Tagolilong o Spiderman?

Giingnan ko ang akong higala nga si Sawi Aquino nga sa tanang gahum o virtud nga gusto kong makuha ang labing una mao ang pagkadili makita; ang pagka-invisible. Mikatawa siyag kusog. Gipangutana ko siyag ngano ug mi-ingon siya nga usa kuno kana sa kinaiya sa yawa, ang pagka dili makita.

Gawas sa kalibutanon kaayong mga panghinamhinam sama sa panghikap ug pamuso, ang pagka dili makita may kalabutan usab sa pag-eskapo o pag-ikyas sa mga katungdanan ug tulubagon. Mahimo kang mag hugaw-hugaw bisag asa kay wa may mo-badlong o mo-multa kanimo. Mahimo kang mangguba og mga butang (vandalism), mangbulabog sa kinabuhi sa uban (pranks) ug unya, dili ka manubag ning imong binuhatan.

Daghang dimensions ang invisiblity. Usa niani mao ang pag-violate sa real space. Wala ka sa maong lugar apan duna kay gipahipi nga camera nga gibutang didto mao nga bisag wala makakita ang mga tawo kanimo, nakakita ka kanila. Ug kun dunay mga sound recording devices maka dungog ka usab sa ilang gipanghisgotan.

“Eyes and ears” maoy usa sa euphemism para sa mga ispiya. Tungod kay pinaagi sa ilang mata ug daunggan, masayod ka sa kalihokan sa usa ka panagtapok nga wa nimo tambungi.

Ang Undercover maoy laing tawag sa ispiya. Ang pagtakuban usa usab ka dimension sa invisibilty kay gi tago-an mo man ang imong tinuoray nga pagkatawo. Ang camouflage lain usab nga klase sa invisibilty ug ingon man ang pagka-impostor.

Ang laing klase mao ang pagtago sulod sa usa ka sukod sa kadugayon o sa pagtago sa panahon nga diin naa ang imong gilikayan. Tingali nakadungog na man kamo sa panultihon nga “sayon duolon apan lisud pangitaon.” Sa Ininglis pa, evasive. Sa kalibutan sa magic dunay Houdini nga moipsot gyud sulod sa mobung panahon sa pagtago.

Ang gi-ingong spiderman sa Gaisano Fiesta Mall sa Tabunok, Talisay City, gi-tawag og ingon kay maayo kining mo-katkat ug bungbong ug mo su-ong sa kisame. Apan kun mao ra kini iyang abilidad, sa circus ra unta siya kutob.

Ang iyang abilidad, pag-tago (sama sa iyang pagpuyo sulod sa kisame diin duna na siyay katulganan) pag-timing (sa iyang pagdungan sa panon inig gawas niya ug sa iyang pagpabilin inig panira sa iyang pagsaka sa kisami), pagsibat niyag mga cellphone (diin daghan intawn kaayong tindera ang gahilak tungod kay sila may pabayron niini), ug pag-ipsot sa buot mosikop kaniya daw mosugyot og usa ka tagolilong o di ba hinuon ni Houdini.