Way rason nga biyaan ang Palace of Justice

Magpasalamat ko kang Cebu City Engineer Kenneth Carmelita Enriquez kinsa mao sab ang officer in charge sa Office of the Building Official sa iyang ligdong og lanog nga baruganan nga “fit for occupancy” pa ang Marcelo Fernan Hall of Justice, atol sa among programang “Dialogue On The Air” sa dySS Super Radyo niadtong Sabado.
Tungod sa iyang expert opinion, nagpalig-on ang akong baruganan nga puwede gyung okupahan ang Hall of Justice nga di kinahanglang mag-usik-usik og kuwarta ang Korte Suprema ug ang Department of Justice (DOJ) pag-abang og laing mga building sama sa Quimonda building nga mas dagko pa og mga liki.
In fairness diay ni Enriquez, nakahimo na sila og tulo ka managlahing inspection sa korte ug iyang gibarugan nga dili gyud malusno ang building gumikan sa kalig-on ilabina nga way crack ug wa moburot ang mga haligi ug beam.
Matud ni Enriquez sa among programa , aron segurado ug way risgo puwedeng tiwason og guba ang mga bong-bong nga dagko ug liki unya ilisan lang og plywood.
Si Enriquez midugang nga samtang trabahoon ang pag-retrofit sa 3rd ug 4th floor sa Palace of Justice, puwedeng magpadayon ang pag-opisina sa ground floor ug sa 2nd floor.
Samtang iyang gipasabot nga dakong sayop ang punto ni Executive Judge Soliver Peras nga miingon nga mananghid pa silang taga-OBO sa Korte Suprema kun mohimo og re-assessment ug re-inspection tungod kay ilang gahum ang pagsubay sa mga building nga gituhoang naghatag og peligro sa katawhan human sa linog.
Gani matud niya nga puwede nilang ipaguba ug ipatangtang ang mga parte sa building nga kalusnoon human milapas ang 15 ka adlaw gikan sa pagkahitabo sa linog nga wa mohimo og lakang ang tag-iya sa pagpatangtang.
Mao nga nanawagan si Enriquez kang Judge Peras nga morespeto sa ilang trabaho ug nanghinaut nga dili na sila hinginlan ugma sa hapon nga moanha sa korte.
Si kanhi Executive Judge Meinrado Paredes nga mitambong usab sa maong programa misaad kang Enriquez nga siya maoy mangunay og escort nilang Enriquez nga mopadayon sa pag-inspection sa building.
Tambungan usab nila ni manlalaban Alex Tolentino sa Integrated Bar of the Philippines (IBP), Provincial Prosecutor Pepita Jane Petralba, Asst. Cebu City Prosecutor Ghandi Truya ug Public Attorney’s Office lawyer Cesar Gariando.
Lakip sa mosuporta sa re-inspection mao ang mga court personnel nga supak gyud nga mobalhin sa Quimonda building sumaa pa sa Clerk of Court sa Municipal Trial Court In Cities nga si Josephine Teves.
Sila si Prosecutors Petralba ug Truya mipadayag sa ilang kalipay sa opinion ni Enriquez ug alang kanila dako kaayo kini og ikatabang sa DOJ nga magdaginot nga dili na kinahanglang mo-renew sa kontrata sa tag-iya sa building sa may down town area nga nag-abang sila ug 270 mil pesos matag buwan. Mao sab kini ang gipadayag sa taga-Public Attorney’s Office.
Bisan sila si Judge Paredes ug manlalaban Tolentino posibleng mopasabot og dugang kang Chief Justice Ma. Lourdes Sereno pinaagi sa suwat unya nga dili na kinahanglang mobalhin sa Quimonda ug tabangan nalang og ayom-ayom sa labing daling panahon ang Palace of Justice kay andam sab motabang sa gasto ang DOJ ug ingon man ang Cebu city government pinaagi kang Cebu City Councilor Sisinio “Bebs” Andales.
Ang mga huwes nga misupak sa pagbalhin sa Quimonda pulos nahingangha niining mando ni Court Administrator Midas Marquez nga sila pabalhinon dayon taliwa nga way contract of lease.
Mao nga nanggawas kining mga espekulasyon karon nga dunay nangomisyon sa P1 million matag buwan nga abangan sa Supreme Court sa Quimonda.
Kagahapon nga maoy tangkod duha ka buwan sa nahitabong linog, nganong hangtud karon wa man gyud mopakita si Chief Justice Ma. Lourdes Sereno dinhi sa Sugbo aron kumustahon iyang mga sakop?
Wa kahay hocus-pocus ang pag-negotiate sa management sa Quimonda?
Nganong iinsister man gyud ang pagbalhin sa Quimonda nga gasto man kaayo og wa pay kontrata ug gisupak pa gyud sa kadaghanan?
Sayon na karon nga makapagawas og kuwarta ang Supreme Court kay dunay paabuton nga komisyon?
* * *
Milugmaw sab akong mga mata niadtong Sabado sa buntag dihang mireport si Super Renan Alangilan sa ilang nasaksihan didto sa mga lungsod sa northern Cebu nga dunay daghang mga tawo nga anaa daplin sa kalsada nga nangayo sa ilang dala nga mga relief goods nga alang sa usa sa mga lugar sa Daanbantayan.
Kadto maoy timailhan nga daghan pang nagpanghamoy sa tudlo nga nagkinahanglan sa atong mga tabang niining mga higayona.
Mao bitaw nga kami sa GMA-7 ug dySS Super Radyo nagpadayon among “Operation Bayanihan” aron makatabang kita sa mga agakonon pa kaayo.
Laing butang nga among naestablisar didto sa Daanbantayan mao nga wa gyud intawon sila didto makatilaw og mga pagkaon nga hinabang gikan sa ubang kanasuran.
Kay matud pa sa usa sa among na-interview nga si Carmel Morascallo nga ang ilang nadawat mao ra gyud ang baho nga bugas sa National Food Authority ug ang mga de lata nga gama sa Pilipinas.
Gawas sa Daanbantayan ang ubang mga residente sa Leyte susama sab ang gitug-an.
Asa man diay paingon ang mga hinabang gikan sa gawas nga gipang-repack sa taga-Department of Social Welfare and Development kon DSWD?
Samtang misubay ang taga-United Nations, unsa may gihimo sa Ombudsman?
Kun gipangawat man ang mga relief goods nga gikan sa lain-laing mga nasud sa taga-DSWD, mas grabe pa kini sa binuhatan niadtong trabahante sa canteen sa Kapitolyo nga si Nessie Torralba nga nasakpan sa closed circuit television camera.
Pero in fairness ni Torralba, midangop intawon sa akong programa sa dySS niadtong Miyerkules sa gabii og nagpakaulaw nga miangkon sa krimen ug nanawagan kang Gov. Hilario Davide III nga pasayloon na lang siya ug dili na kasohan kay nahimo niya kadto tungod sa kagutom na gyud sa pamilya.
Pero ambot lang kun pasayloon ba ni Gov kinsa miingon nga ipatigbabaw gyud ang balaud.
Apan kun nakapasaylo kita sa taga-Tacloban nga mihimo og looting, way rason nga dili kita makapasaylo sa atong silingan kinsa nag-ilaid sa tumang kakabus.
Pagkatig-a na gyud nato og balatian nga di kita makapasaylo. Pasko tawon ron!