Maayong Pasko Kanatong Tanan!

Atong sugaton karong gabii ang Pasko sa tumang kasadya ug pagmaya pinaagi sa pagpangaliya sa Kahitas-an nga hatagan kita kanunay sa  maayong  panglawas, ilikay sa disgrasya ug sa mga dagkung kataladman.

Atong pangayoon Kaniya ang  dakung grasya sa gugma, panaghiusa ug  pagsinabtanay alang sa kalinaw sa tagsa-tagsa ka pamilya.

Manghinaut ko nga kitang mga dagku di mapakyas paghatag ug pahimangno ngadto sa mga bata nga dili gyud maayong magpabuto gamit ang mga firecrackers nga makasunog ug makadisgrasya sa kinabuhi.

Maglaum sab ko nga  magpakaresponsable kadtong dunay mga armas nga di gyud gamiton sa pagpabuto aron pagpreserbar sa kinabuhi niadtong mga inosente.

* * *

Padayong giatake sa Simbahan ang mga kongresista ug mga Senador nga  mipabor pagpasar sa kontrobersiyal nga Reproductive Health (RH) bill.

Niadtong Domingo sa Misa De Gallo ni Fr. Jun sa Saint Therese Parish Church nagsentro sa diskusyon sa pagbaton og anak ni Isabel nga si Juan kinsa gihulagway nga ang bata gasa gikan sa Diyos.

Iyang gitahagan ug bililhong meaning ang acronym nga BATA. Ang “B” nagpasabot nga “Blessing” o gasa.  Ang unang “A” nagpasabot nga “Acceptance” nga buot ipasabot kinahanglang dawaton ug dili ipalaglag. Ang letter “T” nagpasabot nga “Treasure” o bahandi ang bata ug ang katapusang letter “A”  mao ang “Attribution” nga nagpasabot  kay ang bata usa ka gasa ug kinahanglang sabton ang iyang batasan kay replica siya sa Diyos.

Ang paglakbit sa pari sa isyu sa bata mao ang pagmahay sa Simbahan karon nga kun kanang bataa  nahimong kongresista ug senador nga nakigsumpaki sa practice sa simbahan  pinaagi sa pagpasar sa RH bill nga misukwahi sa pagpreserbar sa kinabuhi sa  hinatag sa Ginoo.

* * *

Sama sa akong gibalik-balik nga legal kining suspension ni Gov. Gwendolyn Garcia tungod sa lagda  nga ang presidente sa nasud dunay  disciplinary power sa tanang mga local chief executives basi sa balaud.

Apan ang issue dinhi mao ang “propriety ug delicadeza” ngan nga ang modisiplina usa ka “political animal”  ug kontra sa politika ang pahamtangan ug suspension nga laing “political animal”.

Mao nga di ko maglibog sa  pag-interpret niining mga butanga nga usa ka “political harassment” kining  maong suspension ug klaro sab nga usa  kini ka “power grab” sa kasamtangang  administration aron pag-neutralize ug  pagpiang sa “One Cebu Party” ug sa “United Nationalist Alliance” sa  nagsingabot nga midterm election ug  pangandam sa sunod nga tulo ka tuig alang sa presidential election.

Insakto gyud kining  panultihon  sa atong mga katigulangan nga sa politika  wa kay permanenteng  kaaway ug wa kay permanente’ng  higala ug kauban.

Apan ang anaa kanunay mao ang personal nga  interest sa tawo pag-angkon og mas gamhanan nga katungdanan.

Abir kun nagpadayon pa ang pakig-uban  ni Vice Gov. Agnes Magpale sa “One Cebu Party”, mangahas pa kaha ang  Malacañang ug si Interior and Local Government Secretary Mar  Roxas pagsuspenso ni Gwen?

Kun kaalyado pa si Gwen ni Noynoy  Aquino may “political will” kaha ang  presidente pagsuspenso?

Akong klarohon nga duna koy respeto sa Presidente apan wa na koy salig sa uban niyang mga kaalyado sa pulitika nga may sab kaayog mikabayo karon.

Bisan kining pagmakuli ni suspended Governor Garcia pagkanaug sa Kapitolyo maisip kining pamolitika nga lakang aron pag-proteher sa ilang kampo.

Gani nabalaka ko nga gamayng sipyat  sa implementation niining suspension order adto kini mo-boomerang sa Presidente nga laing “Hongkong national hostage crisis” nga  puwerteng palpaka kaniadto.

Delikado gyud baya kining saad ni Gwen nga andam niyang pakamatyan kun pugson siya pagpalayas.

Mao nga nakasabot  ko nilang Philippine National Police in Central Visayas Regional Director Marcelo Garbo  ug  bisan  ni Acting  Governor  Agnes Magpale nga mipatuman  ug “maximum tolerance” niining  pagpadayon ni Gwen sa iyang buhatan.

Tan-awa ra kun unsa na kaalegre ang politika sa nasud kay mismo si kanhi presidente Erap Estrada, Vice President Jejomar Binay, Senate President Juan Ponce Enrile, senator Ernesto Maceda ug Cebu City Mayor Michael Rama nga taga United Nationalist Alliance (UNA) mibisita sa suspended governor agig pagsuporta ug sila mihulagway nga usa gyud ka “political persecution” kining  pagsuspenso.

Gani naobserbahan kagahapon nga nagminaldita na sab si Gwen nga unang  nakit-an niadtong Biyernes nga mapahiubsanon human gibisita ni Cebu Archbishop Jose Palma.