Space

Dunay mga dakbayan sa Japan karon, matud pa sa taho, diin may mga ad agencies nga migamit sa paa mga dalaga didto isip advertising space. Natural mag-mini skirt kini sila para makita ang advertising sticker nga gipapilit sa ilang paa.

Nakahinumdom ako niadtong mga ga-mini skirt sa Gorordo Avenue, atbang sa The Wineshop. Hinuon walay stickers ang ilang legs apan space ang ilang gibaligya–house and lot sa Camella Homes.

Samtang sa outer space, gikataho nga dunay igong tubig ang planeta nga Mars nga igong makahatag og kinabuhi. Dili tingay kini paigo para ibuhi og mga tawo apan igo na kini nga mopabuhi og microbyo ug uban pang microorganism.

Dili lang telegrama, beepers ug postal system ang gipatay sa cellphone ug computer kon dili lakip na ang gitawag nilag “real space.” Tungod sa teknolohiya naminusan ang impluwensya ning gitawag tag “real space.” Niadto kun naa kas Labangon ug ang imong higala tua sa Oslob ug ang iyang uyab tua sa London natural nga kamong tulo di magkaistoryanahay. Bisag unsa mog syagit di gyud mag dunganay. Ang iro na lang sa silingan maoy mopaghot pagtubag kaninyo. Karon basta lang may signal ang imong suok mahimo na mong maglalis ug manglibak bisag wa moy magtupad.

Ang space o luna mohatag kanimo og gahum ug katungod. Mao kini karoy tumong ning usa ka Jamalul Kiram nga buot moangkon sa Sabah sa Borneo (nga sakop sa Malaysia) isip sultan sa Sulu. Kay sa wa pa kuhaa sa mga Kano ang maong dapit niadtong 1710 ang banay man sa Sultan niadto ang tag-iya niani. Gaabang karon sa Sultan ang maong nasud mao nga gatuo siya nga ila kini. Ambot kun nganong giokupahan nila kini karon, basig mangayo silag omento sa abang.

Usahay ang luna maoy hinungdan sa kagubot ug kamatay. Sa katapusang ihap dose na ka sakop sa sultan ang namatay ug unom ka pulis sa Malaysia ang nakuhaan sa kinabuhi tungod ning maong space o luna.