Judge Tormis gi-frame up na sab?
Nakakukabildo ko og taas nga panahon kang dismissed Metropolitan Trial Court in Cities (MTCC) Judge Rosabella Tormis niadtong Biyernes sa hapon diha sa canteen sa Provincial Capitol ug akong gipaminaw ang iyang version sa nibuto nga laing isyu sa iyang korte sa Branch 4 bahin sa pagkawala sa mga armas nga ebidensiya sa mga kaso.
Sa kinatibuk-an, nanghimakak si Judge Tormis nga duna siyay kalambigitan sa pagkawat sa 14 o 13 ka mga armas ug iyang gipasabot nga didto pa ang tanang mga ebidensiya sa iyang chamber sa wa pa siya mobiya.
Iyang giklaro nga nahitabo ang kawat dihang wa na siya sa iyang opisina human siya gitangtang pagkahuwes.
Dakog pagtuo si Judge Tormis nga lain na sab kining tumo-tumo batok kaniya aron dauton siya og samot sa iyang pagkatawo kay nasayod siya sa epekto nga siya ug iyang clerk of court nga si Rey Teves nga otro sang gitaktak maoy manubag sa pagka-missing sa mga ebidensiya.
Dihay mga panghitabo kaniadto nga matud pa dulaan sa clerk of court ang mga armas.
Iyang giangkon nga dili lig-on ang locker nga maoy gisudlan sa mga armas ug iyang gibasol ang Korte Suprema sa way pagtagad sa mga problema sa iyang courtroom ug wa makatagad pag-renovate sa mga court buildings sama dinhi sa ato.
Gihimong example ni Tormis ang dapit sa building sa Palace of Justice nga medyo delikado na kaayo nga mahulgan og debris apan gimantinilan lang og straw sa mga court personnel aron way tawo nga mag-standby sa ubos nga posibleng mahagbungan sa mga tipak.
In fairness ni Judge Tormis biktima siya sa “overkill” kun tinuod man nga lain kining frame-up batok kaniya.
Ang ako ba, unsa may proseso sa Korte Suprema sa panahon nga duna silay taktakon nga huwes ug mga kawani?
Unsa man, deretsohon na lang ug palayas nga way proper turnover ug inventory sa mga dokumento, sa mga ebidensiya ug sa ubang government properties?
Puwera buyag gyud hinuon ning court room ni Judge Tormis nga posibleng dunay daghang magic nga mahitabo tungod kay dili siya maayo og relasyon sa iyang clerk of court.
Hinuon gipa-imbestigahan kini karon ni MTCC Executive Judge Francisco Seville ug mahug nga suspect ang tanang mga kawani sa MTCC Branch 4 sa pagka-missing sa mga armas tungod kay sila ra man diha ang makasulod-gawas sa court chamber.
Kun gituyo gyud kadto pagkawat sa usa sa mga opisyal o kawani diha a MTCC Branch 4 sayon ra kaayong makagawas sa Palace of Justice ang mga armas kay way inspection sa mga bag panahon nga mogawas ang mga nag-okupar sa building.
* * *
Naluoy ko sa kahimtang karon ni dismissed MTCC Judge Rosabella Tormis kinsa mipatulo sa iyang mga luha samtang miistorya sa iyang sitwasyon karon nga puwerteng paeta na gyud.
Sumaa pa ni Judge Tormis nga tungod sa kalisud kay wa na siyay madawdaw ug naglibog kun asa paingon, napugos siya paghukom nga paundangon na lang sa pagpainom og tambal ang iyang bana nga gikan naospital.
Matud sa huwes nga andam na siyang modawat og labada aron lang mabuhi.
Iyang gipadayag nga nahiubos lang siya sa ubang tawo nga iyang gitabangan kaniadto unya karon dili na niya maduol.
Nagplano unta siya nga manarbaho sa gawas apan nawala iyang passport og medyo alanganin na sab iyang edad nga anaa na sa 63 anyos.
Gani matud niya nga bisag dili siya ma-disbar sa pagkaabogada maglisud na siya og practice tungod sa pangidaron.
Apan sama sa akong giingon kaniya nga samtang may kinabuhi pa duna pay paglaum ug Ginoo ray nasayod sa tanan.
Kumbate, your honor!
* * *
Wa sab gyud ko malipay sa usa ka court personnel nga mitalaw ug mikakak pag-testigo bisag nakakita kang dismissed PO3 Geoffrey Borinaga nga maoy mipusil-patay sa traffic enforcer nga si Armando Daligdig.
Abi ba nako nga andam siyang motabang sa pamilya sa biktima nga maoy una niyang gisaad.
Miusab na ang maong kawani sa iyang version. Ang original niyang version nga nakakita gyud siya ni Borinaga pagpusil ug segurado gyud siya sa kanhi pulis.
Apan dihang giadto sa mga pulis aron kuhaan og affidavit miingon na siya nga wa na siya makakita ug mipasabot nga ang iyang nasaksihan mao na lang ang pagkahagba sa traffic enforcer.
Wa gyuy ayo! Maayo lang ning tagakorte manawagan sa publiko nga motestigo unya karon nga sila maoy nakatestigo sa krimen dili na magpakabana. Unsang klase?
* * *
Congratulations sa akong mga ka team mates sa GMA-7/dySS Super Radyo nga bisan kuwang kaayo sa mga players midaug gihapon mi batok sa hiniusang puwersa sa The Freeman/Cebu Daily News sa ikatulong semana sa among elimination round sa Newsmen Basketball Association (NBAC).
Pero puwera buyag nga bisag wa sab sila makompleto nakaapas gyud hangtud nga gamay ra sab kaayo mi og labaw. Kung taas pa og oras segurado ming pilde kay nangaluya na sab mi ug wa na manulod among mga itsa.
Sa first game kagahapon sa NBAC diha sa Cebu Eastern College (CEC) midaug sab ang combined team sa Sun.star Daily-Super Balita ug dyMF Bombo Radyo batok sa CCTN-47.
Again, salamat kaayo nila ni Sir Chester Cokaliong sa Cokaliong Shipping Lines ug nila ni Sir Jeff Go, Sir Sammy Sia ug Sir John Maraat sa CEC tungod sa ilang way putol nga suporta namong mga working press.
