Originality Blues

Niadtong apil pa ko sa Sunstar Weekend, ang akong amigo nga si Bob Lim mimugna og “suroysuroy”issue diin may pipila ka inlang mga tao sa katilingban among gipatampo kon asa sila mo suroy o mo tambay sa ilang free time.

Diri sa CDN misuway akog street photo essay. Kon wa ako masayop maka upat kadto mapatik. Ug kay nakabantay man ko nga wan a gamita ni Bob ang maong ulohan gigamit ko na lang usab kini. Mao nga ulohan sa akong photo essay mao usab ang “Suroysuroy”.

Pila ka tuig ang milabay gigamit sa Provincial Capitol ang “suroysuroy” para sa ilang province wide travel campaign. Nahimo kining “Suroysuroy Sugbo.” May mipasiaw nga gikopya kuno sa kapitulyo ang akong “suroysuroy.” Gitubag ko sila nga dili akoy original niani kay kinopya ko ra sab ni kang Bob Lim.

Niadtong tig contribute pa ako ni Pura Kintanar sa Lifestyle section sa SunStar naghimo akog section nga “Pop Life.” Usa ka gaan nga pahina diin gihisgutan ko ang mga activity sa mga writers, athletes, painters, models ug musicians sa atoa. Kay kasagaran gud sa mga taho kabahin sa mga tao puros man national o foreign mao nga na ingganyo ko paghimo og pahina para sa mga inila nga locals (nga dili politico).

Pag-abot nako diri sa CDN, gimingaw ako ning maong pahina mao nga misugyut ako sa among Lifestyle editor nga mahimo kami og annual “30 below 30” section. Kada tuig mo-feature kami og 30 ka mga Sugbu-anon nga ubos sa edad nga 30 nga nagmalampuson sa ilang mga gipangbuhat. Daw orig ang maong concept apan sa tinuod lang murag nakopia ko ang idea gikan sa pipila ka gawasnong basahon. Di na lang ko makahinumdom kon unsang publication ang naka inspire nako pero medyo common year-ender device ang listings of just about anything niadtong panahuna.

Ug karong semanaha may mitawag sa akong attention nga gikopya kuno sa Sunstar ang atong “30 below 30” nga year ender. Nag “30 below 30” ang Sunstar karong tuiga kay 30th anniversary man karon nila. Ok ra na, giingnan ko sila, maghimo lang nya tag “40 below 40.”

Dili ta angay mahasi niani gani malipay ta kay nauna kitag pila ka tuig. Mura niya tass akong amigo nga si Yo Emperado nga pwerte gyung bagulbol nga may laing mga banda nga migamit kuno sa “iyahang” “gugmang giatay.” Diha man guy rap number si Yo niadto nga nag ulohag “Ulipon sa Gugmang Giatay.” Ug mga pipila ka tuig nga milabay ang mga band nga “Inchi” ug “Young Ambassadors” duna say mga kanta nga “Gugmang Giatay.”

Pero dili anagy mahasi si Yo niani kay nahitabo usab kini kang James Taylor. Dihang under pa siya sa Apple Records sa Beatles mi release siyag kanta nga “Something in the Way She Moves.”  Mao kini ang opening lyrics: “There’s something in the way she moves/Or looks my way, or calls my name/That seems to leave this troubled world behind.”

Tingali sa tantong pinaminaw daw na hypnotize si Beatle George Harisson ning maong kanta nga naghimo sab siya og “Something.” Ania ang lyrics ni Harrison: “Something in the way she moves/Attracts me like no other lover/Something in the way she woos me/I don’t want to leave her now/You know I believe and how.”

Si Steve Jobs grabe ka fan sa Beatles. Ug mao nga wa siya ka pugong gigamit niya nga ngan sa iyang kompaniya ang record label sa Beatles nga “Apple,” diin maoy mipagawas sa “Something In The Way She Moves” ni James Taylor ug “Something” ni George Harrison para sa Beatles.

Dili tingali kita anagy maguol kon makopya o maunhan sa atong mga plano kay matud pas akong guru nga si Sawi Fox –“There’s more from where it comes from.”