Di na kinahanglan ang ordinansahon ni Vice Gov?

Niadtong Sabado sa hapon, ang kontrobersiyal   nga ordinansahon nga “Anti-Tabloid Ordinance” ug ang plano nga magsilot ug pag-ban  sa mga bastos ug law-ay  nga drama sa radyo ni Vice Gov. Agnes Magpale  maoy  sentro sa among diskusyon  sa among programa’ng Dialogue On The Air.

Magpasalamat ko sa akong mga dinapit nga mga bisita  nga mitunga  gyud sa among programa sa estasyon dySS Super Radyo.

Mitambong sila si Provincial Board Member Julian “Teban” Daan kinsa usa ka beterano sa drama sa radyo ug telebisyon ug Provincial Board Member Joeyboy Holganza kinsa pulos mipadayag nga angay pa kini’ng tun-an ug tarong ug kuhaon ang sentimento sa kinabag-an.

Mitunga usab si Fermin Collantes Gomez   kinsa three-time Catholic Mass Media Awardee as Best  Writer/Director  (Radio Drama) ug Best Writer/Director Freedom Award Radio & TV, kinsa nagkanayon nga di na kinahanglang himo-an ug ordinansahon kay di na parehas ang mga drama kaniadtu kay sa karon.

Matud pa ni Fermin ug ni bokal Teban nga pulos mga batid sa drama sa radyo, nga lisud kaayo’ng  tangtangon ang mga pagilok nga tingo’g sama sa agulo ug mga utnga sa mga eksena nga romansa sa drama kay di na masabtan sa mga tigpaminaw. Dili  susama sa telebisyon nga masabtan dayon ang eksena kay video man.

Ang duha parehas ug baruganan nga limitahan lang ang eksena sa romansa ug dili i- exaggerate nga hilas  na’ng paminawon sa kahanginan.

Si Marlon Baula Standard Authority Officer sa Kapisanan Ng Mga Brodkaster Ng Pilipinas (KBP) mipasabot nga way nadawat nga reklamo  karong bag-o ang KBP sa mga hilas ug bastos nga drama. Matud niya nga di sab kinahanglanon ang ordinansahon kay ang KBP estrikto nga magsilot sa mga bastos ug law-ay.

Si Roger Vallena News Editor sa Sunstar Superbalita  mipadayag nga kini’ng  ordinansahon ni Magpale posible’ng  gamiton  ug abusuhan sa mga politiko  nga may kalagot sa mga Tabloids.

Samtang akong nabantayan sa diskusyon  nga medyo gi-initan gyud ang mga Tabloids sama sa Superbalita ug Banat News  ug gikuwestiyon ang  definition of terms sa maong ordinansahon mao nga akong gisugyot  nga ilisan nalang ang termino nga  “Tabloids” ngadto sa “Publications” kay sumaa pa ni Roger nga kun Tabloids ang gamiton ma-apil kita dinhi sa  Cebu  Daily News (CDN) kay ang gidak-on sa papel nga gigamit sa CDN pang-Tabloid.

Hinoon ang mga representante ni  Vice-Governor Magpale nga sila si  Basiliso Sungcad Jr. ug Heddah Largo  GAD officer sa Provincial Women Commission mihangop sa maong sugyot.

Sila si Sungcad ug Largo mipasabot  nga  dili  gyud pagkub sa kaldero ang ilang pagpanday sa ordinansahon.  Ang importante lang  mao nga mawagtang na sa mga local dailies nga Tabloids ug sa mga radio stations ang mga bastos ug law-ay  nga mga pasundayag ug sa mga mamantala kay apektado ang kabataan ug kababaenhan.

Si  Assistant Cebu City Prosecutor  Maria Theresa Casiño nga nag-representar sa Cebu City Anti-Indecency Board (CCAIB)  mipadayag nga ang naka-trigger gyud niining ordinansahon ug ang paghingusog nila sa CCAIB  mao ang pagkalat na karon sa problema sa abuso sa kababain- han.

