Salamat nga wa kaayoy danyos

Sa pagsuwat ning akong lindog kagahapon duna nay pipila ka mga kompirmadong patay ug nangaangol didto sa Mindanao sa bagyong si “Pablo”.

Kini basi sa report ni Executive Director Benito Ramos sa National Disaster Risk Reduction and Management Council (NDRRMC).

Matud sa lain nakong mga tinubdan dunay namatay nga babaye didto sa Davao Oriental nga si Erlinda Bolante ug dunay bata  nga giingong namatay human natumbahan og lubi didto sa Valencia, Bukidnon.

Laing inisyal nga balita dunay laing namatay nga si Ferfer Colluzo usa ka computer technician nga taga-San Isidro Jimenez, Misamis Occidental kinsa nahugnoan og kahoy samtang nag-motor gikan sa Oroquieta City samtang  paingon nang mouli.

Duna  say  nagpahibawo kagahapon nga dunay  natumbahan og lubi  didto sa Boljoon, Cebu diin gidala  diha sa Vicente Sotto Memorial Medical Center kay matud pa grabe.

Gawas niini dunay motor banca nga giingong nalunod sa Santander, Cebu ug may pagbaha sa Guindulman, Bohol.

Daghang mga pasahero sa barko ug eroplano ang na-stranded tungod kay wa tugti nga maka-operate.

Sagad sa among mga tigpaminaw sa Mindanao nagpahibawo   intawon nga  nangahapay  ang  ilang kahumayan.

Tungod  usab sa forecast sa Philippine Atmospheric Geophysical and Astronomical Services Administration (Pagasa) Mactan pinaagi kang Director Oscar  Tabada nga moigo ang bagyo kagahapon gikan alas-5 sa hapon ngadto sa alas-7 sa gabii daghang mga trabaho ang gipang-suspenso aron makauli ug maka-andam ang mga trabahante.

* * *

Alang nako mas maayong i-preserve sa Cebu City Government ang  templete ni San Pedro Calungsod diha sa South Road Properties ug dili  gyud  ibaligya ang lugar nga gitarukan.

Mas maayo man gani nga lig-onon pa ang templete aron molungtad kini og handumon matag tuig sa maong lugar ang canonization ni San Pedro.

Kun naka-establisar ug chapel alang kang San Pedro ang mga dagkung kompaniya sama sa SM way rason nga dili makahimo ang gobyerno inabagan, sa atong taga-Simbahan.

* * *

Dunay akong amigo nga nangutana  gyud  kun nganong  wala  hatagi og bili sa mga kadagkuan sa Simbahang Romano Katoliko didto sa  Vatican kun nganong wa tun-i nga himoong Santos si Ferdinand  Magellan.

Sa history man gud  si Magellan gipatay ni Lapu-lapu diha sa Mactan kinsa maoy nangulo sa mga Katsila nga mianhi sa Pilipinas pag-introduce sa Kristiyanismo.

Pero in fairness sa taga-Simbahan, sukad sa tuig 1521 human napakyas  si Magellan pagpukan  kang Lapu-Lapu  wa gyuy mga  milagro si Magellan bisan pa kun  siya maoy nangulo.

Ang mga istorya  kaniadto  mipatigbabaw nga si Magellan wa gyud tugahi og grasya sa Diyos tungod sa iyang  kahakog sa pagpangangkon og teritoryo, pagpangalap og mga lamiang lamas ug pagtagbaw sa ilang  pakighilawas sa atong mga kababayen-an.

Mas gitugahan  pa og grasya ang ka sakop sa hugpong ni Miguel Lopez de Legaspi nga  si Juan Camus kinsa maoy naka-diskobre sa imahin ni  Senyor Sto. Niño.

Mao nga taliwa nga sila ni Magellan maoy nagpasiugda sa Kristiyanismo ug pagkakaplag sa image ni  Senyor Santo Niño apan dili sila takos  nga  makaangkon  sa pagkasantos kay namodmod sila sa mga buling sa pagpakasala ilabin ang pagpanaug-daug sa mga Pinoy.

Ang santos dili  manaugdaug  kun dili  siya maoy daug-daugon. Mao bitaw nga bulahan kadtong mga tawo nga gidaug-daug kay bililhon  siya ug pinangga sa  Diyos.

* * *

Mas maayo gyud nga dunay lahugay sa tanang mga election officers  sa nasud aron way mga  pagduda sa resulta sa eleksiyon.

Lisud gyud kun dudahan sa trabaho kay bisan unsaon pagtinarong   di gyud masaligan ilabina kun duna nay mga nahitabo sa panikas ug  pagka-biased.

In fairness sa ubang mga election officers nga  nagtinarong  dili gyud  malikayan nga pasanginlan nga dunay gipaboran  nga  politico ilabina nga sud na ang pamilya ug nang-gungis na sa serbisyo.

* * *

Delikado man tuod nga mapildi karong Domingo si Pambansang Kamao Manny Pacquiao sa ilang ikaupat nga panagharong ni Juan Miguel Marquez apan mag-ampo gihapon ko nga  si Manny gihapon ang modaug ug hatagan siya ug igong  kusog.

Bisan unsaon, daku gyud natong garbo nga modaug si Manny ngan  nga Pinoy.

Aron tingali nga wa nay mo-kuwestiyon, kinahanglang ipakita ni Pacman ang tibuok niyang kusog aron mawala na ang mga hinambog ni Marquez ug aron ipakita niya sa tibuok kalibutan nga siya gyud ang tinuod nga kampiyon.