Libreng Pamahaw

Salins Hulbot

Nyor Gamay (NG): Nakahinumdom ka adtong pasiaw kabahin sa unggoy nga kahibawo mo-chess?

Nyor Daku (ND): Sorry Nyor, nakalimot na ko. Pahinumdumi ko be.

NG: Gidayeg ang unggoy sa mitan-aw sa duwa niini batok sa iyang amo. Matud pas nitan-aw, “Ka bright sa imong unggoy, uy, kamao man mo duwag chess.”

ND: Aw, o. Murag nakahinumdom na ko. Unsa gani to ang tubag sa tag-iya sa unggoy?

NG: Miingon ang tag-iya sa unggoy og, “Dili, uy, sa unom namo ka duwa kausa ra ni makadaug.”

ND: O, nakahinumdom na ko, Nyor. Pero nganong nakahuna-huna man kag inunggoy ron? Gimingaw kag saging?

NG: Ikaw gyud, Nyor, kahibawo lagi kong mas maayo pa kas unggoy partig bugal-bugal.

ND: O, kay ngano man, Nyor, lupigon diay kas unggoy binugalbugalay?

NG: Hanggawa gyud nimo, Nyor, uy. Nakahuna-huna lang ko ning maong binuang kay tungod sa tuki sa Tanawan, Oslob.

ND: Tuki?

NG: Tan-awa ra hinay kaayo ka basta current events. Ang tuki mao nay tawag sa mga lumad sa whale sharks nga gitawag sad mga Tagalog og butanding.

ND: Sorry, Nyor. Wa ko kabantay ani da. Tuki diay tawag ana nila ha. Unsay may koneksyon nila sa unggoy? Pasakyan silag unggoy samatang maglangoy-langoy?

NG: Na! Mao nay nakadaot nimo. Circus mentality ra kaayo ka. Di man gani ipahikap.

ND: Mao ba. Didto diay ka? Unya wa ka makahikap.

NG: Gahia gyud nimog ulo, Nyor, uy. Ingnang di lagi ipahikap.

ND: Sorry, Nyor, nigahi naman gud akong hubon. Pero unsa may hitsura aning tuki?

NG: Daku-daku pas sa sakayan, itom nga may puntik-puntik nga puti ug ang iyang baba murag tunga sa dupa ang gilapdon. Duna ni siyay silik, hasang ug ikog kay iho man ni siya.

ND: Ah, okay. Di diay gyud kaayo daku. Daku lang kon itandi sa tawo.

NG: O, Nyor, kay blue whale man nang dagku gyud kaayo nga moabot og 33 meters o kapin. Iho mio ra man ni siya, Nyor.

ND: Pero unsa may labot sa unggoy ani niya, Nyor?

NG: Di gyud ka kalimot sa unggoy Nyor da. Nakahuna-huna man gud ko nga sama sa iro, unggoy, elepante ug whale, maurag bright sab ning tuki.

ND: Nganong makaingon man sab ka ani, Nyor?

NG: Kay maru kaayo sila, Nyor. Ilang giamigo ang mga mananagat ug mga turista para libre silag pamahaw. Pamahaw ra, Nyor, kay gi-did-an na man  sa Department of Environment and Natural Resources ang taga-didto pagpakaon niani inig ka alas dose.

ND: Nakamatikud kas ilang ka-maru, Nyor? Murag bright sad gyud diay ka, Nyor. Ayg kabalaka, Nyor, layo ra to nimong unggoy nga kahibawo mo duwag chess.

NG: Naa na sab ka, Nyor. Lupig pa nimoy unggoy sa kasipat.