Nakonbinse ko nga pilde si Manny
Kining hambog sa tawo mao ray hinungdan sa iyang kapildihan.
Asa man ang panghambog ni Congressman Manny Pacquiao
nga iyang sayohon ang pag-undang sa ilang away kagahapon ni Timothy Bradley pina-agi sa knockout?
Way lalis iya ni Pacquiao ang first to sixth rounds apan pag-seventh round hangtud nahuman gibati kog duka sa performance sa atong Pambansang Kamao.
Ako nga mitan-aw sa pay-per-view sa barangay Apas gym nakaingon ko sa unahan nga medyo daug si Pacman sa puntos.
Apan ngan nga naanad ko sa away ni Pacman nga tinumbahay gyud mao nga makaingon ko nga di gyud convincing kun siya padag-on.
Nasayod na gyud si Manny nga anaa ang tikas ug magic sa boxing wa gyud niya tumbaha niadtong ikaduhang round nga migakos na si Bradley.
In fairness ni Manny naningkamot siya pagdaug pero unsaon man nagkatiguwang na siya, unya nagka-seryoso sa iyang pagtuo sa Labawng Makagagahum.
Nagtuo ko nga ang pagduha-duha ni Manny pagkulata ni Bradley nahasumpay sa iyang pagbasa sa bibliya nga gidili na ang pagpangulata. Hehehe.
* * *
Deserving gyud si PO2 Lea Juarez nga hatagan og “on the spot promotions” sa iyang mga kadagkuan sa Philippine National Police.
Nahurot akong bilib niya kay wa gyud mahadlok bisag babaye ug way napagan sa iyang pagpamusil-patay pag-neutralize kang Ra-el Alex Cabornay gikan nga nanulis kuyog sa iyang ig-agaw nga si Richard Cabornay Baculi didto sa Ayala Business Park niadtong Huwebes sa udto.
Kadtong sitwasyuna nabutang gyud sa risgo si PO2 Juarez human mibunot sa armas ang napatay nga tulisan nga si Ra-el apan naunhan lang sa bayani nga policewoman.
Angay sab hatagan ug pasidungog si PO1 Perceval Perigo nga maoy nagmaneho sa motor nga gisakyan ni PO2 Juarez.
Mensahe kini sa mga badlungon sa katilingban nga di na gyud mokompyansa karon kay nagka-hingigo na ang atong kapulisan.
* * *
Sa wa pa mahitabo kadtong pagpamusil ni PO2 Juarez kang Cabornay, dunay laing insidente sa pagpanulis diin makaluluoy kaayo ang biktima nga manager sa Jollibee Mango Branch kay nakaangkon og 13 ka samad dinunggaban.
Ang biktima mao si Jocelyn Palma Oximina kinsa gisulod ug gikatkat sa ilang silingan ug dayon giluba sa makadaghang higayon diha sa sitio Little Plaza sa barangay Inayawan ning dakbayan niadtong ala-1 sa kadlawon sa Huwebes.
Ang biktima natug niadtong higayuna uban sa 2-anyos nga anak nga gideretso ug layog sa suspetsado nga si Oliver Geroy Berot nga taga Sitio Romblon Inayawan.
Swerte pa ang biktima kay nakasinggit pa ug taban hinungdan nga nakamata ug naalarma ang igsoon nga si Jonash Christopher Palma nga nadunggaban sab ni Oliver.
Si Oliver nga akong na-interview miangkon sa krimen. Apan matud pa niya nga nagdumot gyud siya sa biktima ug sa igsoon nga si Jonash.
Matud niya nga si Jonash gyud maoy iyang patyon kay gahi kaayong badlungon nga di magpahinay sa volume sa iyang sounds system bisag lawom na ang kagabhion.
Pero ang kapulisan sa Pardo miingon nga panulis gyud ang tuyo sa dinakpan sanglit daghan na kini og records sa pagpanulis.
Gani duna pay usa ka nurse ug katabang ang mokiha batok ni Oliver kinsa notadong tulisan.
* * *
With all due respect, nagkagidlay gyud ang atong mga kadagkuan sa Department of Education ilabina ang mga magtutudlo sa gipatuman nga K to 12 curriculum niining school year 2012-2013.
Pero in fairness naningkamot gyud intawon sila si OIC Director Carmelita Dulangon, iyang mga kaubanan lakip na ang mga private learning institutions nga magmalampuson sila niining bag-ong curriculum.
Sama sa akong giingon dili dautan kining programaha nga gipatuman sa gobyerno kay tubag kini sa isyu sa poor quality education ug kawad-on sa pagpuyo kay pinaagi niini makabaton na ang tinun-an og kaalam sa diskarte sa pagpakabuhi.
Niadtong Sabado sa hapon atol sa among programang “Dialogue On The Air” sa dySS Super Radyo way lipod-lipod nga mipadayag si Dr. Ronald Gutay, OIC schools division superintendent sa dakbayan sa Toledo nga pagkakaron incompetent pa ang mga magtutudlo sa K to 12.
Nahibaw-an sab nako nga hangtud karon daghan pang mga magtutudlo nga nagtudlo og mga subjects nga dili ilang master.
Apan gipasalig ni Director Dulangon nga makaya ra gihapon ang multi-tasking sa mga magtutudlo ilabina nga gradwado sab sa kolehiyo.
* * *
Gipangga gyud pag-ayo sa atong mga plitiko dinhi sa dakbayan sa Sugbo ang mga sakop sa senior citizens.
Intresado kaayo ang mga politiko sa mga edaran ug mga tiguwang kay daku kinig tingog sa mga sakop sa pamilya sa “decision making” kun kinsay botaran sa umaabot nga eleksyon.
Ang Cebu city government nagpagawas karong adlawa og P156 milyones aron ka-apod-aporan og tag P3 mil pesos ang matag senior citizen.
Akong nahibaw-an gikan nilang Jeffrey Ocampo, executive officer sa Office of the Senior Citizens ug kang Public Information Officer Carlo Dugaduga nga moabot og 52 mil ngadto sa 54 mil ka mga miembro sa senior citizens.
Matud nila nga magdungan sa pagpang-apod-apod ang 80 ka mga barangay.
Maglaum ko nga puslan man nga anaa kining ilang programa kinahanglang ilang mahatag ang tag P3 mil ngadto sa mga nagmasakiton nga mga tiguwang.
Mao kini ang nakanindot basta magkaduol na ang bugno sa politika kay manggawas ang wala damha.
