Wa na matuman ang mga precautionary measures sa DepEd

Insakto gyud kini’ng panultihon nga kita’ng mga Pinoy nag-ayo lang sa sinugdanan.

Niadtong bag-o pa ang pagdagit ug pagpatay sa 6 anyos nga batang babaye nga si Ellah Joy Pique nindot kaayong paminawon ang mga kadagkaun sa Department of Education (DepEd-7) pinangulohan ni Director Recaredo Borgonia.

Mipatuman ug mga security measures pinaagi sa pag-isyu ug memorandum ngadto sa tanang mga tunghaan nga wa nay mga bata’ng estudyante ang tugtan nga maka-uli kun way mga ginikanan o guardian nga mokuha.

Pero subo kaayong palandungon kay wa na matuman ang direktiba sa (DepEd) kay ako mismo naka-rescue ug bata’ng lalaki nga tinun-an sa Grade I diha sa Lahug Elementary School nga gipagawas lang sa guwardiya nga way kuyog. Puwerte’ng hilak sa bata ug ako nalang gihatud sa ilaha.

Nahitabo sab kini niadtong Miyerkules sa hapon diha sa Mohon Elementary School sa dakbayan sa Talisay nga dunay estudyante nga 6 anyos nga si Arnold Escobanes Jr. ang gipagawas sa eskuwelahan nga way kuyog.

Ang nakaporke pa gyud ang bata wa na makatoltol sa ilang pinuy-anan sa Mohon ug nakalawos pagbaklay paingon sa Inayagan Naga.

Ang makalolooy nga 6 anyos puwerte’ng luspada ug luya na kaayo ug napuno sa basa sa uwan ug singot ang lawas nga gi-rescue nila ni Kapitan Narciso “Boy” Tablate.

Ang inahan sa bata nga si Rowena nga nagsige’g pangita sa bata nakatayming ug paminaw sa among sibyaanan sa DYSS hinungdan nga nakig-coordinate siya kang Kapitan Tablate.

Ang kapitan uban sa iyang mga tanod maoy naghatud sa bata paingon sa inahan ug nadungog sa kahanginan ang mga bakho sa kalipay sa ginikanan.

Ang mama mipasabot nga naandan na ni Arnold nga mokuyog sa maguwang sa tiempo’ng ting-uli. Apan ang nakadeperensiya kay sayo’ng gibuhi-an sila si Arnold sa maestra samtang nagklase pa ang maguwang.

Mao kini ang nakadaut sa atong mga school principals ug sa mga faculty members nga di gyud magmigkaw.

Maglaum ko nga sublion ni Director Borgonia ang iyang direktiba ug kinahanglang lig-onon gyud ang seguridad ug proteksiyon sa mga anghel. Ayaw paabota ninyo nga dunay laing Ellah Joy!

* * *

Nalooy ko ni Kapitan Narciso “Boy” Tablate sa Inayagan Naga nga nawani sa eksena sa dakop sa Australian national nga si Angelo Farina nga nagpahimolos sa upat ka mga babaye nga mga minor de edad.

Si Kapitan Tablate maoy gilabhan sa uban kun nganong wa ma-starring.

In fairness niya siya maoy nakabisto sa kabuang ni Farina. Kay ang duha sa upat ka mga minor de edad ilang gidakop niadtong buwan sa Mayo tungod sa giingong pagpangawat ug cellular phone.

Dihang iyang gipang-imbistigahan ang duha sa background didto mitug-an nga gihimo sila’ng sex slave sa langyaw ug maoy hinungdan nga iyang gi-report sa DSWD Naga ug gipa-kostodiya ang mga bata.

Apan natinga nalang siya kay nganong nakabuhi ang mga bata ug nakabalik sa pinuy-anan sa Australian national.

Mipasabot si kapitan Tablate nga wa intawon sila magmika kay sa pagka-tinuud nagsige sila ug monitor sa kalihukan sa mga batan-on.

Gipatawag sa kapitan ang mga ginikanan apan igo ra’ng mipadayag nga wa gyud silay mahimo kay latagaw ug manukol kanila ang mga bata. Unya kun itanggong sa balay mangita gyud ug paagi nga makasibat.

Sa tinuud lang bisan ako nakasaksi sa ubang pamilya nga bisag unsaon sa ginikanan ug pahimangno molikoy gyud. Lipaton nga makatug sa tungang gabii unya mola-ag gyud ug magbuntag sa internet café.

Panahon na gyud kini nga mo-estrikto ang gobyerno sa curfew ordinance. Wa gyud unta’y lugak sa pagpatuman kay kaayohan ra man gihapon ang gitan-aw ngadto sa mga bata.

* * *

Ang Department of Health Region – 7 ug Cebu City Health Department mipasalig niadtong Sabado atul sa among programa’ng “Dialogue On The Air” sa DYSS Super Radyo nga luwas imnon ug dili gyud kontaminado ang mga tubig gikan sa Metro Cebu Water District (MCWD) ug sa 300 kapin ka mga refilling stations dinhi sa dakbayan sa Sugbu.

Salamat intawon kun mag-pirme kini kay lisud na nga mahitabo dinhi ang sa Alegria nga gipangtipos ang mga tawo tungod sa pagka-iresponsable ug pagka-inutil sa taga Water Task Force sa Provincial Government ug sa Alegria. Ngan ray nindot nila’ng Engr. Adolfo Quiroga.

Sila si Engr. Evangeline Canoneo Sanitary Engineer sa DOH-7 ug Eng. Isaac Deiparine Sanitation Inspector sa Cebu City Health nagkanayon nga sa bag-ong inspection pulos gyud negatibo sa kagaw.

Matud pa sa duha ka ahensiya nga binuwan ang gihimong laboratory test.

Kaniadtu na-alarma sila kay dihay tubig sa gripo sa Guadalupe gikan sa MCWD ug usa ka refilling station diha gihapon sa Guadalupe ang positibo sa hugaw sa tawo. Apan karong bag-o negatibo na.

Bisan ang mga representante sa MCWD nga sila si Astro Logarta ug mga kaubanan ug ingon man si Michael Cascato sa Free Flow Refilling Station mipasalig nga sila mismo kanunay’ng nagbinantayon aron luwas ang mga konsumidor.

Gawas sa mga nahisgutan nga mga personalidad magpasalamat sab diay ko sa ubang mga kadagkuan sa MCWD nga mitunga sa among programa nga sila si Charmaine Rodriquez Public Affairs Department Manager, Joselito Vidal Division Manager sa Service Connection, ug si Edwin Correos Division Manager sa Public Relations.