Dumistik sa Hong Kong, salida’s Hapon

Duna gyuy panahon nga lisud isugod og suwat. Dili kay way panghitabo o walay nindut nga isturyahan. Usahay mahitabo nga wa kay ikasukli sa mga panghitabo. Ang tanang butang nga buot mo isulti nasulat na sa uban. Duna say usahay nga wa kay alamag sa pinakaimportante nga hitabo. Unya usahay may mga topic nga ang akong pagka Bisdak dili maka connect, dili ka relate.

Ingon niani na usab ang nahitabo karon nga ga-atubang akos deadline. Dunay mga interesting nga developments pero murag walay usa kanila nga muhaum sa akong panghunahuna karon para mahimuan ko og lindug. Sama panaglit ning kaso nga paminawon sa Hong Kong karong buwana.

Usa ka Evangeline Banao Vallejos mipasaka sa korte sa Hong Kong sa iyang hangyo nga mahimong permanent resident sa maong lugar. Kini iyang gibuhat tungod kay nagkanayon ang mini constitution sa maong lugar nga ang mga langyaw nga nakapuyo og pito ka sagunsong tuig sa ilang lugar mahimo na nga permanent resident nga nagpasabut nga makabutar na sila ug makakuhag mga benipisyo gikan sa kagamhanan didto.

Kon kining maong balaud maoy tumanon permanent, resident na unta si Vallejos kay sukad pa man niadtong 1986 nanarbaho siya sa Hong Kong isip domestic helper. Kadaghan ning mi-apply si Vallejos apan kanunay siyang balibaran sa immigration authorities sa Hong Kong. Tungod kini kay ubos sa ilang immigration law walay labot ang mga domestic helpers ning maong mando sa ilang constitution. Daw usa ka class legislation issue ang nahitabo ning maong bahin sa ilang immigration law. Ang gihadlukan sa China nga kon maaprubahan ang hangyo ni Vallejos daghan na unya kaayong domestic helpers nga di lang mokuha og permanent resident status modala pa gyud unya sa ilang mga anak ug pamilya sa maong lugar.

Dunay miingon nga discriminatory ang maong balaud kay duna may mga nanarbaho sa banko ug mga magtutudlo nga langyaw nga nakapahimus na ning maong balaud apan nganong dili man tugutan ang mga domestic helpers nga makapahimus niani tungod ba sa ubos nga panan-aw sa mga taga didto sa ilang trabaho.

Gikaingon nga ang Hong Kong maoy pinakamaayo mo tratar sa dmoestic helpers mao nga daghan ang nanghinaut nga paboran si Vallejos sa iyang hangyo.

Tingali ang leksyon nga makuha niani sa mga mamunuan mao nga dili paghimug balaud sa hamubo lang nga panglantaw kay daghan ang mahiubos kon dini mapatuman sa angay.

* * *

Kon kinsa man ang namunuan sa miaging Japanese Film Festival sa Ayala Cinema 4 kinahanglan tingali nilang konsultaon ang Arts Council of Cebu para mas mahapsay ang pagda nila ning maong kalihukan.

Sa mga milabay gud nga Japan film fest sa ato diyutay ra kaayo ang manan-aw, mao nga kompynsa ra kaayo sila ug gani wa nay tikitay, kay total libre man kini. Apan ang ilang film fest sa miaging semana gidagsa mag bagang panon natarantar sila. Una gahimo silag ticket. Apan mikalit silag ka istrikto usa ra ka tiket ihatag sa matag tawo. Kinahanglang ikaw mismo ang mokuhas imong ticket. Okay ang concept niani apan sa actual implementation mayagaw kini. Kay kasagaran gud sa manan-aw og sine pundok o paris man. Kon ikaw makauhag ticket pero wala ka kuha ang imo untang kuyog di kana lang mosulod sa sinehan kay tugkag varicose og hinuwat ang imong kauban nga nahabilin sa gawas. Apan lagi kay nindut man kaayo ang ilang pasundayag daghan kaayo gihapong nidugok bisag wa nay ticket.

Tingali mi-panick sila nga pagka Sabado ug Domingo, alas kwatro pa ila nang gipanghatag ang ticket para sa alas syete nga pasundayag. Ang kadto intawong miadtog alas sais wala ka kita sa ilang giatngang pasundayag. Kinsa man gud intawoy gaplano motan-aw og pasundayag nga mokuha nag ticket duha ka oras sa wa pay salida. Lupig pay airport.