Selfie: Kaugalingong hulagway sulod sa telepono

Ning sugod sa semana, wa koy nasugatan nga maayong suwaton. Nangidhat si Dwight Howard sa mga laing team sa National Basketball Association, si Mandela gatinga ug si Snowden na stranded sa airports sa Russia. Wa sab ko makatambong sa pag-handover ni Gwendolyn Garcia kang Gov. Hilario Davide III sa iyang pwesto mao nga mapugos na lang kog reycle sa akong gisuwat nga article sa Ininglis kabahin sa “selfie.”

Sama sa pagtawag nilag anime sa animation ang mga mahiligon og shortcut mitawag na sa self-portrait og selfie.

Hinuon dili ang na-andan o classical view sa self-portrait ang selfie kay dili man canvass ug oil paint o papel ug water color ang gigamit pagkuha niani kun di digital camera man o cellphone camera ang gigamit pagkuha sa kaugalingong hulagway.

Ang telepono nga niadto pagpasa ra sa tingog ang buhat ug nga tungod kay dunay physical nga linya sa sulod ra sa balay magamit karon masulod na sa bulsa, mokuha ug mopasa na og imahen, litrato man o galihok, gani hasta ang TV gidala na niani. Usa sa mga produkto sa cellphone kining selfie.

Niadto ang mga hari ra og sapian ang maka-afford og portrait. Ug kay lisud man ang pag-portrait ang mga artist ra maoy makahimo og self-portrait. Lahi na karon. Tingali gamay na lang kaayo nga porsiyento sa mga tawo karon ang walay hulagway sa ilang kaugalingon.

Morag unang nakit-an sa tawo ang iyang imagen sa tubig ug dayon sa salamin. Apan kanunay kining galihok. Sa mitos ni Narcissus nahulog siya sa suba kay iyang gikab-ot ang iyang imahen sa tubig. Apan mas duol sa kontra ni Snow White ang mga tig-selfie karon kay daw nangita man silag approval sa ilang hitsura.

Nangutana kog usa ka estudyanteng babaye kun kapila siya mag-selfie sa usa ka adlaw og mi-ingon siya nga kapin sa katulo niya kini himuon. Gipangutana ko siya kun nganong hilig man siya niani. Mitubag siya nga tambal kini sa kalaay ug kun maguol siya himuon niya kining kalingawan.

Nangutana usab ako sa usa ka call center agent kun nganong hilig siya mag-selfie. Miingon siya nga ganahan kuno siya mosud-ong sa pag-usab sa iyang hitsura sa paglabay sa panahon. Tingali before ug after siya magpaputol og buhok o di ba hinuon before and after sa pagbuwag nila sa iyang uyab.

Hinuon, ang tumong sa kasagaran nga mo-selfie mao man ang pagpasigarbo ug pasina sa ilang mga higala kabahin sa ilang na-adtoan, sa ilang bag-o nga mga butang ug sa mga inilang mga tawo nga ilang na-tuparan.