Makonsensya sab mo, ayaw lang palabi sa politika!

Ang labing maayong lakang pagdaug sa bisan unsang away sa kinabuhi mao ang pagpakig-higala sa kontra.

Kining maong panultihon applicable kaayo sa sitwasyon  diha sa  Kapitolyo ug sa City Hall ug sa bisan asa nga local government unit nga dunay mga kawani ug mga opisyales nga taktakonon tungod kay napagan sa bugno sa politika.

Tinuod, nakasabot ko ni Cebu City Mayor Michael Rama nga iyang panaktakon kadtong 2,500 ka mga casual ug mga contractual nga mga kawani sa Cebu City Hall nga open kaayong nangampanya pabor sa Bando Osmeña – Pundok Kauswagan  (BO-PK).

Apan kining tanan bunga lang gyud sa kahiubos ug resulta sa kainit sa politika kaniadto.

Di pa uwahi ang tanan. Puwede pa nga kining mga tawo ni Kongresista Tomas Osmeña nga  anaa sa City Hall mohangyo lubo ngadto kang Mayor Rama.

Kinahanglang ipadaplin ang mga garbo kana  kun nagtan-aw kita sa kaayohan sa siudad.

Alang nako, di man tingali angayng taktakon kadtong mga kawani ug mga opisyales nga  epektibo kaayo ug gamit kaayo sa panerbisyo sa  lungsod.

* * *

Nagkuwang lang tingali sa pagpasabot sila si City Mayor Rama ug iyang mga kaalyado sa “Team Rama” ngadto kang Anabelle Rama human napildi ug gibyaan og tagaliog ni Cebu City North District Congressman-elect Raul Delmar.

Kun giprangkahan lang tingali si Anabelle sa sinugdanan nga di gyud siya modaug kang Del Mar, di na tingali siya magbagulbol ug di na tingali siya maningil sa iyang natampo nga P3 milyones sa Team Rama.

Kining pagpamoyboy ni Anabelle dako kining insulto ug dakung sagpa sa Team Rama.

Haskang dakoa kahag katawa ni Kongresista Osmeña niining gihimo karon ni Anabelle nga makauulaw kaayo sa pamilya.

Pasensiya na lang gyud ang mga Rama  niining gihimo ni Anabelle kay unsaon man nga di man gyud mapugngan ang baba ug nag-apil-apil pa sa love life ni Mayor Mike.

* * *

Unsa man gyud kakuwartahan si Rene Boy Agraviador nga usa ka kanhi overseas Filipino worker nga siya maoy gi-target sa giingong grupo  nga kidnap-for-ransom diha sa dakbayan sa Talisay niadtong Domingo?

Mga kidnapper ba gyud kadtong napatay sa mga National Bureau of Investigation (NBI) agents sa shootout nga si Wane Tiano ug ang kauban nga nasikop nga si Ronilo Roble?

Dili kaha nga iya rang kaila o sakop sa pamilya ang nagpa-abduct kaniya aron pangwartahan?

In fairness sa taga-NBI ilang trabaho ang pag-responde dihang nagpakitabang ang ka live-in sa gidagit.

Maayo nga way napatay sa habig sa NBI atol sa pinusilay ug luwas ang kinabuhi sa giingong kidnap victim.

Ang istorya nga sa lima ka mga abductors dunay nagpaila nga sakop sa Philippine National Police ug maoy midemanda og kantidad aron buhian si Agraviador human giingong nalambigit sa  paghupot og shabu.

Alang nako, daghang anggulo ang angayng subayon niini kay possible baya nga may  kalambigitan sa drugas kining maong krimen.

* * *

Alarming na kaayo karon ang kasong pagpangabuso sa mga “deaf-mute” o mga amang sumaa pa ni John Paul Maunes, executive director sa Gualandi Volunteer Service Program.

Ang nakapaet pa gyud kay sagad sa mga responsable sa pag-rape sa mga amang mao mismo  ang ilang amahan.

Sa data nila ni Maunes moabot gikan sa 65 percent to 70 percent ang giabusohan nga mga “deaf-mute” diin amahan maoy gitumbok.

Usa sa hinungdan nga sayon ra kaayong  mabiktima sa abuso ang mga amang tungod sa  problema sa komunikasyon ug ingon man ubos ra gyud ang pagtan-aw sa mga responsable ngadto  kanila.

Mao nga nanawagan sila karon nga ma-institutionalize ang programa alang sa mga deaf-mute aron gyud ma-edukar kining hut-ong sa katilingban.

Ang pinaka-latest karon nga biktima mao kadtong sa Tuburan nga gibiktima sa gang rape.

Ang mga responsable nga silingan ra sa biktima nga sila si Joseph Anthony Bito-onan, Ronald Gulane ug Wilbert Molet gipangtaral na sa korte sa dakbayan sa Toledo ug way piyansa nga girekomendar.