Nagbaha ang reklamo sa Pantawid Pamilya

Pwerteng daghana sa mga nanawag namo niadtong Sabado atol sa among programang “Dialogue on the Air” sa dySS Super Radyo nga nagtuki bahin sa “Pantawid Pamilyang Pilipino Program” ug ang “Pantawid Pasada Program.”

Daghan ang wa nako ma-accommodate pero ang sagad reklamo mao nga dunay mga dili kwalipikado nga nakaapil sa “Pantawid Pamilya.”

Gani, dunay asawa sa principal ug pulis ang naka-avail. Naabot usab ang mga reklamo nga kabanay ra sa mga politiko ang nakapahimulos.

Buot ipasabot nga inutil gyud kaayo ang taga Department of Social Welfare and Development pag-double check sa mga recipients.

Si Brigida Tampus Goron sa DSWD nga maoy Provincial Link Cebu Cluster sa 4Ps mipasabot ug miangkon nga nalutsan gyud ang gobyerno sa mga dili kwalipikado kay atol sa survey may nangilad sa tinuod nga kahimtang sa ilang panginabuhi.

Ang opisyal sa DSWD mipasalig sa tanan nga andam silang modawat og mga reklamo batok niadtong naapil sa programa nga dili kwalipikado kay dili sila magpanuko sa pagkanselar.

Si Wennie Badayos chairman sa Ama Sugbo KMU nagkanayon nga natinga usab sila sa pangagamhanan karon ni Presidente Noynoy Aquino kay gipadayon kining maong programa ni kanhi presidente Arroyo nga source sa corruption.

Sa ilang pag-monitor ni Badayos, kompirmado kining gigamit sa mga politiko.

In fairness, insakto kaayo si Badayos nga miingon nga ang maayong himuon sa gobyerno mao nga hatagan gyud og maayong trabaho ang tanang katawhan ug sweldohan og dagku aron dunay alibyo sa panginabuhi.

Samtang sa “Pantawid Pasada Program” gipadayag ni Badayos nga usa lang gyud kini ka “Band Aid solution” sa kawad-on sa mga PUJ drivers ug sa mga tricycle drivers.

Pero si Director Ahmed Cuizon sa Land Transportation Franchising and Regulatory Board (LTFRB) nagkanayon nga maayo na lang kini nga dunay matabang ang gobyerno ngadto sa mga drivers.

Nanghinaut si Director Cuizon nga malugwayan kining maong programa sa Aquino administration kay gisunod kini karon sa nasud sa Indonesia.

Karong unang semana maoy gitakda nila nga mang-apod-apod na ngadto sa mga drivers sa “Pantawid Pasada Card.”

* * *

Niadtong miaging semana, misuway ko pagsubay sa pinuy-anan sa kontrobersiyal nga trabahante sa Kapitolyo nga si Prison Guard 1 Antonieto Babor nga giingong nangawat ug mipalusot sa 35 ka sakong bugas (NFA rice) diha sa Cebu Provincial Detention and Rehabilitation Center (CPDRC).

Ang uban niyang mga silingan sa Veterans Village sa barangay Kalunasan miingon nga sukad mibuto ang isyu, wa na makit-i nila si Babor ug gituhoang miuli sa Negros kay nauwaw sa nahitabo.

Apan dunay usa ka silingan nilang Babor nga mitug-an kanako nga anaa ra siya sa ilang panimay kay makit-an nila sa bintana.

Miingon ang silingan nga sa wa pa mobuto ang kawat sa 35 ka sako makit-an nila si Babor nga mag-diskarga gyud og duha ngadto sa tulo ka sakong bugas duol sa iyang bay.

Gani matud pa dunay mga silingan nga nakapalit og sinako nga bugas sa NFA gikan kang Babor.

Samtang iyang mga kaubang Prison Guard sa CPDRC natinga kang Babor kay pwerteng estriktoha isip maoy in-charge sa ilang armory. Matud pa di gyud magpasagad og isyu og armas ngadto sa iyang mga kauban.

Wa na sab magpakita kanila si Babor sukad nga gipahamtangan og suspension.

Pagkanindot unta kun ibutyag ni Babor kun kinsay utok sa palusot ug kadtong mga kakonsabo niya sa pangawat aron dili ra siyay masikwate.

* * *

Naluoy ko nga nagkatawa ni Talisay City Mayor Socrates Fernandez samtang naningkamot nga mapabuhian dayon iyang sinagop nga si Joavan niadtong Huwebes sa gabii gikan nga gidakop pagkahapon sa Palace of Justice.

Ang iyang pag-antos ni Joavan lupig pay tinuod nga amahan .

Gipa-undayonan gyud ni Brod Soc nga si Joavan maoy gipas-an niyang cross sa iyang kinabuhi.

Maglaum na lang ko ni Joavan nga mausab ug iyang tumanon iyang mga saad nga di magpabadlong.

Niadtong Biyernes sa buntag nanakod ang batasan ni Mayor Soc ngadto ni Joavan kay dihang nanaug na siya gikan sa sala ni MTCC Judge Pamela Baring Uy gikan nga gi-release, nagpaabot kanako ug miagbay og nangayog despensa sa iyang mga negatibong isyu.

Mipabuhagay si Joavan kanako nga kaming mga sakop sa media igo rang mobalita sa iyang mga negatibong isyu apan dili maapil ang iyang mga maayong binuhatan.

Pagkanindot kun tinuod iyang gipanulti nga duna na siyay gihimong mga kaayuhan.