Sugbuanon ang matudlo pagka NFA administrator?
Nalipay ko sa gitug-an ni Consolacion Mayor Theresa “Nene” Alegado niadtong Sabado atol sa among programang “Dialogue on the Air” sa dySS Super Radyo nga dako ang posibilidad nga si officer-in-charge National Food Authority Administrator Vic Jarena maoy matudlo pagka NFA administrator.
Silang mga retailers tibuok nasud mosuporta kang Jarena tungod kay kwalipikado siya sa maong katungdanan ug ligdong sab nga klaseng opisyal.
Si Jarena residente sa dakbayan sa Mandaue kinsa nakaserbisyo kaniadto isip NFA-7 Regional Director.
Akong nahibaw-an nga si Mayor Alegado kinsa nakaserbisyo sab isip presidente sa Grain Retailers Confederation of the Philippines (Grecon) maoy unang gitanyagan sa maong katungdanan apan mibalibad kay iyang unahon ang kalambuan sa iyang lungsod diha sa Consolacion.
Samtang giklaro ni Cebu Customs Collector Ronny Silvestre nga dili tinuud ang isyu nga mi-grabe karon ang rice smuggling dinhi sa Sugbo.
Si Collector Silvestre nga akong na-interview via phone sa maong programa nga nagtuki bahin sa “rampant rice smuggling” miingon nga ilang gitutokan pag-ayo ang tanang matang sa palusot ug pagdunggo sa mga barko sa lain-laing mga international ports.
Hinuon matud niya nga posibleng dunay mga nakalusot nga mga smuggled rice.
Matud pa usab ni Deputy Customs Collector Ahmed Erpe nga bisag wa silay jurisdiction sa ubang mga pantalan apan duna silay katungod nga mohiling sa mga karga sa barko ilabina kun makadawat sila og impormasyon nga dunay smuggling.
Bisan si Mayor Nene Alegado sa Grecon miingon nga wa gyuy rice smuggling dinhi sa Sugbo.
Apan di malikayan ang mga pagduda nga dunay smuggling tungod sa kadaghang bugas nga maabot karong bag-o.
Akong nahibaw-an nga di gyud magutman kitang mga Sugbuanon karong Pasko kay dunay 3.2 million ka sako’ng bugas gikan sa Vietnam.
* * *
Nagtuo ko nga may emergency kay kusog kaayong nakapadagan samtang nagdulhog ang usa ka awto nga kolor puti gikan nga nagpatubil sa 2010 gas station duol sa barangay hall sa Busay.
Ako nga paingong magpatubil napugos intawon og padaplin aron paglikay sa disgrasya.
Apan dihang nakapaduol nako sa pump boy akong nadunggan nga gikasab-an siya sa ilang cashier kay nagpasagad lang og dawat sa gibayad nga P1,000 nga fake money niadtong puti nga awto nga nagpatubil nga akong gikabagat.
Swerte lang nga nakuha sa ilang security guard ang plate number mao nga akong gitabangan intawon ang mga kawani nga mapa-alarma sa kapulisan.
Apan nakalusot gyud ang driver kay wa na igkita sa mga mirespondeng pulis.
Akong nahibaw-an gikan sa management sa maong gasoline station nga ila nang nahibaw-an ang tag-iya sa maong sakyanan ug nakakuha sila og impormasyon nga kadtong maong sakyanan kanunay nang mipalusot og peke nga kwarta.
Maglaum ko nga tinud-on kini sa kapulisan pagsubay aron pasakaan og kaso ang tawo nga responsable.
Paita gyud sa panahon karon kay daghan nang mangingilad.
Didto sab sa dakbayan sa Talisay dunay Joavan Fernandez nga adopted son ni Mayor Socrates Fernandez nga pwerteng abusadoha nga magpatubil nga way bayad-bayad ug mamusil kun di tubilan.
* * *
Salamat sa Kahitas-an nga milampos gyud mi kagahapon pagpildi sa taga TV-5 sa ikaduhang higayon sa duwang basketball sa best-of-three championship series sa Newsmen Basketball Association (NBAC) diha sa New Cebu Coliseum.
Ang kadaugan namo kagahapon batok sa TV-5 maoy hinungdan nga kami gyud sa GMA-7/dySS ang mi-champion sa gipabalik nga torneyo sa NBAC.
Kini maoy ikalima namong higayon pag-angkon sa kampyonato sa NBAC.
Apan bilib ko sa taga TV-5 kay mga praktisado gyud ug di gyud ka-kompyansahan ug gani gidoble nako ang akong kusog pag-depensa kagahapon sa ilang sinaligan nga si Noel Sanico.
Crucial kaayo ang duwa kagahapon sa naghinapos nga bahin sa fourth quarter kay ligas lang og half-shot ug one point.
Apan tungod sa teamwork sa opensiba nilang Super Gabriel Bonjoc, Jun Solon, Godfrey Rellin ug Renan Quiñones maoy nakapalawos sa among pagkakampyon.
* * *
Happy Fiesta diay sa akong mga tagi-barangay diha sa Casay, Dalaguete, Cebu nga nag-bisperas kagahapon ug karon ang kahulogan sa among mahal nga patron San Vicente Ferrer.
Mangayo gyud ko og dispensa nga wa ko makalusot kay nagaid sa sitwasyon nga di kalikayan.
Unsaon man nga natayming man nga ting-exams sa akong mga anak karong adlawa ug ugma.
Nasayod na gyud ta basta ting-exams maoy tingbayad sa tuition fee mao nga naapiki ko.
Hinuon pwede pa ko makapanagkot sunod Domingo kay ang mag-piyesta sa mao gihapong patron mao ang Sitio Dakung Balas barangay Casay diin nahimutang ang sikat kaayo nga Argao Beach Club.
* * *
Salamat sa tanang misuporta sa gipahigayong concert for a cause sa Cebu Federation of Beat Journalists niadtong Biyernes diha sa kampo sa Cebu City Police Office alang sa among mga kaubanan sa buhat nilang Jose Marlon Belleta, Bong Soriano ug Sammy Yncierto.
Again akong mga pahasubo sa pamilya ni Marlon nga gilubong na diha sa Pardo kagahapon.
Mas maayo man gani nga dunay part two aron sab makapahigayon ang CFBJ ug dugang proyekto alang sa mga nanginahanglan.
