Gitabla pa unta ang away nilang Pacman, nindot unta

Alang nako, tabla gyud kadtong boxing rematch niadtong Domingo nilang Pambansang Kamao Manny Pacquiao ug sa Mexican boxer nga si Juan Manuel Marquez.

Bisan ako nga nakakita sa pay-per-view diha sa gym sa barangay Apas hapit nakonbinse sa sentimento sa kinabag-an nga pildi gyud si Pacman dihang akong nasaksihan ang mga solid punches ni Marquez ngadtong Pacman.

Bisan si Kapusong Allan Majait ug iyang mga kauban miingon nga pildi gyud si Pacman. Gani ang uban namong kuyog og tan-aw nanglakaw ug mibiya bisan wa pay formal announcement kay kumbinsido sila nga pildi gyud si Manny.

Ang nakaporke gud ni Marquez kay di siya agresibo sa ilang sangka nga unta maoy iyang papel isip challenger.

Kun gitabla pa lang unta sa mga mahistrado ang away, mas daghan pang makadawat kay sa migawas nga resulta nga midaug si Pacman nga nakaapektar karon sa kredibilidad sa kalibutan sa boksing.

Maayo gyud unta kun gitabla pa kadtong awaya kay mas mosulbong pa og samot ang respeto sa katawhan ug malaumon sa duha ka mga boksidor nga angayng magtakos na sab sila sa ikaupat nga higayon.

Wa nay lami nga abuton alang sa third rematch kay tingalig moabot sa punto nga di lang sila si Pacquiao og Marquez ang magkumbate sa ring. Ang buot nakong ipasabot nga mas mabalaka ko nga gubot pas lukot unya ang MGM sa Las Vegas, Nevada kun mahitabo ang laing away.

Mao kini ang nakapait sa habig ni Pacman ug sa pamilya kay mikibra gyud ang ilang garbo sa kontrobersyal nga away. Ning sitwasyuna, bisan tuod makabantal og minilyong salapi si Pacman apan di sab mabayran ug binilyon ang iyang kauwaw tungod sa daghang pagduda ug di gyud konbinsido nga siya maoy midaug.

* * *

Salamat nga mihimo karon og mga pahimangno ngadto sa publiko ang taga-Bureau of Fire Protection nga delikado gyud sa sunog karong mga panahuna tungod sa mga substandard nga mga series lights ug Christmas lights nga gipamaligya.

Ilabina kun pasagdan lang nga magburaw ug magbuntag kining mga de-kuryente nga dayan-dayan sa Pasko sa matag panimay.

Pero ang akong pangutana, nganong nakalusot man sa atong mga merkado kining mga substandard nga mga Christmas decorations nga sagad gikan sa China?

Giunsa man kini pag-inspection sa taga-Bureau of Customs? Ug sa taga-Philippine National Police Maritime?

Kun naa naman sa kamerkadohan, nganong wa man kini pangsakmita?

Unsa may gihimo sa taga-Department of Trade and Industry kon DTI? Nagtugtog sa pansitan kining atong mga ahensya sa gobyerno?

* * *

Nagpabiling tanghaga kun kinsa ang mastermind sa pag-ambush patay kang assistant Cebu City prosecutor Patrick Osorio.

Apan ang Task Force Osorio nga gipangulohan na karon ni Police Chief Insp. Romeo Santander miingon sa akong interview sa dySS Super Radyo nga ila gyung pasakaan ang utok sa krimen nga usa ka babaye bisan ang ebidensiya mao ang extra-judicial confession sa dinakpan nga si Lyndon Horandoy kinsa wa na moangkon sa iyang papel sa krimen atubangan sa husgado atol sa arraignment niadtong Lunes.

Iyang gipasabot nga ang arraignment ni Lyndon Horandoy maoy ilang gipaabot.

Miigon si Santander nga bisan mi-plead og not guilty si Horandoy wa kini magpasabot nga naguba na ang ilang tinguha paggukod sa mastermind sa krimen.

Ang importante alang ni Santander nga wa gyud nila pugsa si Horandoy pagpirma sa extra-judicial confession. Wa nila hadluka. Wa nila kulataha ug wa nila haylo-a og kuwarta.

Niboluntaryo si Horandoy sa iyang deklarasyon.

In fairness ngadtong Santander tinarong gyud ning iya pagsulbad sa mga dagkung krimen. Wa sab ko makadungog ning maong opisyal nga mo-torture og mga dinakpan aron pugson pagpaangkon.

Kun kulatado man si Horandoy sa kapulisan, ang medical certificate maoy makatubag niini. Unya di gyud modawat og mga piniriso ang Cebu Ciy Jail kun klaro sa medical nga kulatado ang dinakpan.

Manghinaut ko nga mataral gyud ang utok sa krimen aron maklaro kun unsay motibo sa pagpatay sa piskal.