Kinahanglang ibalik ang death penalty

Nahinuklog kaayo ko sa mga ginikanan ni anhing Cyrish Magalang kinsa bag-o lang nga migradwar isip cum laude sa University of Santo Tomas (UST) unya gi-attempt paglugos sa magsoon unya gipatay didto sa Bacoor, Cavite.

Grabe ka-brutal kining maong krimen kay nakaangkon og 49 ka samad dinunggaban sa lawas si Cyrish ug gidakdakan pa og semento ang iyang ulo sa mga banyaga dihang gipanalipdan ang iyang pagkababaye.

Pagkasayang sa kinaadman ni Cyrish. Daku pa unta kaayo siyag  matabang sa  pamilya ug sa komunidad nga iyang alagaran.

Ang magsoong Rolin ug Roel Gacita Jr. pulos nangangkon na sa  krimen human dunay mga saksi ang mitumbok kanila ug  gani nakuha gyud sa ilang panimay ang mga butang sa biktima.

Simple kaayo ang tubag sa duha, nga kuno ilang nahimo ang sinalbahis kaayong krimen tungod  kay hubog ug sabog sila sa shabu.

Nangayo pag dispensa ang mga kanahan ngadto sa mga ginikanan  atol sa inquest proceedings.

Bisan si kinsa sigurong ginikanan di gyud makadawat sa pagpangayog pasaylo sa duha.

Maayo man gani nga di na lang ipaagi og due process kining managsoon ug deretsohon  na lang pagtuslok og dagom!

With all due respect sa mga pro-life, angay sab siguro nilang  huna-hunaon nga ang pagbalik sa silot kamatayon maoy labing epektibo  sa pagpreserbar sa kinabuhi niadtong wala pa mabiktima.

Unsa pa may ipreserbar kun  gawasnon kining mga criminal ug mga salbahes nga way kahadlok nga mopatay sa mga inosente?

* * *

In fairness diay ni Engr. Danilo Gabiana kanhi hepe  sa Division for the Welfare of the Urban Poor (DWUP) Cebu City Hall, kinsa nadestino  na karon isip pangulo sa garbage  collection sa Department of Public  Services (DPS), iyang gipanghimakak ang mga alegasyon sa mga  nag-okupar sa Citi Center Commercial Complex, barangay Kamagayan bahin sa  pagdawat niya og pasiunang bayad nga tag-P5 mil alang sa relocation site didto sa dakbayan sa Mandaue.

Andam niyang atubangon ang bisan unsang imbestigasyon nga  ipahigayon sa Cebu City Hall kay matud  pa niya sa akong mga kaubanan sa buhat nga limpyo ang iyang konsensya.

Gani matud niya nga diha say mga laing alegasyon kaniadto batok kaniya nga wa molampos kay  way klarong basihanan.

Gipasabot usab ni Gabiana nga niadtong siya pay nagdala sa DWUP daghan gyud ang iyang natabangan ilabina kadtong  nagkinahanglan sa iyang mga tabang.

Alang nako, mas maayong ipaubos si Gabiana sa formal investigation kay  niadtong Sabado atol sa among  programang  “Dialogue on the Air” sa Citi Center pwerteng pangugat nila ni Joselito  Cabaguing ug  mga kaubana ug miinsister sa iyang alegasyon nga nangolekta gyud  kanila og tag P5,000 thousand si Gabiana.

Kagahapon nanawag nako si Elly Espina sa Public Information Office sa City Hall ug nangayog complete name sa miakusar kang Gabiana  mao nga akong gihatag ang  pangan  ni Joselito Cabaguing.

Kun mohimakak man si Cabaguing sa  iyang alegasyon andam ang tape-on-air sa “Dialogue on the  Air” sa dySS Super Radyo nga maoy  mopalig-on niini.

Magpasalamat lang ko nga tinud-on ni Mayor Michael Rama ang pagpa-imbestigar kang Gabiana aron maklaro kining tanan.

* * *

Salamat ni Father Dan Delos Angeles nga iya kong gihatagan og usa  ka religious item nga iya ni San Pedro Calungsod nga gikan pa gyud sa Vatican City sa Rome, Italy.

Maayo na lang nga pinaagi niini modagsa pa ug madugangan ang gugma, kalinaw ug grasya sa akong  pamilya.

Misugilon kanako si Fr. Dannga dili magdugay, ang sunod nga  i-canonize mao si Blessed Pope John Paul II.

Usa sa mga gi-workout karon ni Fr. Dan mao ang paghangyo sa mga tagdumala diha sa Asiatown IT Park, barangay  Apas ning dakbayan nga  magbutang kita og shrine o magtarok og estatuwa sa miaging Santo Papa diha mismo sa gibarugan sa NEC building kay diha nagpahigayon og Santos nga Misa kaniadto si Pope John Paul II.

Pagkanindot kun matuman kini aron mas daghang mga santos ang manalipod natong mga Sugbuanon batok sa katalagman ug mopatigbabaw ang pagkabuotan natong mga Sugbuanon.

* * *

Daghan gyud kaayong salamat sa management sa Cebu Eastern College nila ni Sir Jeff Go ug ni Sir Sammy Sia nga maoy nangita og paagi  nga makagamit kaming mga sakop sa media karong Domingo sa buntag  diha sa New Cebu Coliseum alang sa championship sa Newsmen Basketball Association (NBAC).

Akoy naikog nilang duha kay dihang ilang nasubay nga dili available  ang ilang main gym sa CEC tungod kay duna nay nakauna sa  pagpa-reserve adto na gyud  hinuon mi  nila  paduwaa  sa  mas class nga venue.

Ang schedule sa duwa karong Domingo sa  pahibawo  ni Sir  Bobby Inoferio diha sa New Cebu Coliseum, 8 a.m. to 9 a.m Cebu Daily News versus CCTN-47 alang sa third place unya ang championship 9 a.m. to 10 a.m. GMA-7 versus TV-5.

Agig bugti sa kaayo nilang Sir Jeff ug ni Sir Sam moapil lang sab ko  sa pagpangaliya sa Kahitas-an nga unta buligan pa sila sa daghang grasya ug daghang mga tinun-an ang moeskwela sa Cebu Eastern College nga barato kaayo ang tuition fee nga tag-P350 per unit.