May mga paltos atong mga bombero

Nagkagidlay ang atong kabomberohan kagahapon sa sunog nga miigo sa mga panimay ug sa puy-anan sa mga abandoned children diha sa Department of Social Welfare and Development in Central Visayas kon DSWD-7 sa barangay Carreta ning dakbayan.

Nakapanghupaw ko kay hutdan og tubig ang atong mga bombero bisag kusog pa ang kayo.

Apan matud pa ni Mayor Michael Rama nga problema kadto sa Metro Cebu Water District kon MCWD.

Dunay eksena nga makapungot kay ang tubig nga gikan sa water tanker nagpasad lang sa tubig kay sayop ang koneksiyon sa hose.

Duna say nahitabo nga ang kusog nga pressure sa tubig paingon sa mga tawo kay naablihan ang valve nga way hose.

Si Mayor Rama mitumbok nga ang laing problema mao ang kagagmay sa dalan sa luyo.

Nagkinahanglan gyud gihapon ang atong mga fire fighter og training.

* * *

Niadtong Lunes, mipagawas og memorandum si Supreme Court Administrator Jose Midas Marquez nga nagmando sa mga huwes ug mga court personnel nga mobalhin dayon sa labing daling panahon didto sa Quimonda building sa may North Reclamation Area.

Apan ang mayoriya sa mga huwes ug mga kawani supak gyud niini suma pa ni kanhi executive Judge Mienrado Paredes tungod kay mas dagko og liki ang Quimonda kay sa building sa Marcelo Fernan Hall of Justice.

Si Regional Trial Court Judge Sylva Paderanga nagpadala og komunikasyon sa tanang mga huwes alang sa pakig-dialogue nilang mga huwes ug mga kawani sa korte aron hisgotan ang isyu ug ubang mga problema sa ilang pagbalhin ug mga pagkulang.

Gipasabot ni Judge Paderanga nga wa silay supak nga mamalhin didto apan ang nakaporke dili pa kompleto didto ug risgo pa alang kanila kay wa pa ayoha ang mga liki sa building.

Si manlalaban Consolacion Lape branch clerk of court ni Judge Paderanga miingon nga unahon gyud ang ilang safety samtang manarbaho. Nagpakita siya sa mga pictures nga iyang kinuha sa mga dakong crack sa Quimonda.

Nahadlok ug gingislian sila didto kay tingalig mangabangga sila sa mga dagkung truck de karga nga kusog kaayo nga magbahas-bahas sa ilang labngan nga kalsada.

* * *

Subo kaayong palandungon nga dunay daghang mga negosyante nga nagpahimulos sa higayon human sa bagyong “Yolanda”.

Wa motuman sa freeze order sa Department of Trade and Industry o DTI nga nagmando kanila nga dili mopausbaw sa presyo sa mga palaliton.

Ang freeze order subay sa deklarasyon ni Presidente Benigno Aquino III nga ubos kita sa national calamity.

Kagahapon gikompirmar ni Director Asteria Caberte nga dinhi sa Central Visayas dunay 58 ka mga violators ang ilang nasakpan ug sigurado nga ilang himoan og aksyon.

Sa akong programa sa radyo sa dySS, nakadawat ko og mga text messages gikan sa mga residente sa Ormoc batok sa taga-DTI kay matud pa, wa mag-monitor sa mga negosyante nga nagpausbaw sa presyo sa mga palitonon.

Gawas niini, dunay mga reklamo nga daghang baligya nga anaa sa “black market” diha sa Ormoc.

Si Director Caberte mipasalig nga iyang ipaabot kining maong mga reklamo sa iyang counterpart nga DTI director sa Eastern Visayas atol sa ilang tigum karong adlawa nga niadto pang Lunes naka-asumer pagbalik sa katungdanan sa Tacloban.

Maglaum ko nga di matulog sa pansitan ang taga-DTI niining mga reklamo.

* * *

Nasayop lang gyud og depensa ang trabahante sa canteen sa Kapitolyo nga si Messie Torralba nga nasakpan sa CCTV camera sa iyang pagpanguha og mga relief goods.

Kun niangkon pa dayon siya ug nangatarungan nga iya kadtong gihimo tungod kay mihunong na ang taga-Kapitolyo sa pagpanghatag og relief goods, mas alegre pa unta.

Unsaon man nga natuk-an man dihang wa na siyay ika-depensa dihang gipakita sa CCTV cam ni Loy Madrigal.

Dili sa ingon nga akong gi-tolerate ang gihimo ni Torralba apan alang nako, mas maayong pasayloon siya ni Gov. Hilario Davide III. Gamay ra kaayo kanang gihimo ni Torralba ikomparar sa uban nga nanago sa mga hinabang gikan sa ubang kanasuran.

Maghatag sab kini og leksiyon niadtong uban nga di gyud mokompiyansa sa bisan asang lugara kay high-tech na gyud karon.

Pero ang maayo gyud unta nga likayan ang pagpanghilabot sa butang nga dili ato bisan unsa kagamay kay ikapungot kana sa atong Magbubuhat.

Makonsensiya pod unta ta uy kay kanang mga pagkaon alang kana intawn sa mga nagpanghamoy sa tudlo nga hangtud karon agakonon pa kaayo.