Presidente Noynoy, way salig sa kaugalingon?
Wa ko makasabot ni Presidente Benigno Aquino III kun nganong mitugyan pa og laing tawo nga maoy mangulo sa rehabilitation efforts aron makabangon pagbalik ang mga biktima sa bagyong Yolanda ilabina ang taga-Tacloban.
Way salig sa kaugalingon ang Presidente nga makasulbad sa problema? O ba kaha naglikay siya nga masabit kun mapalpak si kanhi senador Panfilo Lacson nga maoy iyang gitudlo nga “rehabilitation czar” sa multi-billion peso recovery project?
Nagtuo ko nga kining pagpasa ni P-Noy ngadtong Lacson maoy nagpalig-on sa kamatuoran sa iyang pagkainutil pagsulbad sa dakong trahedya sa nasud.
In fairness hinuon kang Lacson, nga midawat sa responsibilidad, wa mag-atubang og kontrobersiya sa corruption.
Niining pagkatudlo ni Lacson, wa kaha mahiubos ang mga alipores ni P-Noy nga mga ambisyosong dagko sama kang Local Government Secretary Mar Roxas?
Ako na lang paabuton ang higayon nga inig magkaduol na ang 2016 presidential election sila si Lacson ug Roxas maoy pilian ubos sa Liberal Party kun kinsa kanila ang himoong standard bearer.
Suportado ra ba si Ping sa mga negosyante kay dako sab og kompiyansa kaniya kay usa sa mga tarong ug ligdong nga opisyal.
* * *
Nagkatawa ko sa akong mga amigo nga mga trabahante sa Kapitolyo nga mikomentaryo sa apelasyon ni Gov. Hilario Davide III nga pahatagon silag bisan usa lang kapanid nga sin ngadto sa mga biktima sa bagyong Yolanda.
Ang usa miingon nga bisan pa og duha kay duna siyay mga paryente sa norte. Ang laing trabahante nga dugay nakatingog miingon nga iyang unahon pagpangita iyang mga atop nga nilupad kay otro diay siyang biktima. Ug ang ikatulo lawm kaayog panghupaw ug dayong kwenta sa iyang mga utang nga bayranan kay nakasaad nga mobayad sa dili pa ang Pasko ug siya naglaum nga dako-dakoon ni Governor Junjun ang ilang bonus kay bisan pa og mohatag sila og lima kapanid.
Makasabot gyud ko sa mga empleyado sa Kapitolyo ug sa bisan asang ahensiya sa gobyerno ilabina niadtong daghang sakop sa pamilya.
Sama sa ubang mga trabahante, nangindahay nga duna gyuy Christmas bonus bahalag kanselado ang party aron makabayad sa mga obligasyon unya ang sobra saw-an sa pamilya ug mopaabot og hinabang sa mga biktima.
Dili na lang ta magminaot nga dako kaayog ikatampo ang bonus aron motabang kita sa mga nanginahanglan.
* * *
Tinuod, daghan gyung panghadlok karong mga panahona nga ipa-agi ug text sama sa kusog nga linog kuno nga moigo unta niadtong Sabado ug kining pagkatap sa mga piniriso gikan sa Tacloban diha sa northern Cebu ug sa Camotes Island.
Nagpusot-pusot ang mga text messages ug tawag sa telepono nga akong nadawat bahin niini.
Bahin sa linog dali nakong gikondenar nga binuang gyud kaayo kay wa pay ekipos nga maka-detect sa taliabot nga linog samtang bahin sa mga pugante akong gipa-double check sa atong mga counterpart apan negatibo.
Pero alang nako dili siguro ta angayng mabalaka sa mga pugante kay taw sab na sila. Dili man garantiya nga makahimo og laing krimen ang usa ka criminal bisag gikan sa prisohan.
Maayo sab tingali nga sayron sa tanan nga kitang mga tawo nga sakop sa community usa sa mga haligi sa five pillars sa atong criminal justice system. Ang buot ipasabot nako mao nga duna tay social obligation pagdawat og balik sa mga piniriso aron makabalik sila sa normal nga kinabuhi sa mainstream society.
Akong tambag sa mga kabanay nga masak-an sa mga pugante dili angayng malisang ug mahadlok.
Ang maayong himoon tratahon og tarong unya pakan-on, hatagan og sinina unya istoryahan. Kun makaya pa konbinsihon nga motahan sa mga awtoridad.
Sayop gyud kaayo nga mag-panic ang mga residente sa ilang gituhoan nga mga escapee.
Kalma lang gud! Unya og di kaya, pwedeng motawag dayon og police assistance.
