Nadaut sa Bible study
“Oh no, don’t make no promises
Oh no, your body can’t keep”
— Scorpions
“I’m going through changes
I’m going through changes”
— Black Sabbath
Niadtong adlaw ni Pedro Calungsod diri sa Mambaling, gipangutana ko sa akong higala sa “Type O” kon okay ra ba nga butangan og “Type O” banner ng among tugkaran. Mibalibad lang ko kay di ko buot nga politically affiliated ang among tugkaran. Labi na kay wa ko marehistro.
Pero niadtong adlaw sa ikaupat nga panagabangga ni Pacquiao ug Marquez, gihatdan mig hopia nga ube nga may logo sa “Type O” ang karton. Wa dayon namo hutdag kaon bisag lami kaayo kini kay maayo na lang isuwa sa kape samtang motan-aw sa Pacquiao-Marquez replay. Pero as we all know by now wala nay giganahan nga motan-aw sa replay.
Morag malupigan sa preparasyon si Marquez aning Type O. Kay kon si Marquez miagig upat ka buwan ug tunga nga pangandam ug pa-conditioning, ang Type O niadto pang summer nangandam unya sunod summer pa ang ilang sangka.
Sama kang Marquez determinado usab kaayo ning Type O nga ma-knockdown ang imong kabubot-on ngadto kanila. Gilaliman kag hatdan kag hopia atol sa fight ni Paquiao?
Apan unsaon ta man nga napildi man intawon si Pacquiao ug mao nga gabii na lang nako gitiwas pagkaon ang hopia nga ube sa “Type O.”
Napawong ang panan-aw ni Pacquiao human gisugat ang iyang suwang sa right hook ni Marquez. Daghan nga gisugyot nga hinungdan sa pagkahapla ni Pacquiao. Ang gauna niani mao ang kompyansa. Ug kay sa katapusang segundo man siya maigo, motuo ako niani. Nidasdas si Pacquiao apan nalinga siya kay tingali gatuo nga padung na lang sa duotduot sa lawas ang mahitabo una mobagting. Apan nakuotan siya.
Lakip sa laing mga gisugyot nga hinungdan sa kapildihan mao ang gidudahang paggamit og performance enhancing drug ni Marquez nga mipadaku sa iyang lawas ug mihatag kaniya og dugang kusog. Ang lain pang giingon nga hinungdan mao ang pag-usab ni Pacquiao og relihiyon.
Sa di pa ka mokatawa kabahin ning pasangil sa relihiyon hinumdumi nga gatubo si Pacquiao nga Katoliko, usa ka luag nga simbahan nga mosabot ug mopasaylo sa mga bisyo sa mga sakop niani. Sa Katoliko pa si Pacquiao moinom siya, mo-casino, mamiga, mo-basket, mosabong, mo-concert, mokiat. Karong “Born Again” na siya, Bible study na lang ug boxing maoy giatiman. Ug kon sa Ininglis pa –All work and no play makes Jack a dull boy.
Niadto magpunay og kiat si Pacquiao mao nga inig saka niya sa ring kulbaan siya og tungod ning maong kulba alerto siya. Karon relax na kaayo siya. Ug sa sport, labi na sa boxing, dili ka maka-afford mo-relax.
Kay ang relihiyon usa man ka lifestyle mao nga kun magusab kag relihiyon mausab usab ang padagan sa imong kinabuhi ug mausab usab ang imong pulso.
Ang akoang tambag sa “Type O” nga kun mahimo di sila mo-join og Bible study kay basig mawa ang ilang kadasig ug basig ma “praise be the Lord” na unya ang ilang meeting de abanse.
