Nagpasabot nga inutil ang Mandaue police?
With all due respect sa atong kapulisan sa dakbayan sa Mandaue pinangulohan ni Senior Supt. Noel Gillamac, makapaisa kaayo sa kilay kining tanyag nga P1 million nga cash reward niadtong makahatag og impormasyon nga makasulbad sa pag-ambush ug pagpatay sa negosyante nga si Antonio “Tony” Ouano Sr.
Nagpasabot ba kini sa pagkainutil sa kapulisan sa dakbayan sa Mandaue ug sa “Task Force Ouano” pagsulbad sa krimen?
Ma-anaa o walay gitanyag nga cash reward ang pamilyang Ouano, obligasyon sa atong kapulisan ang pagsulbad sa kaso.
Dili maayong paminawon sa publiko nga masulbad lang ang krimen tungod sa dakung kuwarta sa mga Ouano.
Nabalaka lang ko nga ang atong kapulisan mao nay mag-away unya sa credit panahon nga masulbad na.
Wa ko makasabot sa pamilyang Ouano nga sila moingon nga kontento sila sa update sa imbestigasyon sa kasong pag-ambush sa negosyante. Naa bay natagbaw sa performance sa kapulisan sa kadaku sa cash reward?
Dili ba kini insaktong mensahe pag-insulto sa police force?
* * *
Unfair gyud kaayo kining lakang sa gobyerno nga automatic nga mopasuspenso sa biyahe sa tanang mga barko sa usa ka shipping company kun dunay disgrasya nga mahitabo sa usa sa mga vessels.
Makasimpatiya ko sa management sa Island Express Shipping niining sitwasyona.
Maglaum ko nga dunay insaktong gidaghanon sa mga inspector ang Maritime Industry Authority nga mo-inspection sa ubang mga barko aron mapaspasan ug dili masakripisyo ang paghatag og serbisyo ngadto sa mga lugar nga apektado.
* * *
Naalarma ang mga gwardya sa Palace of Justice niadtong Lunes sa hapon kay dihay usa ka German national nga daku kaayog tingog nga nangasaba ug nanaway sa sistema sa hustisya sa buhatan ni Cebu Provincial Prosecutor Pepita Jane Petralba.
Matud pa ni Petralba nga lupig pay mga komentarista sa radyo ni Luc Peloguin nga migamit og mga termino sa pagsaway sa gobyerno sa Pilipinas.
Bisag gibadlong sa opisyal ang maong German national, wa gyud kini mopatoo hinungdan nga gipaalarma sa mga gwardya.
Dihang nakasabot ang langyaw nga gi-alarma siya, mikalma ug mihilom na.
Unya, sa wa pa siya mobiya sa building sa Palace of Justice nagsuwat siya sa papel og nangayog pasaylo ni Petralba.
Ang estorya nga akong nakuha, nasagmuyo ang maong langyaw kay wa hatagi og gibug-aton ang deklarasyon sa iyang amigo nga mi-testigo sa kasong illegal possession of firearms and ammunition batok sa laing langyaw nga si Alfred Hans Kal Thuff.
Gipasabot ni Petralba nga wa na kinahanglana ang testimonya sa sibilyan sa kasong giatubang ni Thuff kay ang importante mao ra ang testimoniya sa arresting officers ug sa taga-Firearms Explosives Security Agencies and Guards Supervision office.
Sa nahitabo, kinahanglang hugtan sa atong mga gwardya ang seguridad sa sulod sa Palace of Justice kay tingalig ma-shock na lang ta nga dunay makasud nga assassin nga nagtinguha nga mopatay sa mga opisyal sa gobyerno.
* * *
Daku nakong kalipay kay ang lain nakong pag-umangkon nga si Inday Babylour Rosal Suarez usa sa mga milampos ug nakapasar sa nursing board karong bag-o.
Siya maoy youngest sa lima ka mga anak nila ni Edilberto Suarez Jr. (Manoy Boy) ug ni Nang Daisy.
Si Babylour maoy ikaduha nga nurse sa among pamilya kay ang na-una si Inday Ecel nga anak nila ni Brod Luisito “Lito” ug Nang Lucy.
Puwera buyag ning akong mga pag-umangkon mga ma-inampoon, buotan, kugihan ug may determinasyon.
Gawas nila ni Inday Ecel ug Inday Babylour, duna pay daghan nakong mga pag-umangkon nga susama kanila.
Again congratulations, Baby! Usa ka sa naghatag og garbo sa pamilya!
