeachment court

With all due respect sa atong mga senator-judges sa impeachment trial batok  kang Chief Justice Renato Corona,  wa  na magtan-aw sa public interest niining ilang pagtamod ug pag-respeto sa gipawagas nga restraining order  sa Korte Suprema.

Wa nay lami  kay dili na  mabuksan ang dollar account ni Corona.

Bisan unsaon og tuyok-tuyok,  biased ug pabor  ang ubang mga mahistrado ngadtong Corona. Unya karon gipaboran pa sa impeachment court ang SC.

Wa nay laming paminawon  kining ilang  mga diskurso nga magtamod gyud sa balaod nga nagproteher  kang Corona.

Unsaon man pagkab-ot sa tinuod niining  mga  alegasyon kun sobra  ka technical  ang impeachment court?

Kun way gitagoan si Corona, nganong di man siya moadto sa PSBank  ug sa ubang mga bangko aron ipalili ang tanan niyang mga bank accounts?

Kun magpirmi kini mas maayo pa nga bungkagon ang impeachment court. Unsa may gamit kun  magpatonto gihapon sa SC?

* * *

Makapabalaka kaayo ang akong  nadiskubrehan nga data sa Palace of Justice kagahapon kay misamot ka alarming ang pagpaanular sa kaminyoon niining mga bag-ong adlaw sa tuig 2012.

Tinuod mikunhod  gamay sa tuig 2011  ikomparar sa tuig 2010 ang mga annulment of cases apan pwerte gihapong daghana.

Si Ivay May Dinopol  in-charge sa pagdawat  sa mga petition for nullity of marriage sa korte miingon nga  labing minus  moabot og lima ka mga annulment of cases ang  ilang madawat  kada adlaw.

Dunay mga adlaw nga  moabot  og 10 ka mga kaso.

Gani atol sa pag-raffle  sa tanang mga kaso niadtong Lunes  miabot og 19  ka mga annulment of cases.

Basically ang i-rason sa asawa o bana nga ipaputol ang ilang talikala sa kaminyoon tungod sa gitawag og “psychologically incapacitated.”

Si Regional Trial Court Judge  Olegario Sarmiento nga usa sa mga naghawid og family court  mipasabot  nga ang hinungdan nga magbuwag ang  magtiayon tungod sa problema sa kwarta,  pagbudhi sa relasyon ug domestic violence.

Alang nako mas maayo ra sab nga magbuwag nung  kang  pugson unya resulta  magpatay ang magtiayon.

Pero with all due respect, ang hinungdan niining tanan mao ra gyud ang pagpataasay sa garbo sa tawo.

Gikinahanglan  gyud kaayo sa kaminyoon ang taas og pasensya.

* * *

Dili maayong palabyo ang gihimo sa taga-Argentina sa pagpangulata  ngadto ni Pinoy boxer Johnriel Casimero ug mga kauban human milampos pagpildi sa kanhi kampyon nga si Luis Lazarte.

Kun pasagdan ang salawayong insidente  hayan  maandan  kita niini.

Ang nahitabo sa kampo ni Casimero posibleng mahitabo  kini kang  Pinoy ring icon Manny Pacquiao ilabina.

Ang nakadaut sa atong taga gobyerno kay kuwang kaayo og lakang aron ipaabot unta ang mensahe nga ipakondenar sa international community ang binuhatan sa mga responsable sa kagubot.

Huyang kaayo ang mga  lakang kay di man gud si Kongresista Pacquiao ang nabiktima. Ipaimbestigar man kuno sa Games and Amusement Board ang nahitabo.

Pero unsa  may capability sa GAB sa maong insidente? Asa man si Presidente Benigno Aquino III ning  maong  isyu?

Sa akong obserbasyon wa gani makaandam ang gobyerno og klarong hero’s welcome alang kang Casimero.

* * *

Kaniadto pa, wa gyud ko mangibog niining mga social networking sites sama sa Facebook, Twitter ug uban pa tungod kay wa koy  panahon iukay ug ibasa tungod sa kadaghang trabaho.

Gani pwerteng daghana sa  basahonon sa akong inbox sa akong e-mail add  nga wa gyud nako matagad.

Misamot nga wa koy gana nga mag-establisar ug Facebook account tungod sa mga panghitabo karong bag-o nga kini giabusuhan.

Tiaw mo na nga daghan nang nagbungol samtang ang uban nagkinihaay gumikan sa Facebook kay kiat lang ang dagway pagpapublikar  sa mga istorya nga makadaot ug way hinungdan.

Ang ako lang mensahe ning uban nga dunay Facebook kay nabatasan man gyud ang pagkahimantayon mas maayo ipaagi og code name ang tawo nga libakon aron di makiha.