Nagkinahanglan kita og mga ligdong
Haskang paita gyud basta makwestiyon na ang kredibilidad sa atong mga huwes ug mga justices niining mga kaso batok sa gitumbok nga mastermind sa P10 billion pork barrel scam nga si Janet Lim-Napoles.
Mao ni ang nakapait sa atong “judicial system” kay bisag ang mga abogado nga nahimo nang mga politiko puwede pang matudlo sa pagkamahistrado sa Court of Appeals (CA) o ba kaha sa Korte Suprema.
Laing paagi nga bulok kaayo nga di gyud maayong paundayunan mao ang gahom sa Presidente nga usa sab ka politiko nga maka-appoint og mga huwes ug mga mahistrado.
Sama sa nahitabo kang kanhi Laguna congressman Danton Bueser nga usa na ka mahistrado sa CA.
Ang nakaporke kay si Justice Bueser naapil sa report sa Commission on Audit (COA) nga usa sa mga magbabalaod kaniadto nga mitunol sa iyang Priority Development Assistance Funds (PDAF) ngadto sa mga peke nga non-government organizations.
Ambot lang kun mo-inhibit ba si Justice Bueser kun way nikwestiyon kaniya kinsa miembro sa CA’s 4th Division nga anaa naka-pending ang apelasyon ni Napoles nga nagtinguha nga ipasalindot ang iyang kasong serious illegal detention.
Unya nahibaw-an sab nga si Justice Bueser miyembro sa 2nd Division nga maoy naghupot sa petisyon sa Anti-Money Laundering Council pagbawi sa mga kabtangan ni Napoles.
Ang mahistrado way kalainan sa depensa sa iyang mga kanhi kauban sa Kamara nga nanghimakak sa anomaliya.
Miingon siya nga “I will ask the National Bureau of Investigation to investigate the authenticity of the documents and the signatures appearing thereon because to the best of my knowledge, I have not made any endorsements to these organizations, much less transacted business with these entities.”
Parehas kini sa atong mga Sugbuanong kongresista nga pwerteng depensa sa pag-finance sa ilang “pork barrel” ug sila misaad pa nga wa mohatag ngadto sa mga peke nga foundations ug NGOs.
Pero unsa na man kini karon nga klaro pa man sa tataw kay nasuta na nga ang mga foundations nga ilang gihatagan sa PDAF atoa man nagbase sa Manila? Pwede diay na? Di ba ang PDAF gituyo man alang sa ilang distrito?
Dili na ko matingala nga dunay mga Cebuano legislators nga maapil og taral unya inig abot sa tukmang panahon.
* * *
Di magsakit akong tiyan kun dawaton ni Presidente Noynoy Aquino ang “irrevocable resignation” ni National Bureau of Investigation (NBI) Director Nonnatus Rojas ug iyang Deputy Director.
Pagkamabaw sab niyag sampot uy! Dili man kaha siya maoy giigo sa imbestigasyon karon nga dunay duha ka mga NBI agents ang mipahibaw kaniadto kang Janet Lim- Napoles nga dakponon na kini sa kasong serious illegal detention human nalutsan og warrant of arrest sa Makati Regional Court.
Dili kaha ni drama nilang Justice Secretary Leila De Lima ug NBI Director Rojas nga mo-resign na lang si Rojas ug mosunod si De Lima human na-insulto sila sa presidente kay wa pahibaw-a sa “well-arranged” kaayo nga pag-surrender ni Napoles sa Malacañang?
Ang nahitabo nawani sila unya ang mieksena pag-ayo mao si Interior and Local Government Secretary Mar Roxas.
Kun seryoso sila si Director Rojas ug DOJ Secretary De Lima niining tinguha karon sa pagtugkad sa ilang imbestigasyon sa isyu sa “pork barrel scam” dili igsapayan ang mga pagsaway sa Presidente kanila.
Ngan nga mga abogado ni sila ug nahibawo sila sa mga pasikot-sikot, ila untang gihatagan og prayoridad ang pagkuha og testimoniya ni Napoles.
Nawala gyud hinoon akong bilib niining Rojas kay murag batang gamay. Inay ilang paspasan ang imbestigasyon, nagbinayot man hinoon.
* * *
Congratulations kang Super Bobby Nalzaro nga nahimong “Best Radio Commentary Program” ang iyang tulumanon sa buntag sa dySS Super Radyo nga “Bobby Nalzaro on Board Saksi” sa bag-o lang nga 16th Cebu Archdiocesan Mass Media Awards (Camma) ug ingon man dinhi sa Cebu Daily News nga maoy naka-angkon sa “Best Editorial Cartooning.”
Nagtuo ko sa sinugdanan nga dili padag-on sa Simbahan ang iyang programa kay “critical” siya sa ubang mga pari nga inay alagad unta sa Diyos apan maoy mga pasaway.
Akong sublion akong panawagan ngadto sa mga award-giving body ug sa bisan unsang institution nga mas maayo gyud unta nga wa na kinahanglana ang submission sa mga entries sa mga programa sa radyo ug telebisyon, write-ups ug uban pa kay self-serving kining pag-nominate sa kaugalingon.
Di ba lami kaayong paminawn sa mga recipients nga ma-surpresa na lang sa usa ka higayon sa iyang mga nindot nga articles ug mga programa?
Maglaum ko nga magpadayon ang Camma aron mag-agni pa kanamo.
