Way pagmahay ang anak sa krimen
Na-obserbahan si Christian Lucky Dalangin nga mapahiyumon gihapon samtang gidala ug gipasakaan kini ug kasong parricide sa korte niadtong Sabado sa pagpatay sa iyang inahan nga si Rubirosa Mecares Tenchavez pinaagi sa pag-gulgol sa liog ug milubong sa iyang inahan sulod sa ilang panimay diha sa Maria Gochan Subdivision sa Barangay Mambaling ning dakbayan.
Ambot kun unsay buot ipasabot sa iyang pagtingse? Mao bay giganahan sa iyang gihimo’ng krimen ngadto sa iyang inahan? O ba kaha bunga sa kaulaw nga iya nalang gipaagi ug katawa? O ba kaha wa pa katugpa ang kanahan?
Puwerte’ng paita gyud diay niining mga adik kay mopatay na’g ginikanan nga igo ra’ng magyaw-yaw sa ilang mga sayop. Ang ginikanan nay mahimo’ng dautan sa ilang kabuang.
Makapahiubos kining matang sa krimen. Wa lang gyud huna-hunaa ang sakripisyo sa inahan nga maoy nagpadaku ug nagmatoto kaniya ug hangtud nga nakahuman sa kurso.
Bisag dili ko igbaho sa pamilya, apan nakapanglipagho ko dihang gipagawas na ang patay’ng lawas sa inahan niadtongBiyernes sa hapon gikan nga gi-ugkat didto sa stockroom sa mga operatiba sa National Bureau of Investigation.
Bisan ang ilang mga silingan mipadayag gyud ug mga pagmahay ngadto ni Christian.
Akong tan-aw nga kun didto pa si Christian pagdayon ug ugkat daku gyu’ng gubot.
Ang tulo ka mga igsoon sa biktima nga sila si Norma Mayubay, Evelyn Tenchavez ug Vivian Batayola nagminatay intawon sa paghinilak.
* * *
Kinsa man gud ni’ng kanhi sakop sa US Navy nga nanghambug nga may kasayuran siya kun kinsa ang tinuud nga responsable sa pagdagit ug pagpatay sa 6 anyos nga batang babaye nga si Ellah Joy Pique?
Kun tinuud pa kini’ng estoryaha, nganong di man gud siya mopakita?
Hangtud nga di kini mopatim-aw, magduda ko nga mugna lang kini nila ni Bella Ruby Santos ug sa uyab nga si Ian Charles Griffiths aron paglubog sa kaso.
Kun tinuud kining kanhi sakop sa US Navy nganong magtago-tago man gyud?
Akong gipaabot ang panahon nga palingkuron sa witness stand sila si S/Supt. Patrocencio Comendador ug S/Supt. Erson Digal kabahin ni’ng maong kaso.
* * *
Full force ang puwersa sa Cebu City Government pinangoluhan ni Cebu City Mayor Michael Rama pagtambong sa among programang “Dialogue On The Air” niadtong Sabado sa among sibyaanan sa DYSS Super Radyo aron pagpasabot nga seryoso sila pagtuman sa hingpit sa “Drainage Master Plan” dinhi sa dakbayan sa Sugbu.
Sila si Mayor Rama, Carlo Duga-duga, City Councilor Bob Cabarrubias, City Councilor Michael Ralota, City Engineer Kenneth Enriquez ug Drainage Section Head Guillermo Viola mipasabot nga wa sila magtugtug sa pansitan sa problema sa drainage ug gani daghan na sila’g nahimo pagpangita ug kasulbaran ug naplastada nila atul sa programa ang pipila ka mga kalampusan.
Susama usab ang gipasabot ni Architect Florentino Nimor City Planning Officer sa dakbayan sa Mandaue.
Akong nakuha ang kayuran gikan kang Engr. Enriquez nga migasto ang kagamhanan sa Siudad sa Sugbu ug 13 milyones ka pesos alang lang sa paggama ug plano ug feasibility study sa master drainage plan samtang 10 milyones ang nagasto sa Mandaue City Government nga parehas nga ginama ni Adonis Compendio sa Schema Konsult.
Ang nakanindot atul sa maong programa nagkasabot ang duha ka mga Local Government Units nga magdungan ug maghi-usa aron paglimpiyo sa Mahiga Creek nga gipuy-an sa mga informal settlers.
Gani karong Miyerkules inig balik sa trabaho maghimo sila ug hiniusang lakang alang sa “clearing operations” diha sa may Rolling Hills Funeral Parlor ug sa mga propedad sa mga King ug sa mga nagpuyo diha aron paghi-uli sa naandan nga agi-anan sa tubig- baha.
Si Kapitan Rey Ompoc sa Mabolo nga mitunga usab sa programa mitug-an nga ang hinungdan diay kun nganong paspas kaayo ang paglunop sa Sitio Lahing-lahing duol sa Mabolo gym tungod diay sa matud pa pagpasira sa agi-anan sa tubig sa taga Pepsi Cola. Mimandu si Mayor Rama nga ipa-guba ang bisan unsang gi-construct diha nga illegal.
* * *
Insakto si City Mayor Michael Rama nga ang pagpalapad sa kalsada maoy klarong solosyon pagsulbad sa problema sa trapiko ni’ng panahuna ug dili ang paggama ug dugang mga “flyovers” diha sa General Maxilom-M.J. Cuenco Avenues ug sa Gorordo-Archbishop Reyes Avenues.
Makalolooy sab intawon kadtong mga negosyante nga apektado sa locations sa mga “flyovers” kay seguradong langawon na.
Pero in fairness sab ni kongresista Cutie Delmar nga maoy proponent makatabang-tabang pagsulbad sa traffic ang paggama ug mga “flyovers” dinhi sa dakbayan sa Sugbu.