Sama  sa  gisulti  ni Vice-Governor Magpale nga di siya  maka-ako nga magpiyong nalang  niining problema  karon nga atong nasinati.

Alang nako mas maayo gyud nga manginlabot ang tanan ning maong problema. Way kumo sa pagbaylo-ay  ug mga maayong huna-huna.

* * *

Akoy nalooy sa usa ka dancing inmate sa Cebu  Provincial Detention and Rehabilitation Center  kon CPDRC  nga si Joel Avila alyas Joel Noel kay  wa  siya  molampos sa iyang tinguha niadtong Biyernes  nga maka-angkon  na ug hingpit nga kagawasan gikan sa walo ka tuig nga pagka-priso.

Nahug nga way kapuslanan ang nakuha niya’ng “Certificate Of Discharge from Prison”  nga pirmado ni Jail Warden Algier Comendador kay  nahibaw-an  karong  bag-o nga duna pa siya’y  laing  kaso’ng  robbery sa RTC Branch   6  sa  kang  Judge Ester Veloso.

Klaro  kaayo kini’ng  pabaya  sa mga kadagkuan sa CPDRC kay wa nila  i-double check ang  records sa mga binilanggo.

Asa man  kadtong  gipanghambug  kaniadtu ni kanhi  Capitol  Consultant  Byron  Garcia  nga  naghimo sila ug pro-filing sa mga piniriso? Kutob ra kadto sa panghambug? O ba kaha giwagtang na kini’ng maong programaha sa liderato diha?

Nalooy gyud ko sa piniriso  kay ang  iyang gibati nga kalipay sa discharge order  napulihan ug kasagmuyo kay magsugod na sab siya sa sinugdanan ug atubang sa laing kaso ug karong petsa 23 ipa-arraign siya diha sa kang Judge Veloso.

Ang iyang  duha ka mga kaso nga kalapasan sa Section 5 sa RA 9165 sa pagbaligya  ug shabu  didto sa RTC Bogo iya  na’ng  naserbisyuhan  kay iya kini’ng  gi-angkon  ug nakig-plea bargain  samtang ang laing kasong robbery sa kang RTC Judge Simeon Dumdum gipa-ubos na sa provisional dismissal.

Ang iyang mga igsoon maoy nagsige’g  follow-up sa iyang mga kaso kay  nagsige  kini ug sakit  sulod sa prisohan.

Akong nakita  nga puwerte gyud niya’ng  luspada ug niwang kaayo.

Ang duha ka mga escort  sa piniriso nga  sila si PG1 Clarito  Egnora  ug PG1 Crisanto Saavedra ako’ng  naatlan nga  gipangasab-an  ni Atty.  Cristine Doller  niadtong Biyernes sa hapon tungod kay langay kaayo’ng nagpahibawo  sa korte nga dinakpan ug detinado na diay  si Joel.

Si PG1 Egnora  mi-angkon nga kaniadtu  dihay  pulis nga mi-serve sa warrant of arrest ni’ng  maong kaso gikan diha sa RTC Branch 6 ug ang pulis nga wa niya  hinganli mipasalig  nga maoy  mopahibalo  kanila sa mga bista.

Apan  matud niya wa na mobalik ang pulis.  Alang  nako  dili na mabasol ang pulis nga maoy mi-serve sa warrant of arrest.

Kadtong pag-serve sa warrant   insakto na kaayo ang pagpahibawo sa taga CPDRC nga duna pa’y laing kaso ang dinakpan.

Nagpasabot  lang gyud kun unsa ka tanga ang taga CPDRC sa ilang pagdumala  diha sa mga binilanggo.

Way  plano niini si Governor Gwen Garcia nga  imbestigahon kini’ng  iyang mga  sakop nga nagpabaya ug pakyas sa paghatag ug kaayuhan ug proteksiyon sa mga piniriso?