Safe ug fit pa for occupancy ang Palace of Justice

With all due respect, kiat lang dagway nilang Cebu City Mayor Michael Rama ingon man ang taga-Office of the Building Official (OBO) ug mga structural engineers nga mideklarar nga “unsafe” ug “unfit” ang building sa Cebu City Palace of Justice.

Dili tanang lawak ug opisina sa Palace of Justice ang naapektohan sa linog nga mitala ug 7.2 magnitude didto sa Bohol niadtong Oct. 15, 2013.

Bisag dagko pa ang liki sa mga bongbong apan way timailhan nga mahulpa ang building kay akong naobserbahan nga bisag gitay-og siya og kusog nga mga aftershocks apan mao lang gihapon ang danyos.

General kaayo ang findings sa taga-OBO. Nagtuo ko nga mugna lang sa tira-pasagad nga trabaho ug resulta sa dinali-dali ug taphaw nga inspection. Nagparehas lang sa mga technical personnel sa Korte Suprema.

Dili gyud comprehensive ang inspection sa giingong mga eksperto niadtong higayona kay wa gani ablihi ug wa sudla ang tanang sala.

Dili ko makabasol sa mga huwes ug sa tanang nag-okupar sa Palace of Justice nga nabalaka sa sinugdanan kay findings gud sa mga batid kuno.

Sukad pa gyud kaniadto, hugtanon na akong baruganan nga ang angayng ayohon mao ra gyud ang 4th floor sa Palace of Justice ug dili tanan.

Sa akong pagpakisayod sa mga civil engineers, mamiligro lang ang usa ka building nga matumpag kun ang mga haligi ug mga “beam” niburot ug dunay dagkong liki. Apan sa kaso sa edipisyo sa korte way bisan usa nga naliki ug niburot. Buot ipasabot nga lig-on gyud ang building.

Sa tira-pasagad nga findings daghan kaayong nahasol. Pero mabasol sab sila si Chief Justice Ma. Lourdes Sereno, Court Administrator Jose Midas Marquez ug uban pang dagko sa korte kay wa gyud maningkamot nga mokuha og second opinion sa ubang mga eksperto.

Karon pwerteng hasola sa mga huwes, mga piskal ug sa tanang nag-okupar kay naglumba sa pagpanghipos sa mga dagkong butang aron mamalhin sa way klarong balhinanan.

Tungod nga way klaro ang ilang balhinan, napugos intawon pagmontar ug tent nga busloton sa gawas ug duol sa building. Ang ilang mga tent maguwang lang sa mga naninda og pungko-pungko.

Ang epekto niini, mangabasa sila sa uwan ug simbako mahitabo ang ilang gikabalak-an nga mahugno ang building siguradong igo sila sa mga debris.

Alang nako, mas maayo pa nga mobalik atong mga huwes sa Regional Trial Court ug ubang mga okupante sa ground floor, 2nd floor ug sa 3rd floor kay wa gyuy rason nga sila marisgo.

Unya samtang i-retrofit ang 4th floor, magpabilin ang taga Metropolitan Trial Court in Cities (MTCC) sa ilang giokupahan karon nga medyo luwas diha sa may parking area aron gamay ra ang gasto sa Korte Suprema ug way hasol nga magbalhin-balhin.

Puwede man gani nga manghangyo ang taga MTCC nga mogamit sila sa mga sala sa RTC sa panahon nga mabakante.

Akong naobserbahan nga nagkagidlay gyud ang Korte Suprema pagpangita og kuwarta nga ipaayo sa tibuok building pun-an pa nga na- washout ang mga korte sa Tacloban.

Tiyabaw man gani sa bayranan sa pagpa-connect og kuryente sa building nga balhinan.

Pamalik mo uy, aron way gasto!

* * *

Kun tinuod nga astig ug bagsik si Philippine Drug Enforcement Agency in Central Visayas (PDEA-7) Deputy Director Esperidion Javier Jr. daghan untang mga druglord ang iyang nadakpan.

Akong tan-aw, nag-ayo lang sa hambog ug barug ning maong opisyal kinsa nanghagit ug pinusilay sa among kauban nga reporter sa dySS Super Radyo nga si Guam Logronio.

Puwera gaba ning performance sa PDEA-7 sa ilang pagpanakop. Mga galamay ray nadakpan. Taud-taud na ang pagkatukod sa PDEA apan wa gyud silay mga major operations.

Magduda lang ta niining mga kanahan nga gipangtingal na sa mga dagkong druglord.

Kung tinuod man kadtong ilang akusasyon nga dunay mga pulis nga protector nganong wa man sila makadakop og pulis?

Mopakpak pa ko unta nilang Javier kun milampos pa sila pag-ronda sa usa ka National Bureau of Investigation asset.

* * *

Karong bisperas sa Pasko (Dec. 24), molingkod gyud sa katungdanan pagkamayor sa Ginatilan si Ma. Liza Toledo kana kung dili makakuha og restraining order o status quo order si Mayor Dean Michael Singco.

Ugma (Dec. 3) sigun pa ni Toledo sa akong interview, nga i-serve na ang writ of execution ni Oslob Regional Trial Court Judge Jimalaluan aron pabakantihan nila ni Mayor Singco ang munisipyo.

Apan gipasabot ni Toledo nga dili dayon sila manglingkod ugma ug ilang paaboton ang 20 ka adlaw. Sa ika-21 diyas, kung way TRO, mapugos sila pag-asumer.

Si Mayor Singco nga una nakong nahinabi, mipasabot nga igo ra silang motuman sa “rule of law” ug mipasalig nga mopatigbabaw gyud ang kalinaw sa ilang lungsod.

Bisan si Toledo mipasalig usab nga way mahitabong kagubot ug andam motuman sa mga lagda human nga midaug sila sa protesta sa korte.

Maglaum ko nga matuman ang saad sa duha ka mga mayor sa Ginatilan.