Makapadismaya gyud kaayo sa hanay sa militar kining desisyon ni Presidente Noynoy Aquino nga dili siya makig-gubat batok sa mga sakop sa Moro Islamic Liberation Front (MILF) nga miihaw sa 19 ka mga sundawo didto sa Basilan.
Misamot kagara ang taga MILF-niining iresponsableng pamahayag sa presidente.
Ang akong nasabtan niining punto sa presidente mao nga ang lehitimong gobyerno sa Pilipinas mao nay moluhod ug moyukbo sa kagastuhan sa taga MILF.
Unsa may nakapa-special sa taga-MILF sa ubang katawhan sa Pilipinas nga nakahimo og krimen?
Ingon ani na gyud ka-inutil si P-Noy kay ultimo ang pagconduct og hot pursuit operations sa military batok sa mga responsable iya man gihapong gipugngan?
Unsa may gikahadlokan sa presidente? Di ba mosamot kabagsak ang ekonomiya sa nasud kun ipakita sa gobyerno ang pagkatalawan ug pagkapakyas pag-proteher sa mga negosyante?
Alang nako mas maayo gyung gubaton ning taga-MILF aron motagam sab ni sila. Human sa gubat, back to negotiating table.
* * *
Ambot kun unsay hinungdan kun nganong nausab ang desisyon nga gibuwag paglubong si Emmanuel Ponce sa iyang asawa ug mga anak?
Wa sab ko makasabot sa nahitabo niadtong Sabado atol sa paglubong ni Emmanuel sa may Queen City Memorial Gardens kay wa na patambunga si Ember Ponce ang 13-anyos nga lone survivor.
Ang nakaporke pa gyud, kay atol sa paglubong ni Emmanuel, mao say pagsibat paingon sa Sorsogon ang mga patayng lawas sa asawa nga si Melinda ug sa ilang tulo ka mga anak.
Kadtong hitaboa, makaayo ba sa 13-anyos o makapasamot na hinuon sa iyang kahimtang?
Niadtong Sabado atol sa among programang “Dialogue on the Air,” gipadayag ni Loida Maquling, social worker sa Department of Social Welfare and Development in Central Visayas nga nakigtambayayong sila sa ilang buhatan didto sa Bicol Region nga ipa-monitor ang bata.
Samtang kabahin sa nahitabong massacre, si Dr. Renato Obra kinsa maoy hepe sa Center for Behavioral Sciences sa Vicente Sotto miingon nga sa iyang obserbasyon way diperensya sa pangutok ang bana.
Matud niya nga ang hinungdan mao ang gitawag og severe depression nga ang hinungdan mao nga gi-reject siya sa iyang asawa ug ubang mga anak ug ang mga insecurities.
Si Ma. Socorro “Cora” Caca sa Couples for Christ nagkanayon nga kun duol pa siguro sa Kahitas-an ang magti-ayon ug wa sirad-i ang komunikasyon, di siguro unta mahitabo kadto.
Samtang si manlalaban Elmer Mansanadez usa ka trial lawyer ug daghag kaso nga annulment of marriage miingon nga kun midangop pa siguro si Melinda sa barangay ug sa korte aron pangayoon niya ang Barangay Protection Order ug Permanent Protection Order batok sa iyang bana, di unta mahitabo ang krimen.
Alang nako ug akong sublion nga gawas sa mga bililhong punto sa akong mga bisita niadtong Sabado, importante gyud kaayo ang painatay sa pasensya sa magtiayon ug dili magpasulabi sa garbong way hinungdan.
* * *
Nakuhaan ko og usa ka loyal ug avid fan sa akong matag gabii nga tulumanon sa dySS Super Radyo, sa akong “Flash Bulletin” sa GMA-7 ug niining akong lindog sa Cebu Daily News tungod sa subo kaayong kamatayon sa usa sa mga haligi sa academe ug akong suod nga si Ma’am Teresita Villarosa Vaño niadtong Sabado sa kadlawon.
Siya maoy principal sa Lahug Christian School – Lahug Evangelical Free Church, Inc. kinsa gihulagway sa akong mga estudyante nga usa ka buotan ug tigpatuman sa mga insaktong lagda sa eskwelahan.
Namatay siya sa sakit nga breast cancer ug paspas kaayo ang pag-deteriorate sa iyang lawas tungod kay anaa na sa Stage 3 ang iyang sakit.
Nagbangutan karon ang mga tinun-an, mga faculty members ug bisan kaming mga ginikanan niining iyang pagtaliwan.
Si Joy Lañuza, anak ni Ma’am Tessie, miingon nga sa petsa 30 ang lubong. Ang haya sa iyang patayng lawas diha sa ilang chapel ug ibalhin sa Cosmopolitan Funeral Homes Lahug inig petsa 27 (Huwebes) hangtud sa Domingo sa buntag.