Si Bella wa magtago-tago? Wa siya kuyapi?

Kun wa pa siya magtago-tago nganong mibiya man siya sa Sugbo? Nganong wa man siya mo-surrender paglusot sa warrant of arrest?

Kun wa siya maglikay sa dakop, nganong gipamub-an man ang iyang buhok? Nganong ang mahinhin nga Bella kaniadto nga nahimong “Rayna” sa makadyot tungod sa iyang pamostura  nagpa-tomboy looking man? Nganong nagpa-tattoo man siya?

Ang iyang pagpakaaron-ingnon, dili ba panglingla sa mga otoridad nga may dalang warrant of arrest batok niya?

Nakasabot ko ni Bella kay kining iyang mga depensa karon mahug kini nga pang-damage control kay di baya tiaw ning iyang kasong giatubang.

Practically nahug nga dehado si Renante Pique amahan ni Ellah Joy kagahapon kay didto gipabalhug ni Regional Trial Court Judge Ester Veloso si Bella sa Naga City Jail.

Buot ipasabot nga misanong si Judge Veloso sa hangyo ni Bella nga adto lang sa Naga magpa-priso kay duol sa ilang panimay ug sa mga paryente taliwa nga way formal motion nga adto siya magpatanggong.

Way plano ang prosecution team nga ipabalhin si Bella sa Cebu Provincial Detention and Rehabilitation Center nga maoy tukmang prisohan aron paglikay sa special treatment diha sa Naga?
* * *

Salamat nga nagmata na gyud ang atong mga lain-laing mga Local Government Units dinhi sa Metro Cebu area apil na dinhi sa dakbayan sa Sugbo pagsulbad sa problema sa baha.

Seryoso na sila Cebu City Mayor Michael Rama ug Mandaue City Mayor Jonas Cortes paghatag og kasulbaran sa baha.

Usa sa mga paagi mao gyud ang pag-ilis na og dagkung imburnal ug ang pagpalawom sa mga kasapaan.

Naglaum ko nga molampos ang ilang mga tinguha sa pakigtambayayong sa mga negosyante nga hunit pas kusahos nga mipasira sa mga agianan sa tubig baha.
* * *

In fairness sa managsoong Peter ug Wellington Lim, ang ilang abogado nga si Oliveros Kintanar maoy mitubag sa mga pagduda nga sila maoy nagpapatay sa duha ka mga whistle-blower nga sila si Ananias Dy ug Bernard Liu.

Matud pa ni Kintanar, di na gyud angayng pasanginlan pa ang iyang mga kliyente kay matud pa dugay na kaayo kadtong pagtestigo nila ni Liu ug Dy didto sa Kongreso sa committee on dangerous drugs sa panahon nila ni kanhi kongresista Antonio Cuenco.

Miingon si Kintanar nga kun buot pa, kaniadto ra unta.

Gani, miingon si Kintanar nga gipaagi og hustisya ang tanan sa ilang mga kliyente pinaagi sa pagpasaka og mga kaso kaniadto.

Kumusta na man tuod ang pagpatay ni Liu diha sa dakbayan sa Talisay? Unsay nakadugay ni Supt. Eddie Recamara pagsulbad?
* * *

Pagka-over acting gyud niining clerk of court ni RTC Judge Sylva Paderanga sa Branch 16 nga si manlalaban Consolacion Lape kay wa gyud mosugot nga makapa-photocopy kaming mga sakop sa media sa usa ka dokumento sa kasong qualified theft batok sa kawani sa Kapitolyo nga giingong nangawat sa 35 ka sakong bugas humay.

Daghan pa siyang kuskos balungos. Iyang giingon nga di siya mosugot kay pabilin pang inosente si Antonieto Babor.

Wa gyud siya mosugot bisag amo siyang gihangyo nga mobasa na lang aron accurate ang among data.

Amo siyang gipasabot nga wa intawon namo hukming sad-an na si Babor nga maoy iyang pagtuo.

Giingnan lang mi sa kanahan ug aroganteng daku nga mananghid pa siya sa ilang daku-daku nga si manlalaban Jeoffrey Joaquino kay on-leave ilang huwes kay na-busy sa election sa Philippine
Judges Association kinsa milansar pagka-bise presidente.

Dihang way klarong tubag si Joaquino, iya na sab ming giingnan nga mananghid siya sa ilang pairing Judge nga si Judge Samuel Malazarte sa Branch 15.

Sa tanang clerks of court nga akong nailhan puwera buyag siya ray nagpalahi. Sagad diha wa may problema kay nakasabot sila sa papel sa media ilabina nga dunay public bearing ang isyu ni Babor tungod sa giingong pagpangawat og bugas.

Ambot lang kun nahibawo ba gyud si Lape sa iyang trabaho.

Usa ka huwes nga akong giistoryahan sa maong problema mitug-an nga otro sab silang mga huwes di makadali-dali og sulod diha sa kang Judge Paderanga kay matud pa morag mag-check point si Lape.

Matud niya nga OA gyud kaayo ning maong clerk of court. Kuwang sa pansin.