Miss Saigon vs Pacman
Nyor Gamay (NG): Nangayabag na man ning mga pro ug anti RH bill, Nyor.
Nyor Daku (ND): Ngano man, Nyor?
NG: Si Lea Salonga—kaila kang Lea Salonga, Nyor, no?
ND: Kaila intawon kong Miss Saigon Nyor uy.
NG: Kini bas Leah Salonga Nyor ba pro-RH bill siya pero di siya mogamit og contraceptives ug gani moangkon man siya nga dunay mga contraceptives nga makadaut sa panglawas sa mga babaye.
ND: Unya?
Article continues after this advertisementNG: Samtang kinis Manny Pacquiao nga miuyon sa paggamit sa iyang asawa og contraceptive nga pill, anti-RH bill.
Article continues after this advertisementND: Unya?
NG: Unsay unya? Di ba sukwahi kaayo ilang baruganan sa ilang gipanghimo?
ND: Ug ngano man?
NG: Ayaw na ganig pabogo-bogo diha, Nyor. Kaklaro sa akong punto.
ND: Nyor, di baya ko maayo mopa-disguise. Pasabta sa kuno kog una sa problema nimong Miss Saigon?
NG: Kinis Ms Salonga nganong di man siya mogamit og contraceptives?
ND: Una, kay gusto pa siyang manganak kay usa ray ilang anak ug dako na ra ba siyag edad ug ikaduha, nakahibaw siya nga wa mauyon ang iyang lawas sa contraceptive.
NG: Unya nganong di man siya buot nga manganak ang uban? Unya nganong gusto man siyang magcontraceptive ang uban nga makadaut man diay nas lawas.
ND: Wa moingon si Leah Salonga, Nyor, uy, nga di siya buot nga manganak ang ubang babaye. Buot lang siya nga mahibawo ang mga kababayenan nga mahimong moplano kon kanus-a sila manganak o kun unsay buhaton kun di pa sila buot manganak. Ug ikaduha nakahibawo siya nga ang pill makadaut sa iyang lawas apan dili man tanang contraceptive makadaut sa tanang babaye. Buot lang niya nga ipakita ug ipasabot sa tanang mga babaye ang tanang mga sanga nga kapilian nga may kalabutan sa ilang pagkainahan. Sa ato tingaling mga kaila nga nanarbaho sa opisina di na kinahanglang pahibaw-on pa niini apan mas baga pa man gud intawon ang mga way alamag.
NG: Sa ato pa, Nyor, kasayuran maoy buot ipa-abot ni Miss Saigan sa mga Pinay?
ND: May tama ka sa bakuna!
NG: Ayaw gud og sigeg inamaw, Nyor. Unsa man say problema ni Pacquiao? Ok ra niya mo pills si Jinky nga iyang waswit pero di siya mosugot nga mo pill ang ubang mga babaye.
ND: Waswit? Pagka karaang tao ba nimo, Nyor. Sa imong tan-aw unsa man gyud nis Paquiao?
NG: Unsay unsa? Kahibaw na baya tang tanan nga si Pacman pound-for-pound king sa boxing, recording artist, movie actor, comedian sa TV ug congressman.
ND: Naa kay nakalimtan, Nyor. Ang duha ka nag ending og “O” nga maoy nagtukmod kaniya sa maong baruganan.
NG: Wa ko ka “G,” Nyor.
ND: Kana ba moderno nag gamay, naka “G” na. Ang duha ka “O” ending ni Pacquiao mao ang iyang pagka Katolik-o ug pagka politik-o. Kini gong simbahan ug politika, Nyor, mura ni silag inahan nga di buot molutas sa ilang mga bata. Kanunay nilang gipanalipdan ang ilang panon batok sa mga bag-o ug wa pa masuwayi nga panghuna-huna ug pamaagi. Para kanila, segunda na lang ang kamatuoran; ang mas importante mao ang kauyahan sa tanan. Mura ba silag inahan nga gasige og badlong—ayaw mog kaligo sa uwan kay hilantan mo! Sulod na mos balay kay ngitngit na!
NG: Mao ni imong panan-aw, Nyor? Nganong ila man sad ning gihimo? Mahadlok sila nga biyaan silas ilang panon kun maka amgo na kini?
ND: Lisud ihusgar, Nyor. Pero may punto ka. Ingnon ta lang nga kombinasyon kining maong lihuk sa motherly instinct sa institution og sa self-preservation sa status quo. Suma niadtong nadiskubrian nga ang kalibutan diay gatuyok sa adlaw ug dili nga ang adlaw gatuyok sa kalibutan, pwerteng sukua sa simbahan. Ug ingon man kadtong kasayuran nga lingin ug dili diay flat ang kalibutan, natarantar sila. Gani bag-o lang sila mideklarar nga mahimong panagang sa AIDS ang condom.
NG: Sa ato pa Nyor kining simbahan ug politika mga inahan sa kanunay nga kangitngit.
ND: Puede tambien. Amen.
