Himsog og dagway si kanhi presidente Gloria Macapagal-Arroyo basi sa mga mugshots nga gikuha niadtong Sabado nga akong nakit-an kagahapon sa GMA News Channel.
Taas akong kutob nga nagpasakit-sakit lang gyud ang kanhi presidente.
Nagduda ko nga gituyo nila kadtong eksena sa Ninoy Aquino International Airport aron maloko ang katawhan ug sabton na lang siya nga anha ra siya prisohon sa ospital nga ang tumong special treatment ra gihapon.
* * *
Nagkaway lami nga sundon sa publiko ang padayong husay sa kontrobersyal nga kaso batok kang Bella Ruby Santos kinsa napasanginlan sa pagdagit ug pagpatay sa 6 anyos nga batang babaye nga si Ellah Joy Pique.
Mas maayo pa niadtong miaging semana nga bista kay klaro pa ang gitug-an sa mga abogado nga ang usa sa mga batang saksi mikompirmar ug mitumbok kang Bella nga maoy midagit ni Ellah Joy.
Apan kagahapon nga bista wa gyuy lami ug wa gyuy ayo kay mimando si Judge Ester Veloso sa tanang abogado nga di motug-an namong mga sakop sa media sa resulta sa testimoniya sa batang saksi.
Si manlalaban Ramesis Villagonzalo, usa sa mga abogado ni Bella nga akong giteksan agig pangumusta sa ilang pag-conduct og cross-examination sa testigo sa prosecution mitubag nga, “Favorable kau sa dpensa, sir. No details per judge’s warning. Pasensya na.”
Wa na gyud ko makasabot ni Judge Veloso kun nganong hikawan pa ang katawhan sa kasayuran sa mga panghitabo sa ongoing trial nga unta kaming mga tigbalita nahibawo naman sa mga limitasyon.
Kun ang confidentiality rules maoy sundon, wa man magdili ang balaod nga pugngan og apil ang deklarasyon sa mga testigo sa korte.
Ang klaro nga gi-emphasize sa balaod mao ang confidentiality sa identity sa mga bata.
Unsaon man lagi paghatag og accurate reporting ngadto sa publiko kun ingon ani ang treatment diha sa atong mga husgado?
Practically wa gyud ko makasabot sa punto kay sa kaligdong sa huwes di gyud na siya magpa-impluwensya ni bisan kinsa.
Mahimo ning kataw-anan kay samtang si Judge Veloso maoy gi-designate nga tigpamaba sa korte ngadto sa media apan wa ko makadungog nga nagpatawag siya og press conference.
* * *
Mangayo kog dispensa sa akong mga tigpaminaw sa radyo dySS/RGMA matag gabii nga di pa ko mabati niining mga higayuna kay on-leave ko pagkakaron gikan niadtong Lunes.
Apan bisan on-leave ko niining mga panahuna sa akong programa sa radyo padayon ang akong panikay-sikay sa lain nakong mga gimbuhaton sama sa akong matag buntag nga news break sa GMA-7 nga mao ang “Flash Bulletin” ug kining akong lindog dinhi sa Cebu Daily News.
Magpasalamat lang sab ko sa local management sa among network nga gitugtan ko nga makabakasyon og taas-taas aron maka-relax ko og gamay panahon sa kagabhion.
Ako kining gituyo aron dili kaayo ko mabug-atan sa akong mga gimbuhaton gikan sa among kapistahan ubos sa among patron Sr. San Vicente Ferrer didto sa Casay, Dalaguete niadtong Domingo ug Lunes.
Magpasalamat na lang ko karong tuiga kay bisag gamay ra among hikay apan wa ko pakyasa ni Cebu Provincial Police Director Senior Supt. Patrocinio Comendador ug iyang pamilya.
Nakatayming ko og imbitar ni Sir Pat kay namista sab siya sa iyang maguwang nga akong maestra kaniadto nga si Ma’am Panie nga anaa na sab nagpuyo sa among lugar sa Casay human naminyo sa akong ig-agaw nga si agaw Edwin.
Nagpasalamat lang sab ko ni Padre William Ybañez nga among padre kura kay didto sab sa among payag nanihapon.
Pero pwera gaba sa patron daghang mga batan-on ang nahiubos kay way nahitabong liga sa duwang basketball nga maoy naandan matag tuig kay matud pa wa mosugot ang tag-iya sa lote nga paduwaan.
Apan si Nang Naning nga akong naistorya mipasabot nga di gyud mao ang akong nadawat nga impormasyon. Gani matud pa, andam siyang mo-donate sa lote ngadto sa kapunongan ug di gyud sa barangay kay di siya gusto nga gamiton sa pamulitika sa mga opisyales sa barangay.
Akong nakita ni Nang Naning nga seryoso siya nga motabang ug gani bisag idaran mihalad gihapon siya og sayaw uban sa iyang mga sakop sa senior citizen kay matud niya daku siyag utang kabubut-on sa mga midaug sa “Matron Queen 2011.”
Maglaum ko nga sa sunod tuig molambo pa ang Casay ubos karon sa pagduma ni Kapitan Ernesto Beceril kon “Noy Estoy.”