Laing palusot sa taga Palace of Justice?
Giimbestigahan pag-ayo ni manlalaban Evangeline Abatayo, hepe sa Cebu City Local Civil Registrar ang isyu nga nakapa-alarma sa ilang buhatan nga dunay kasal nga na-anular bisan peke ang desisyon nga giingong gikan sa korte.
Matud ni Abatayo, mismo sila nailad kay nagtuo gyud nga authentic ang court decision nga giingong gikan ug hinimo ni RTC Judge Ester Veloso.
Si kanhi RTC Executive Judge Mienrado Paredes maoy nanawag kaniya nga nalutsan sila og peke nga annulment of marriage.
Si Abatayo mipahibawo nga usa sa iyang gihimo karon mao ang pagkuha sa tanang signature specimen sa mga huwes ug sa mga branch clerks of court aron ilang magamit sa unahan pagtandi sa authenticity sa mga dokumento nga ma-forward sa ilang buhatan.
Bisan si RTC Judge Macaundas Hadjirasul nga nakaapil sa among diskusyon niadtong Sabado miingon nga andam niyang suportahan kining lakang ni Abatayo.
Isugyot usab niya ni Acting Executive Judge Silvestre Maamo nga makigtigom sila sa taga Civil Registrar aron matabangan nila pagsulbad ang mga palusot sa pagpakasal ug pagpa-anular sa kaminyoon.
Kaniadto, dihay usa ka court personnel ang giimbistegahan sa Korte Suprema tungod sa paggama og mga peke nga desisyon. Sukad niadto, wa na siya mobalik sa trabaho.
Sa pasiunang imbestigasyon ni kanhi RTC Executive Judge Meinrado Paredes, nasubay nga way nalambigit nga court personnel sa maong tinunto.
Apan kinahanglang subayon kini ug tarong kay daghan na kaayong alisto karon. Kinsa man gud ang makamao sa paghimo og mga desisyon? Di ba taga korte raman ug mga abogado?
* * *
Giklaro ni Abatayo nga dili ilang opisina ang miisyu sa marriage license niadtong Sugbuanong bayot nga nakaminyo og lalaking langyaw.
Daku gyud og pagtuo si Abatayo nga kadto usa sa mga nalakip sa “marriage scam” nga binuhatan sa mga mangwartahay.
Apan nagkauyon silang duha ni Judge Hadiirasul nga wa gyuy sala ug way tulubagon si MTCC Judge Rosabella Tormis nga maoy nagkasal kay wa sa gahom sa mga huwes ang pag-inspection sa kinatawo sa magpakasal.
Nahibaw-an nga kadtong maong bayot nakakuha gyud og birth records nga usa siya ka babaye.
Apan human sa ilang kasal ang langyaw mipaanular sa ilang kaminyoon kay parehas niya nga usa pud diay ka lalaki ang iyang naminyoan.
Ako na lang ipaagi og komedya nga sa sunod, kadtong magpakasal, kinahanglang mohimo daan og actual ocular inspection sa kinatawo sa iyang partner aron di masugamak sa gasto kaayong proseso sa husgado.
* * *
Pagkadaghan na gyung balita bahin ni Bella Ruby Santos human wa na siya mopakita.
Dili niya mabasol ang mga pagduda sa uban ug ang mga nanggawas nga istorya nga siya nagpa-retoke. Duna pay balita nga misibat na siya sa Hong Kong.
Pero mas maayo gyud nga mobulontaryo siya sa pagtahan ug atubangon na lang ang kaso aron maklaro kun inosente ba gyud siya uban sa iyang hinigugma nga si Ian Charles Griffiths sa kontrobersiyal nga pagdagit ug pagpatay sa bata nga si Ellah Joy Pique.
Kun way salig si Bella sa kapulisan, pwede man tingali nga modangop siya sa NBI ug sa gipanghisgutan nga mga politiko sa iyang igsoon.
* * *
Dili ko motuo sa depensa ni Rolando Aburot sa iyang pagpusil-patay sa Canadian national nga si Darcy Hanz Reutenberg ug dayon iyang gilubong ug gisemento sa ilang alad sa barangay Adlaon.
Pagka wa gyuy puangod. Wa gyud siyay ikabawos sa langyaw nga nakatabang na og daku sa iyang pagkatawo.
Lisud ning klase sa tawo nga gihungitan nag pagkaon unya apilon pag kaon ang tudlo sa naghungit.
Klaro kaayo ang iyang motibo nga mao ang pagtulis sa biktima.
Kining maong hitabo makadait na sab kini sa imahen natong mga Pinoy ngadto sa ubang kanasuran.
