Cebu mao nay no. 1 sa HIV/AIDS?
Daku kaayo ang akong respeto kang Jerson See kinsa usa sa mga Sugbuanon nga nagpositibo sa sakit nga HIV/AIDS nga way lipod-lipod nga miangkon sa media sa iyang sakit nga gihambing taliwa sa kauwaw ug bisan nga nakasupak kini sa confidentiality.
Akong nabasa kang Jerson See nga seryoso siya sa kampanya pagpakigbatok ning maong balatian aron makalikay ang ubang mga tawo.
Niadtong Sabado atol sa among programang “Dialogue On The Air” si Jerson sa Cebu Plus Association Inc. mitunga sa among programa nga nagtuki sa maong isyu.
Kun wa mopindot nako si Sir Carlo Dugaduga tigpamaba sa Cebu City Hall dili ko maka-ila kang Jerson nga nagpositibo sa HIV.
Mikuyog siya kang Dr. Ilya Tac-an sa Cebu City Health ug sa iyang kauban sa Cebu Plus Association nga si Murphy Manayaga.
Akong tan-aw kang Jerson mora gyud og way problema ug way sakit nga makamatay nga makatakod.
Tungod kay insakto kaayo siya sa lawas ug way deperensya ang iyang mga panit.
Si Jerson nga nag-edad na og 23 anyos mitug-an nga niadto pang nag-edad siya og 18 anyos nagpositibo na siya sa HIV/AIDS apan dili niya ma-trace-up kun asa gikan apan iyang giangkon nga duna siyay mga kalihukan kaniadto nga risgo sa panglawas nga wa niya gidetalye.
Nanawagan lang siya nga respetohan silang mga nakabaton na og sakit nga HIV/AIDS ngan nga tawo sab sila.
Iyang giangkon nga duna gyuy discrimination nga mahitabo ngadto kanila ngan nga makatakod ang ilang sakit.
Matud ni Jerson nga nabiktima na siya sa discrimination kay dihang nangaplay siya sa pagka-call center agent upat ka mga kompaniya ang wa modawat kaniya.
Gidawat siya sa ikalimang kompaniya apan wa lang sab siya magdugay tungod kay gipili niya ang pagsulod sa kawsa pagpakigbatok sa HIV/AIDS.
Iyang gi-angkon nga duna siyay uyab nga babaye pagkakaron apan dili pa siya gusto nga magkaanak.
Si Dr. Tac-an mipasabot nga way angayng kabalak-an kun makighilawas si Jerson sa iyang uyab basta nga mogamit lang sab og condom isip paniguro.
Gawas niini gipasabot ni Dr. Tac-an nga duna say medisina karon nga imnon aron dili makatakod ngadto sa partner.
Gitug-an usab ni Dr. Tac-an nga dunay unom ka mga inahan nga nagpositibo sa HIV/AIDS apan negatibo ang mga anak nga gipatotoy sa suso sa inahan.
Nagpahimangno lang siya nga ang maong sakit motapon lang pinaagi sa dugo, gatas sa inahan ug hugaw sa babaye ug sa lalaki.
Miingon usab si Dr. Tac-an nga sa kinatibuk-ang 532 ka mga nagpositibo sa HIV/AIDS dinhi sa dakbayan sa Sugbo, ang pagpupuli ug gamit sa dagom sa mga drug addict maoy nag-una nga hinungdan.
Ikaduha mao ang pakighilawas sa bayot ug sa lalaki ug ikatulo mao ang pakighilawas og lain-laing mga tawo.
Samtang 5 porsiento karon sa kababayen-an sa Colon ug lain-laing mga dalan dinhi sa Siudad ang nagpositibo na sa HIV/AIDS.
Nanawagan sila niadtong nakaagi na ug mga binuhatan nga medyo delikado nga mas maayong moadto sa ilang buhatan sa City Health Department aron magpahiling kay libre ang eksaminasyon.
Ang importante ra gyud niining tanan mao nga di gyud makighilawas og dili imong asawa o bana aron paglikay.
* * *
Nalingaw og nahimuot kaayo ko nga nagtan-aw sa akong mga kauban sa media nga nagduwag basketball atol sa among opening kagahapon sa Newsmen Basketball Association of Cebu (NBAC) diha sa gym sa barangay Apas ning dakbayan.
Daku na gyud kaayo ang kalainan sa dinuwaan sa mga players ikomparar sa pagsugod sa NBAC niadtong tuig 2004.
Sagad sa mga komentaryo nga akong nadunggan nga huna-huna na lay nagdaku ilabina nga may edad na.
Adunay pipila nga wa pa moduwa kagahapon kay nagsakit pa ang mga tuhod.
Pero mayoriya sa mga original nga mga players sa NBAC kumbate pa.
Maglaum ko nga magpadayon kini hangtud sa kahangturan kay kini ra gyud ang paagi nga makapasingot og todo nga di kabayran ug sapi ilabina gyud kun makapasulod og bola sa ring bahalag pilde.
Sa pito ka mga teams, ang Sun.star/Superbalita mao pay wa makaduwa kay bye sila kagahapon apan sila maoy makigtigi kanamo sa GMA-7/dySS karong Domingo, Aug. 12 alang sa first game.
Kagahapon sa first game midaug ang TV-5 versus ABS-CBN. Sa second game kami maoy midaug batok sa The Freeman/Bombo, samtang sa third game gipilde ang Cebu Daily News/dyLA sa CCTN-47/dyRC.
Mapasalamaton kaayo ang NBAC nila ni sir Bobby Inoferio kinsa maoy NBAC commissioner kay wa gyud pul-i sa pag-abag kanamo ingon man nila ni Kapitan Ramil Ayuman ug tibuok konseho sa Apas nga nagpagamit sa ilang gym ug ilabina kang sir Elias Baquero presidente sa Cebu Federation of Beat Journalists ug sa tibuok board sa CFBJ kay daku sab kaayog natabang sa maong liga sa pinansyal nga aspeto.
