Samtang mobisita kita ugma ug sa petsa 2 sa atong mga minahal sa kinabuhi sa mga lain-laing sementeryo, kinahanglang magbinantayon kita sa atong mga lakaw ug bisan sa pagbiya sa atong mga panimay tungod kay anaa kining mga mapahimuslanon sa panahon.
Safety first gyud! Kinahanglang batonan sab ang disiplina sa kaugalingon sama sa pagdili ug dala sa mga mahalong gadgets, alahas, dagkong kwarta, pagsunod sa mga traffic signs ug pagtuman kun unsay mga lagda nga gipatuman sa mga awtoridad diha sa mga sementeryo.
Hisgot na man gyud ta og kalag-kalag, problema gyud ta sa kahugaw sa atong mga pampublikong mga sementeryo nga dunay daghang mga bukog sa mga minatay nga gibutang lang sa daplin.
Alang nako, ang mas labing maayong himoon sa gobyerno mao gyud ang pag-cremate niini ilabina kay napasagdan kini sa mga kabanay.
* * *
Daghang reaction akong nadawat nga igo rang namolitika si Cebu Gov. Gwendolyn Garcia niining iyang pagmando karong bag-o nga dili na mangolekta ang taga-Kapitolyo og tag P5 pesos sa mga pasahero nga mosulod diha sa Cebu South Bus Terminal effective ugma, kalag-kalag.
Pero, kinsa man gud sa atong mga politiko ang wa mamolitika niining mga panahuna nga nagkaduol na ang eleksyon?
Kun tinuod nga pamolitika ang katuyuan sa gobernadora apan mas maayo na lang nga iya kining gilibkas nung kang magpaugat gyud taliwa sa daghang mga pagsaway.
Bisan ako nga mouli panalagsa sa akong yutang natawhan didto sa Dalaguete nga mosakay og bus daghan gyung bagulbol ang akong madunggan kaniadto niining tag-P5 pesos nga entrance.
Ang resulta kadtong mga nagdaginot dili na lang mosulod sa South Bus Terminal ug adto ra sa gawas sa terminal mag-atang og sakyanan.
Pero in fairness, dunay mga pasahero nga taga-south nga kun mouli naanad na kaniadtu pa nga dili na lang moadto sa South Bus Terminal ug igo na lang mag-atang sa kalsada kay mao ra man gihapon, moagi ra man ang mga sakyanan sa duol nilang gipuy-an dinhi sa dakbayan sa Sugbo.
* * *
Dili sa ingon nga akong gidepensahan si Director Ahmed Cuizon sa Land Transportation Franchising and Regulatory Board (LTFRB) sa desisyon sa wa pagsuspenso sa tanang 11 ka mga sakyanang de pasaheru-an sa Jegans Bus Liner nga iya ni kanhi kongresista Antonio Yapha human ang usa nadisgrasya niadtong Sabado nga mikalas og pito ka mga kinabuhi ug nakaangol sa 42 ka mga pasahero.
Logic lang gyud unta ba nga di gyud makatarunganon ug di gyud makiangayon nga suspensohon ang tibuok “fleet” sa bus, sa barko o maeroplano man kun dunay usa nga madisgrasya.
Kaniadto pa gyud ko niining akong baruganan nga kanang sistema sa pagsuspenso sa tibuok fleet nga gipatuman kaniadto sa panahon ni kanhi presidente Gloria Macapagal-Arroyo maoy pagsabotahe sa ekonomiya.
Gawas sa pagsabotahe sa ekonomiya, klaro sab kining paghikaw sa mga trabahante nga makapadayon sa ilang panginabuhi nga ipakaon sa pamilya.
In fairness ni Director Cuizon nga akong na-interview kagahapon, wa siyay mahimo og tulo ra sa 11 ang suspensohon human iyang gipasabot nga sukad mipagawas og direktiba ang ilang ulohang buhatan niadtong Hunyo sa tuig 2011 nga way ipatumang suspension sa tanang sakyanan sa panahon nga dunay madisgrasya.
Ang suspensohon mao ang sakyanan nga nadisgrasya ug ang mga kaubang sakyanan sa franchise.
Simbako labngon pito ka lawod nga mahitabo ang pagbangga sa mga sakyanan sama sa Ceres ug Sunrays ug ubang mga behikulo nga iya sa mga dagkung kompaniya, unsa pay sakyan sa katawhan kun suspensohon ang tanan sa pagpadagan ilabina ugma nga kalag-kalag na?
Unsa pa may income sa Kapitolyo kun suspendido ang tibuok fleet?
* * *
Midangop sa among sibyaanan ang pamilyang Abellana nga maoy mi-claim nga maoy tag-iya sa dakung lote sa gi-rechannel diha sa Sapangdaku river sa dakbayan sa Toledo.
Ang nagdala sa tingog mao si Mark Anthony Rabanes kinsa apo sa mga Abellana nga miakusar sa taga-Provincial Environment and Natural Resources Office (Penro Capitol nga atua midapig sa kontraktor nga si Jeffrey Borja.
Naglibog si Mr Rabanes kun nganong ang mga kinubkob nga mga bas ug graba ipalayo ug ipagawas sa ilang property nga unta dili man kini maoy katuyuan sa rechanneling sa sapa.
Buot ni Rabanes nga ipasuspenso ang proyekto samtang ilang pangayoon ang royalty fee nga tag-P300 matag truck de karga nga mogawas sa ilang property nga magdala sa mga hinabwa kay nagduda siya nga doble ang igo sa kontraktor.
Ang taga-Penro andam nga makig-dialogue ni Rabanes sa Ombudsman aron matubag ang tanan human ang kabanay di gyud mosugot nga ang taga Provincial Legal Office maoy moresolbar sa isyu.
* * *
Tinuod nga nadesente na karon ang mga tindahan diha sa may Larsian Fuente human gi-develop sa Kapitolyo.
Apan lahi ra gyud kaayo sa karaan kay nagagmay ang mga tindahan.
Gawas pa akong naobserbahan nga medyo gamay ra ang mangaon sukwahi kaniadto nga bisag kadlawon na, daghan pa gihapong customer.
Gawas pa, dunay reklamo ang mga tindero ug tigluto sa mga barbecue kay matud pa wa matuman ang paggamit uog magic charcoal kay matud pa dihang ilang gisuwayan dali kaayong naabo ug alkanse sila.