Usa ka inahan sa rape victim maoy mastermind?

Sa imbestigasyon nila ni Chief Insp. Romeo Santander human nadakpan si Lyndon Horandoy  kinsa giingong triggerman sa pag-ambush  patay  kang  assistant Cebu City Prosecutor Patrick Osorio, nakuha sa kapulisan  ang impormasyon nga babaye ang utok sa krimen.

Usa ka kasaligang tinubdan nagbutyag  nga ang babaye nga giingong mastermind nasuko na pag-ayo tungod kay daku na siyag gasto sa kaso.

Apan wa pa mabutyag kun unsay hinungdan nga daku siyag  gasto sa kasong rape sa iyang anak.

Si Regional State Prosecutor Fernando Gubalane mikompirmar nga dunay kaso kaniadto nga rape nga si piskal Osorio maoy nag-prosecute.

Apan matud pa ni Gubalane, kun may kalambigitan man sa pangwarta iyang gipasabot nga makadaghan nang higayon nga gamiton ang pangan sa mga piskal ug mga huwes sa racket sa ubang tawo.

Niadtong Sabado sa gabii, akong na-interview si manlalaban Jesus Osorio, amahan ni piskal  Patrick ug  iyang giklaro nga andam silang motabang sa kapolisan kun dunay mastermind nga itaral.

Apan matud  niya nga kinahanglang subayon og tarong kun kinsa man kay  hangtud karon, dili pa siya konbinsido sa giingong mastermind.

Si manlalaban Osorio nga nakakita sa picture miingon nga dili sab niya kabisado ang litrato  sa babaye.

Nanghinaut siya nga tarungon gyud sa kapulisan ang pag-imbistigar aron way palpak.

Wa  niya  igsapayan kun nag-usab-usab  man si Lyndon Horandoy sa iyang mga pamahayag kinsa mibakwi karong bag-o og miklaro nga dili siya maoy nagpusil  sa piskal kun dili ang unang nadakpan nga si Allan Sinogat.

Ang importante  alang sa kabanayng Osorio nga wa matuis ang kamatuoran nga niangkon kini nga apil siya sa krimen isip maoy nagdrive sa motorsiklo uban kang Sinogat.

Naglaum ko nga masulbad na sa hingpit kining maong kaso aron kahatagan og hustisya  si piskal Patrick.

* * *

Wa gyud matuis ang baruganan nila ni Department of Interior and Local Government in Central Visayas Director  Pedro Noval  ug LTO-7  Director Raul Aguilos nga pangdakpon kadtong mga dump truck nga  magkarga og mga tawo human nahitabo ang dakung trahedya didto sa lungsod sa Barili diin 12 ang namatay ug daghang nangaangol.

Bisan misupak  niini ang mga mayor ug bisan si Gov. Gwen Garcia, gipasabot ni Noval nga risgo gyud kaayo ang pagpasakay sa mga dump truck.

Si Director Noval mipasabot atol sa among programang “Dialogue on the  Air” niadtong Sabado nga kinahanglang mangita og paagi ang mga local chief executives nga makahatag og sakyanan nga mas luwas sakyan.

Si Armando Bucal sa Operations Division sa Land Transportation Office (LTO) mipasabot nga mopadayon gyud sila sa pagpanakop kay mahug na nga “reckless driving” ang bisan kinsa nga driver nga ibutang sa peligro ang mga sakay.

Iyang giklaro nga makamulta og P1,278 ang madakpan ubos sa Republic Act 4136 nga nahimong balaod niadto pang tuig 1954.

Apan si Dumanjug  Mayor Nelson Garcia kinsa maoy presidente sa Municipal Mayors League kinsa supak sa dinakpanay mipadayag nga “double standard” kining  gihimo sa taga  LTO ug DILG kay kun estriktohon ang lagda sa traffic laws dili  gyud motugot nga mahimong habal-habal ang mga motorsiklo  og kinahanglang dakpon ang mga tricycle nga moagi sa mga national highways.

Gisaway  ni Garcia nga dump truck maoy giinitan karon  nga kun buot huna-hunaon, gamay ra  kaayo ang nahitabong disgrasya ikomparar  sa mga pribadong sakyanan.

Matud ni Mayor Garcia, lisud  gyud kaayong balibaran ang mga tagi-barangay ilabina sa kabukiran kay ang mga dump truck maoy naandan nga kasakyan.

Sila sab  si Carlo Dugaduga, public information officer ning dakbayan sa Sugbo  ug Filomino Leyson PIO sa Barili misupak  sab niining dinakpanay  sa mga  dump truck.

Si Dugaduga miingon nga bisag dili kaayo apektado dinhi sa ciudad gumikan sa kadaghang sakyanan nga magamit, iyang nasabtan ang kaimportante sa dump drunk ilabina nga mangyawat sa plitihan ang katawhan.

Si  Leyson mipasabot nga tinuod dunay  tourist bus ang Barili  apan di gyud magsilbe kay di gyud makasaka  didto sa kabukiran sama didto sa Kangdampas diin didto gikan ang nadisgrasya nga dump truck.

Pagkakaron,  iyang giklaro  nga sukad pagkahitabo, wa na gyud sila  magpagamit sa ilang mga dump truck. Matud niya nga mibalik sa naandan nga nag-habal-habal ang taga bukid nga mas risgo gyud hinuon kaayo ug mahal pa gyud ang plite.

Hinuon  si, Director Noval miingon nga dunay mga higayon nga masakyan ang mga dump truck alang sa emergency cases sama  sa transport strike o ba  kaha alang sa evacuation sa mga biktima sa kalamidad.

Alang nako kini’ng disgrasya  puwede’ng kalikayan kun matarong lang gyud ang pag-mintinar sa mga sakyanan.

Dili kaha gumikan sa pulitika maoy na-ingnan sa disgrasya sa Barili?

Unsa ka intresado ang atong mga kadagkuan sa kalungsuran pagtinabangay  nga mapalit ang mga pisa nga gikinahanglan sa mga sakyanan?

* * *

Unsa man gyud ka safety ang publiko niining pagsakay ug mga elevator sa lain-laing mga establismento?

Duna bay taga gobyerno nga experto ug kanunay’ng nag-monitor sa ka safety sa mga mga tawo nga mosakay ug elevator?

Karong bag-o nakugang na sab ko niining isyu parte’g elevator kay dihay exclusive nga estorya ang GMA-7 Balitang Bisdak nga dunay 11 ka buok ang na-trap  sud sa  nag-malfunction nga elevator sa usa sa mga edipisyo diha sa may Mango Square.

Unya niadto  sa’ng Huwebes sa  hapon si Pardo Barangay Councilor  Altea Lim  ug iyang pamilya nakatilaw sab ug tagam diha sa SM City kay  kay mi-shutdown  ang elevator nga ilang gisakyan.

Matud  niya kinsa  personal nga mitunga sa akong programa sa DYSS Super Radyo milanat ug sobra 20 minutos ang ilang pagkatanggong sud sa elevator nga hilabihang ngitngita ug naglisud sila’g ginhawa.

Uban sa konsehal ang iyang amahan nga 71 anyos nga may deperensiya sa kasing-kasing ug iyang anak nga 7 anyos nga  gihilantan.

Ang nakaporke pa gyud kay way mga kadagkuan sa SM management ang  mi-comfort  kanila human sa nahitabo.

Kinahanglang imbestigahon kini sa  tagdumala diha sa SM ug sa atong mga ahensiya sa gobyerno.

Maglaum ko nga subayon sa Office of the Building Official (OBO) ug sa taga Bureau of Fire Protection ang mga elevator sa mga building aron luwas ang publiko.