Occupy
Ang atong “okupado” mas duol sa Ininglis nga “occupied” kay sa Kinatsila nga “busy.” Pero interchangeable kaayo ang Ininglis ug Kinatsila kay parehas ra man og meaning ang “What kept you occupied these days?” ug “what are you busy with these days?”
Kun ang ocupado sa Kinatsila “busy” butangan lang kinig “pre” mahimo na kining “kabalaka” kay sa ilaha ang preocupado ma-Ininglis man ngadto sa “worried.”
Na preocupado ba kaha ang mga financial institution sa kalibutan karon nga na-busy pag-occupy sa ilang tugkaran ang mga nagprotesta batok sa gitawag nilag economic inequality ug corporate greed (di makiangayong pagbahin sa bahandi ug hingakog nga padagan sa pagpatigayon)? Ang gitawag nila sa ilang kalihukan mao ang “Occupy Wall Street.”
Ang ilang poster dunay drawing sa baka kon toro sa Wall Street nga gisakyan og usa ka dancer. Usa sa ilang mga slogan mao ang “We are the 99 percent.” Nagpsabot nga ang 1 percent nga mga sapian maoy gahatag nilag kasakit ug maoy pontariya sa ilang protesta.
Nindot huna-hunaon nga ang gaawhag sa mga Kano pag-okupar sa Zuccutti Park sa New York taga-gawas. Kini mao ang Adbusters Media Foundation nga usa ka pundok sa mga aktibista nga taga-Canada. Makahimuot kini kay ang mga Kano may kasagaran nga magpasiugda sa panglubog labi na kun kabahin kini sa pagpalagput sa ilang mga diktador nga mosungay na kanila.
Una kining gilusad sa New York niadtong buwan sa Septembre dayon mikatab kini sa mga dagkong dakbayan sa America ug karon lang semanaha makit-an na sa mga lain-laing lugar sa kalibutan. Sa pagkakaron ang nangapil niani naglakip sa Denmark, Norway, Spain, Belgium, Holland, Switzerland, Italy (diin didto sa Roma ang labing violenete nga insidente), Germany, England, Sweden, China(?), South Korea, Taiwan, Japan ug Thailand.
Time pa. Way labot ang Pilipinas? Walay Occupy Makati? Walay labot ang Cebu? Hain na man ang atong mga leftist? Murag anti-government ra man gyud ni sila kutob. Di sila ka bira sa mga financial institutions.
Hinuon, asa man sab sila mang occupy og lugar sa Cebu? Sa Asiatown IT Park?
