Unsa may bag-o niining mga akusasyon batok sa mga magbabalaod bahin sa ilang pangurakot sa “pork barrel” o PDAF kon Priority Development Assistance Fund?
Kaniadto pa man ni gi-tolerate kay daghang makabenipisyo niini apil na ang taga-Malacañang ilabina kay nagkaduol na ang eleksiyon.
Wa nako matinga niining expose nga matud pa dunay P10 bilyones nga gikan sa pork barrel sa mga senador ug mga kongresista nga nahatag ngadto sa mga peke nga mga people’s organizations ug mga foundations unya adto ra sab sila mokobra sa ilang dakung bahin.
Ang mga gipang-akusahan, natural nga di gyud mo-angkon kay wa gyuy kawatan nga mo-angkon.
Ang pipila nga nalambigit mao sila Senators Juan Ponce Enrile, Jinggoy Estrada, Ramon “Bong” Revilla, Ferdinand “Bongbong” Marcos, Gregorio Honasan ug dunay 25 ka mga kongresista.
Wa kahay mga Sugbuanon nga nalambigit niini ug kini ra kaha ang gidaghanon nga masupalpal sa imbestigasyon?
Duna nay mga tawo nga nang-execute og affidavit sa Department of Justice.
Maayo unta nga tinud-on na kini pag-imbestigar ug dunay ipangtaral.
Ang nakaporke lang kun wa na say mahimo ug ma-inutil gihapon ang Aquino administration.
Kagahapon ang usa sa mga gitumbok nga kaalyado sa corruption sa pork barrel nga si Janet Lim Napoles, president ug Chief Executive Officer sa JLN Corporation mipatim-aw ug nanghimakak sa maong pork barrel scam ug nangayo pa og despensa sa mga magbabalaod.
Alang nako panahon na gyud nga wagtangon ning pork barrel sa mga magbabalaod aron mo-focus nalang sila sa legislative agenda.
Ambot lang kun duna pa bay ganahan nga mag-senador ug mag-kongresista kun wagtangon ang “pork barrel.”
* * *
Karong Sabado mangahas ko pagtuki atol sa among programang “Dialogue on the Air” sa dySS Super Radyo niining mga kontrobersiyal nga existing Cebu City Ordinances bahin sa pag-regulate sa mga ilimnong makahubog ug kining pag-operate sa mga resto bar nga makabalda sa katulog sa uban tungod sa kasaba.
Unsa man gyud ka estrikto ang liderato ni Cebu City Mayor Michael Rama nga milanat na og sobra tulo ka tuig sa panga-gamhanan sa City Hall batok sa mga malapason nga mga establisimento?
Sa pagkatinuod lang, daghan kong nakit-an nga mga imnanan ug mga wine shop nga naka-operate sulod sa 100 metros nga distansya sa mga eskuwelahan, simbahan ug ospital.
Gawas sa kontrobesiyal nga Kuerks Resto-bar, dayag kaayo sa among agianan ang “OUTPOST” sa Lahug nga duol ra sa Cambridge School ug ang “FRENCH” nga atbang sa Lahug Christian School sa Gorordo Lahug.
Nganong gipangtugtan man intawn ni? Naa pay daghang establismento nga susama ug kalapasan.
Ambot kun unsay hinungdan nganong nagpadayon sa pag-operate ning uban nga wa man diay permit. Tungod ba kay ang mga tag-iya niini mga ka drinking buddies, padrino ug kaalyado sa politika sa mga naglingkod sa City Hall?
Abir nganong naka-operate man ang Kuerks Resto-bar nga gituhoan nga iya ni City Councilor Gerardo Carillo nga wa may business ug mayor’s permit?
Unsa man, nag-mika ang Team Rama?
Tan-awon ko kini kun di ba maablihan ug balik ning Kuerks human gipasirad-an ni Mayor Rama kagahapon.
Nganong wa man sab makatambag si Konsehal Carillo sa ginikanan sa iyang uyab paglukat og permit ug pagbayad sa buhis?
Mitukar na ang abuso sa gahum?
* * *
With all due respect ngadto nila ni Cebu City Councilor Carillo ug sa iyang abogado nga si Noel Archival, unsa may tumong nila sa pagtabang pinansiyal sa pamilyang Pogoy niining pagpatambal ni Jan Niño Pogoy kinsa biktima sa pagpanghapak ug bato sa iyang ulo diha sa Kuerks Resto-bar?
Karon nga wa nay interest ang pamilyang Pogoy pagkiha ni Carillo nagpasabot ba nga nahatod na ni Archival ang kantidad nga gitoho-ang P200,000 pesos?
Akong tan-aw medyo paingon na gyud kini sa areglo kay kini maoy strategy sa mga abogado kung ma-apiki sa depensa.
Kung modayon man pagkiha ang mga Pogoy posibleng mo-aslum ang huna-huna sa kinabag-an kay magtuo nga gigamyan ra sa gitunol ni Konsehal Gerry.
Mao ni ang giingon nga daghan kaayong paagi kun unsaon pagpaluya sa biktima nga mangayo ug hustisya.
Pero in fairness sa konsehal, butangero man sab kaha ang biktima.
* * *
Kanunayng nagpasidaan nato karon ang taga-Philippine Atmospheric, Geophysical, Astronomical Services Administration Mactan sa dili maayong dagan sa panahon.
Kagahapon ang Low Pressure Area kun LPA naporma nang bagyo ug gihinganlan siya ug “Isang” ug duna nay mga lugar sa Luzon ang ubos sa public storm signal number 1.
Dinhi sa ato nga medyo ngi-ob ang panganod nagpasabot nga delikado sab kita nga ig-on sa mga kusog nga pag-uwan nga moresulta sa pagbaha sama sa nahitabo sa dakbayan sa Danao.
Kinahanglan gyud nga magma-binantayon kitang tanan sa dagan sa panahon.